काठमाडौं– राष्ट्रिय प्रजातन्त्र पार्टी (राप्रपा)ले हिन्दू राष्ट्र पुनःस्थापना र संवैधानिक राजसंस्था कायम गर्न माग गर्दै सरकारलाई ४० बुँदे मागपत्र बुझाएको एक वर्ष नाघ्यो । माग पूरा नगरे निरन्तर आन्दोलन गर्ने र व्यवस्था परिवर्तन गर्ने उक्त दलको चेतावनी थियो । तर, गत वर्षको चैत अन्तिममा एक दिन आन्दोलन गरेपछि राप्रपा थला पर्यो ।
अन्ततः झण्डै नौ महिनापछि भने शनिबार कोशी प्रदेशको इटहरीमा राप्रपाले विरोधसभा आयोजना गरेको छ । सभामा राप्रपा नेताहरू हिन्दू राष्ट्र पुनःस्थापना र संवैधानिक राजसंस्था फर्काउने एजेण्डामा भन्दा पनि भ्रष्टाचारमा केन्द्रित भए ।सभालाई सम्बोधन गर्दै अध्यक्ष राजेन्द्र लिङ्देनले ठोकुवा गरे, ‘सम्पत्ति शुद्धीकरणको हतियारले अब ठूला दलका कोही जोगिँदैनन् ।’
हालै राष्ट्रिय स्वतन्त्र पार्टी (रास्वपा)का सभापति रवि लामिछानेमाथि सम्पत्ति शुद्धीकरणको अभियोग लाग्यो । उनीविरुद्ध अदालतमा यससम्बन्धी मुद्दा दायर भइसकेको छ । यही प्रसंग जोड्दै अध्यक्ष लिङ्देनले ठूला दलका सम्पत्ति शुद्धीकरणको मुद्दाले कोही नजोगिने बताएका हुन् । लिङ्देनले भनेका ठूला दल नेपाली कांग्रेस, नेकपा एमाले र माओवादी हुन् । कांग्रेस पछिल्लोपटक २०४८ र एमाले २०५१ पछि बेलाबेला सरकारमा छन् । माओवादी २०६५ पछि सरकारमा छ । उनकै दल राप्रपा पनि २०५२ पछि पटक–पटक सरकारमा सहभागी हुँदै आएको छ ।
तर, कांग्रेस, एमाले र माओवादीका नेताहरूले अकुत सम्पति कमाएको आरोप लगाउँदै लिङ्देनले उनीहरू सम्पत्ति शुद्धीकरण मुद्दामा नजोगिने बताएका हुन् । उनले २०४८ पछि सार्वजनिक पदधारण गरेका सबैको सम्पत्ति छानबिनको माग गर्दै आएका छन् । तर, उनको मागअनुसार सरकारले सम्पत्ति छानबिन गर्न कुनै विशेष समिति गठन गरेको छैन ।
लिङ्देनले आफूलाई भ्रष्टाचार विरोधी नेताको रूपमा चिनाउन खोज्दै आएका छन् । ‘भ्रष्टाचार गर्नु भनेको आमको रगत खानुजस्तै हो’ भन्ने उनको भ्रष्टाचारविरोधी नारा नै छ । तर, उनकै दलका उपाध्यक्ष विक्रम पाण्डे बहुचर्चित सिक्टा सिँचाइ आयोजनामा भ्रष्टाचारी ठहरिएका थिए । उनकै दलकी सांसद गीता बस्नेत सहकारी ठगी आरोप लागेपछि फरार छिन् ।
यति हुँदाहुँदै अध्यक्ष लिङ्देनले ठूला दलका नेताहरू सम्पत्ति शुद्धीकरण मुद्दाले नजोगिने भनेका हुन् । उनले भ्रष्टाचार बढ्नुलाई राजनीतिक व्यवस्थासँग जोडेका छन् । उनले भने, ‘अहिलेको व्यवस्थाले भ्रष्टाचारलाई झन्झन् संरक्षण गरेको छ । त्यही भएर अब देशका लागि राजासहितको प्रजातन्त्र र हिन्दू राष्ट्र अपरिहार्य भइसक्यो ।’
विरोधसभाका राप्रपाको निर्देशन समितिका अध्यक्ष डा. प्रकाशचन्द्र लोहनीले ओली, कांग्रेस सभापति शेरबहादुर देउवा र माओवादी अध्यक्ष दाहालसँग भ्रष्टाचार गरेको छैन र नेपालबाहिर कुनै पैसा राखेको छैन भनेर नेपालको संसद्मा उभिएर नेपाली जनतालाई भन्ने नैतिक हिम्मत नभएको बताए । उनले प्रधानमन्त्री ओलीको नेतृत्व र कार्यशैलीका कारण प्रजातन्त्र खतरामा परेको दाबी गरे ।
राप्रपा प्रवक्ता ज्ञानेन्द्र शाहीले पनि भ्रष्टाचारीको दिन गन्ती सुरु भएको बताएका थिए । राप्रपाले अब जनताको पक्षमा जस्तोसुकै कदम चाल्न तयार रहेको बताउँदै उनले भ्रष्टाचारमा संलग्न उच्च राजनीतिक नेतृत्वलाई छानबिनको दायरामा ल्याउन, छानबिन गर्न दबाब दिन, सहकारी पीडितहरुको बचत फिर्ता गराएरै छाड्ने बताए ।
