- चीनसँग पछिल्लो पटक गरिएको बिआरआई फ्रेमवर्कमा गगन थापाको विशेष भूमिका रहेकोले पनि प्रधानमन्त्री केपी शर्मा ओली उनीप्रति सकारात्मक
- गगनले अर्थ पाए उपप्रधान तथा अर्थमन्त्री विष्णु पौडेललाई गृहमन्त्रालयको जिम्मेवारी दिने तयारी
- मन्त्री हेरफेरसहितको एजेन्डा रहेको भनिएको बिहीबारको मन्त्रिपरिषद् स्थगित
- विष्णु पौडेल बैंककमा
काठमाडौं– उपप्रधान तथा अर्थमन्त्री विष्णु पौडेल यतिबेला थाइल्यान्डको बैंककमा छन् । एसिया प्रशान्त क्षेत्रको विकासका लागि वित्त पोषणसम्बन्धी उच्चस्तरीय क्षेत्रीय परामर्श कार्यक्रममा सहभागी पौडेल व्यस्त भैरँहदा उनको मन्त्रालयको नेतृत्व भने परिवर्तनको तयारी भइरहेको छ ।
पौडेल बैंककमा व्यस्त हुँदा अर्थमन्त्रीमा कांग्रेस महामन्त्री गगन थापाको नाम फेरि चर्चामा आएको हो । पटकपटक झैं यसपटक पनि महामन्त्री थापाको नाम अबको अर्थमन्त्रीका रुपमा चर्चामा आएको हो । कांग्रेस स्रोतका अनुसार थापाले धेरैअघिबाट अर्थमन्त्री बन्ने रहर गरिरहेका छन् । ‘पछिल्लो दिन महामन्त्रीज्यू जसरी पनि अर्थमन्त्री बन्ने भनेर लागिरहनुभएको छ,’ कांग्रेस स्रोतले भन्यो ।
थापाले आफू अर्थमन्त्री बन्न अर्थतन्त्र सुधारका विषयमा पनि अभिव्यक्ति दिन थालेका छन् । चीनसँग पछिल्लो पटक गरिएको बिआरआई फ्रेमवर्कमा थापाको विशेष भूमिका रहेकोले पनि प्रधानमन्त्री केपी शर्मा ओली उनीप्रति सकारात्मक रहेको बताइएको छ । ‘बिआरआई फ्रेमवर्क सम्झौता गर्ने बेला गगन थापाले दिनरात नभनी प्रधानमन्त्री ओलीसँग काम गरेका छन् । उनी अर्थमन्त्री नबने सरकार ढल्ने सम्मको कुरा छ,’ कांग्रेस स्रोतले भन्यो ।
यसअघि पनि थापाले अर्थतन्त्र सुधारबारे विभिन्न मञ्चहरुबाट सरकारलाई सुझाव दिँदै आइरहेका छन् । त्यसो त थापा अर्थमन्त्री बन्ने हल्ला यसअघि पनि नचलेको होइन । २०७९ को निर्वाचनयता थापा अर्थमन्त्री बन्ने चर्चा लगातार चलेको हो । यसपटक भने सरकारमा सहभागी भएका मन्त्रीहरुको कमजोरी देखाउँदै कांग्रेसमा थापानिकट नेताहरुले मन्त्री फेरबदल गर्नुपर्ने दबाब दिइरहेका छन् ।
पौडेललाई गृहमा लैजाने तयारी
अर्थ गगनले पाएमा पौडेललाई गृहमन्त्रालयको जिम्मेवारी दिने तयारी रहेको कांग्रेसका नेताहरु बताउँछन् । अहिले प्रधानमन्त्री ओली अर्थमन्त्री पौडेलसँग रुष्ट छन् । ‘अर्थतन्त्र खस्कँदो अवस्थामा पुग्दा विष्णु पौडेलले कुनै पर्फमेन्स दिन नसकेको प्रधानमन्त्री कार्यालयको बुझाई छ,’ एमाले स्रोतले भन्यो । कार्यसम्पादन सम्झौताअनुसार पौडेलको काम नभएको तर गुट व्यवस्थापन गर्ने क्रममा उनलाई सरकारबाट हटाउन ओलीलाई गाह्रो हुने भएकोले गृहमा सार्ने तयारी भएको बताइएको छ ।
