- एमालेको सहयोगमा सत्ताको नेतृत्वमा रहँदासम्म गिरिबन्धु टि–स्टेट प्रकरणमा मौन रहेका माओवादी केन्द्रका अध्यक्ष पुष्पकमल दाहाल सत्ताबाहिर पुगेपछि चर्को विरोध गरिरहेका छन् ।
- नेपाली कांग्रेसका महामन्त्रीद्वय गगन थापा र विश्वप्रकाश शर्मााले यो मुद्दा चर्काएका थिए । आफ्नै पार्टीको समर्थनमा ओली प्रधानमन्त्री भएपछि कांग्रेसका नेताहरु यस प्रकरणमा मौन छन् ।
काठमाडौं– नेकपा एमालेको सहयोगमा नेकपा माओवादी केन्द्रका अध्यक्ष पुष्पकमल दाहाल सत्ताको नेतृत्वमा रहेका बेला नेपाली कांग्रेसले गिरिबन्धु टि–स्टेट प्रकरण चर्काएको थियो । त्यतिबेला एमाले अध्यक्ष केपी शर्मा ओलीमाथि अनियमितताको आरोप लगाउँदा दाहाल मौन बसेका थिए ।
उनै दाहालले सत्ताबाट हटेपछि भने यो प्रकरण उक्काउने तर्क गरेका छन् । सोमबार झापाको गौरीगञ्ज पुगेर गिरिबन्धु टि–स्टेट प्रकरण पर्दाफास गरी छाड्ने दाबी गरेका हुन् । ‘मेरो लागि त केपी ओली यति धेरै झेली मान्छे, उहाँ त जलझेल गरिराख्नुहुन्छ,’ वर्तमान प्रधानमन्त्री ओलीमाथि आरोप लगाउँदै दाहालले भने, ‘गिरिबन्धु टि–स्टेटमा उहाँले गरेको बदमासीलाई पर्दाफास गरेरै छाड्ने छु ।’
ओली नेतृत्वको मन्त्रिपरिषद्को २०७८ वैशाख १३ गतेको बैठकले गिरिबन्धु टि–स्टेटलाई झापाको बिर्तामोड नगरपालिका–६ मा रहेको ३४३ बिघा १९ कट्ठा १२ धुर जग्गा सट्टापट्टा गर्न स्वीकृति दिने निर्णय गरेको थियो । अर्बौं रुपैयाँ पर्ने साढे ३०० बिघा जग्गाको सट्टा कोशी प्रदेशको विभिन्न अनकन्टार ठाउँमा रहेका सस्तो मूल्यका जग्गा सट्टापट्टा प्रकरणमा ओलीले अनियमितता गरेको कांग्रेसको आरोप थियो । आफूले यही प्रकरणमा अनुसन्धानको सुई अघि बढाउन खोज्दा सरकारबाटै हराएको दाहालको दाबी रह्यो । ‘मलाई जबरजस्ती प्रधानमन्त्रीबाट हटाइएको कारण मेरो अनुसन्धानको सुई गिरिबन्धुतिर ढल्किएकोले हो,’ दाहालले भने ।
दाहालमात्रै हैनन् अहिले एमालेसँग गठबन्धन गरेको नेपाली कांग्रेस पनि यस प्रकरणमा मौन छन् । नेपाली कांग्रेसका महामन्त्रीद्वय गगन थापा र विश्वप्रकाश शर्मााले यो मुद्दा चर्काएका थिए । आफ्नै पार्टीको समर्थनमा ओली प्रधानमन्त्री भएपछि कांग्रेसका नेताहरु यस प्रकरणमा मौन देखिएका हुन् ।
कांग्रेस–एमाले मिलेपछि गत असार १८ गते काठमाडौं महानगरपालिकाका मेयर बालेन्द्र शाह (बालेन)ले नयाँ गठबन्धनप्रति व्यंग्य गरेका थिए । सामाजिक सञ्जालमार्फत बालेनले नयाँ सत्ता समीकरणको तयारीमा रहेका एमाले अध्यक्ष ओली र कांग्रेस सभापति शेरबहादुर देउवालाई व्यंग्य गरेका थिए । ‘यो समय गिरिबन्धु चियाको हो,’ बालेनले सामाजिक सञ्जालमा दुई नेताको तस्बिर पोस्ट गर्दै लेखेका थिए, ‘काले काले मिलेर खाऊँ भाले ।’