यता अहिलेका गृहमन्त्री रमेश लेखकको पनि प्रस्तुति निकै कमजोर रहेको आरोप छ । ‘गृहमन्त्रीजस्तो मान्छे, कुनै एक्सन छैन, आलटाल गर्ने काममा गृहमन्त्री लेखक निकै अगाडि छन्,’ कांग्रेसका एक नेताले भने । त्यसैले पनि पछिल्लो समय लेखकलाई मन्त्रिपरिषद्बाट कांग्रेस सभापति शेरबहादुर देउवाले नै बिदा दिने तयारी गरेको ती नेताको दाबी रह्यो ।
रविमाथि कारबाहीको जस लिँदै थापा
राष्ट्रिय स्वतन्त्र पार्टी (रास्वपा)का सभापति रवि लामिछाने सहकारी ठगी आरोपमा अहिले कास्की प्रहरीको कारागारमा छन् । कात्तिक २ गते प्रहरीले लामिछानेलाई काठमाडौंबाट नियन्त्रणमा लिएर पोखरा लगेको थियो । उनी पक्राउबारे कांग्रेसमा धेरैले महामन्त्री थापालाई नै जस दिन्छन् । थापाकै प्रयासमा सहकारीको मुद्दा स्थापित भएको कांग्रेस सभापति शेरबहादुर देउवाले समेत बताएका थिए ।
‘सहकारीसम्बन्धी कुरा हाम्रो महामन्त्री गगनकुमार थापाले धेरै अध्ययन गरेर भन्नुभएको रहेछ । उहाँलाई धन्यवाद दिन चाहन्छु । मैले वास्तवमा पत्याएकै थिइनँ, यस्तो छ भनेर,’ असोज २ गते सानेपामा आयोजित कार्यक्रममा देउवाले भनेका थिए ।लामिछाने सहकारी प्रकरणमा मुछिएको विषयलाई स्थापित गर्न महामन्त्री थापाले सदनमा निरन्तर प्रयास गरेका थिए । यसैले पनि उनले अहिले अर्थमन्त्री पाउनुपर्ने उनीनिकट नेताहरु बताउँछन् । ‘महामन्त्रीले निकै दुःख गर्नुभएको छ । अहिले फ्रन्टलाइनमा उहाँ नै देखिनुहुन्छ,’ थापानिकट एक केन्द्रीय सदस्यले भने, ‘ढिलोचाँडो उहाँ अर्थको नेतृत्वमा पुग्नुहुन्छ ।’ बिआरआई सम्झौताले पनि गगनको सम्भावना थप बढेको ती केन्द्रीय सदस्यले दाबी गरे ।
मन्त्रिपरिषद् बैठक अन्तिममा स्थगित
यसैगरी बिहीबार दिउँसो ४ बजे बस्ने गरी तोकिएको मन्त्रिपरिषद् बैठक स्थगित भएको छ । प्रधानमन्त्री ओलीको स्वास्थ्य कारण देखाउँदै बैठक स्थगित गरिएको हो । बिहीबार बिहान ओलीको त्रिवि शिक्षण अस्पतालमा इन्डोस्कोपी गरिएको थियो । स्वास्थ्य जाँचका क्रममा ओलीलाई इन्डोस्कोपी गरिएको उनका निजी चिकित्सक दिव्या सिंहले बताइन् । परराष्ट्रमन्त्री आरजु राणा देउवा भारतको नयाँ दिल्लीमा र अर्थमन्त्री पौडेल बैंककमा भएकाले पनि मन्त्रिपरिषद् बैठक स्थगित गरेको बताइएको छ । बिहीबारको मन्त्रिपरिषद्मा मन्त्री हेरफेरको विषयसमेत समावेश रहेको बताइएको छ ।