भ्रष्टाचारलाई जरैबाट उखेलेर फाल्ने दाबी
माओवादी केन्द्रका अध्यक्ष दाहालले आगामी निर्वाचनबाट आफ्नो पार्टीलाई पहिलो पार्टी बनाइ भ्रष्टाचारलाई जरैबाट उखेलेर फाल्ने दाबीसमेत गरे । जनताको तागत पनि जोडियो भने भ्रष्टाचारमुक्त नेपाल निर्माण गर्न सम्भव रहेको दाहालको भनाइ छ । ‘अब मसँग भ्रष्टाचारमुक्त मुलुक निर्माण गर्ने, उपेक्षित, उत्पीडित जनतालाई अधिकारसम्पन्न बनाउने र आर्थिक समृद्धिमार्फत जनताको जीवनस्तर बदल्नेबाहेक अरु कुनै विकल्प छैन,’ दाहालले भने, ‘तपाईंहरुको तागत मसँग जोडियो भने देशबाट दलाल, बिचौलिया र भ्रष्टहरुलाई लखेटेर भ्रष्टाचारमुक्त मुलुक बनाउन सम्भव छ र बनाइने छ ।’
देशैभरि माओवादी केन्द्रप्रति नयाँ आशा र भरोसा बढ्दै गएको उल्लेख गर्दै दाहालले केही समयअघिको निर्वाचनबाट कोशी प्रदेशमा माओवादी केन्द्र पहिलो बनेको र देशभर पनि उल्लेख्य प्रगति भएको बताए । यो २०८४ को निर्वाचनको संकेत भएको उल्लेख गर्दै दाहालले माओवादी एक्लै चुनाव लड्न सक्दैन भन्ने गलत भाष्य अब खारेज भएको दाबी गरे । ‘हिजो कांग्रेस वा एमालेसँग मिलेर उनीहरुलाई पहिलो पार्टी बनाउनतिर समय खेर फालियो,’ दाहालले भने, ‘अब एक्लै लडेर हामी एक नम्बरको पार्टी बन्छौं ।’
अध्यक्ष दाहालले अहिले नेपाली जनताले प्रयोग गर्न पाएको राजनीतिक अधिकार माओवादीकै कारण सम्भव भएको उल्लेख गर्दै बाँकी राजनीतिक अधिकारलाई पूर्णता दिने, सुशासन, सामाजिक न्याय र समृद्धिलाई प्राथमिकताका साथ अघि बढाउने बताए । झापाको कोच बाहुल्य क्षेत्रमा सम्बोधन गर्दै उनले भने, ‘हाम्रो संविधानले स्वायत्त क्षेत्र, विशेष क्षेत्र र संरक्षित क्षेत्रको व्यवस्था गरेको छ, म आज कोच समुदायलाई अब स्वायत्त, विशेष र संरक्षित क्षेत्रको अभ्यासमार्फत अघि बढ्न आह्वान गर्न चाहन्छु ।’
आफ्नो पार्टीले सुशासनको अभियान सुरु गरिसकेको उल्लेख गर्दै दाहालले देशभरि चलिरहेको खबरदारी सभा यसकै सुरुवात भएको बताए । ‘मैले प्रतिनिधिसभामा विश्वासको मत लिँदै गर्दा भनेको थिएँ, भ्रष्ट र बिचौलियाहरुले झालझेल र शक्तिको बल प्रयोग गरेका छन्, हामी जनताको बल प्रयोग गर्ने छौं’, उनले भने, ‘अब हामी निरन्तर जनताको बलबाट नै भ्रष्टाचारविरोधी अभियान सफल बनाएरै छाड्ने छौं ।’
दाहालले आफूले तीनपटक प्रधानमन्त्री हुँदा गरेका कामको विवरण सुनाउँदै आफू पूरै जनताको हितमा केन्द्रित भएको तर्क गरे । ‘मैले पहिलोपटक भौतिक पूर्वाधारको क्षेत्रमा मध्यपहाडी लोकमार्गको सुरुवात गरें, जो अब चाँडै सम्पन्न हुँदै छ,’ दाहालले भने ‘सामाजिक न्यायको क्षेत्रमा गरिब किसानको कृषि ऋण मिनाह गर्ने अवसर मलाई प्राप्त भयो ।’
