काठमाडौं– नेकपा एमालेका अध्यक्ष केपी शर्मा ओली अहिलेका प्रधानमन्त्री हुन् । उनै ओलीको दल एमालेले मंसिर ७ गते दरबारमार्गमा परेड खेल्न लागेको छ ।सुरुमा भृकुटीमण्डप तय भएको यो परेडको नाम ‘जागरणसभा’ राखिएको छ । एमालेले यो सभामा एक लाख मानिस उतार्ने जनाएको छ ।
भद्रकाली हुँदै दरबारमार्ग पुगेर सभा गर्ने कार्यतालिका बुधबारमात्र बनेको जागरणसभाका संयोजक राजन भट्टराईले बताए । कुप्रचार र गलत सूचनाविरुद्ध एमालेले यस्तो परेड खेल्न लागेको उनको भनाइ छ ।कार्यक्रमलाई प्रधानमन्त्री ओलीले सम्बोधन गर्ने कार्यतालिका रहेको छ । पछिल्ला दिन प्रधानमन्त्री ओलीमाथि नकारात्मक टीप्पणी बढ्न थालेपछि पार्टीले यस्तो भ्रम चिर्न कार्यक्रम गर्न लागिएको भट्टराईको दाबी छ । भट्टराई आफैं भने कैलाश ढुंगेललाई संयोजकको जिम्मेवारी दिँदै बुधबार एक कार्यक्रमका लागि कम्बोडियातिर उडेका छन् ।
राष्ट्रिय स्वतन्त्र पार्टी (रास्वपा)का केन्द्रीय सदस्य गणेश कार्कीले एमालेको सभा हास्यस्पद भएको तर्क गरेका छन् । ‘देशमा अराजकता छ । प्रधानमन्त्री केपी ओलीले देशमा भइरहेको अराजकता रोक्न सकेनन् भनेर प्रधानमन्त्री केपी ओलीलाई तर्साउन एमाले अध्यक्ष केपी ओलीले सडकमा शक्ति प्रदर्शन गर्दै छन्,’ कार्कीले भनेका छन्, ‘एमालेले गर्न लागेको सडक प्रदर्शनको अभिधा हास्यास्पद छ । लक्षणा लज्जास्पद छ । र व्यञ्जना, दीर्घकालका लागि खतरनाक छ ।’
प्रधानमन्त्री केपी ओलीले देशमा बढ्दो अराजकता रोक्न सकेनन् भनेर उनलाई तर्साउन एमाले अध्यक्ष केपी ओलीले सडकमा शक्ति प्रदर्शन गर्दै छन् ।
गणेश कार्की
सदस्य, रास्वपा
मंसिर १६ को निर्वाचनलाई लक्षित गर्न भनिए पनि एमाले अहिले छिमेकी देश भारत, सत्ता सहयात्री नेपाली कांग्रेस, नेकपा माओवादी केन्द्र, रास्वपा सबैलाई ‘साइज’मा राख्न आफ्नो शक्ति प्रदर्शन गर्न चाहेको देखिन्छ । भारतले ओलीलाई प्रधानमन्त्रीको रुपमा मन पराएको छैन । जसकारण उनलाई भ्रमणको निम्तो आइरहेको छैन । चीन उड्न लाग्दा चीन सरकारको परियोजना बेल्ट एण्ड रोड एनिसियटिभ्स (बिआरआई)मा कांग्रेसले अप्ठेरो पारिरहेको छ । नेकपा माओवादी केन्द्रका अध्यक्ष पुष्पकमल दाहाल दैनिकजसो सरकार ढल्न लागेको भन्दै अभिव्यक्ति दिँदै हिँडिरहेका छन् । यता रास्वपाले आफ्नो सभापति रवि लामिछाने पक्राउको मुख्य दोष ओलीमाथि लगाइरहेका छन् । हुँदाहुँदा ओलीमाथि व्यवसायी दुर्गा प्रसाईंले समेत कम्बोडियाको टेलिकममा लगानी भएको आरोप लगाएका छन् ।
आफूले काम गर्न नसकेर सडकबाट जनता तर्साउन खोज्नु गम्भीर विषय भएको रास्वपाका कार्यवाहक प्रवक्ता मनिष झा बताउँछन् । ‘सत्ता पक्षले डेलिभर गर्ने हो । उहाँहरुले सडकमा आएर जनप्रदर्शन गर्ने रे ?,’ झाले भने, ‘सरकारको नेतृत्वले जनताको दैनिकी बिगारेर तर्साउँछु भनेर हुन्छ ?’
एमालेले भने देशमा सब ठीकठाक नभए पनि विस्तारै भइरहेको बताएको छ । यसबारे बुझाउन पनि एमाले सडकमा आउन लागेको एमालेका उपमहासचिव प्रदीप ज्ञवालीले बताए । ‘समाधान डेलिभरी नै हो । तर डेलिभरी भइरहेको छ भन्ने कुरा मान्छेले बुझ्नै चाहेन भने बुझाउन सकिएन भने डेलिभरीबाट जाग्नुपर्ने आशा पनि जाग्दैन,’ ज्ञवालीले बुधबार सञ्चारकर्मीहरुसँग भने ।
देश बर्बाद हुँदै छ भन्ने निराशाको खेती गर्ने प्रयत्न भइरहेको छ, त्यसमा केही बोल्नुपर्छ भन्ने हो । सडक कब्जा गर्ने उद्देश्य होइन, तर्साउन पनि होइन ।
प्रदीप ज्ञवाली
उपमहासचिव, नेकपा एमाले
उनले एमालेले सडक कब्जा गर्न लागेको नभई निराशाको खेती चिर्ने प्रयासमात्र हुने बताए । ‘भइरहेका कुराहरुलाई सम्पूर्ण रुपले पर्दा लगाएर देश बर्बाद भइरहेको छ भन्ने निराशाको खेती गर्ने प्रयत्न भइरहेको छ, त्यसमा केही बोल्नुपर्छ भन्ने हो । सडक कब्जा गर्ने उद्देश्य होइन,’ उनले भने । दरबारवादी शक्तिदेखि विभिन्न शक्ति यहीबेला सल्बलाइरहेकोले यसविरुद्ध शक्ति प्रदर्शन पनि भएको एमालेका नेताहरुको भनाई छ ।
अकुपाई दरबारमार्ग
पछिल्लोसमय एमाले अध्यक्ष ओलीले आफ्नो पार्टीको सभाहरु दरबारमार्गमै गर्न लागेका छन् । गत संविधान सभा दिवसमा ओलीले आफू प्रधानमन्त्रीकै रुपमा सहभागी हुन दरबारमार्गमा नेसनल डे कन्सर्ट आयोजना गर्न लगाएका थिए । संविधान जारी भएयता यसरी सडकमा पहिलो कार्यक्रम सरकारीस्तरबाट आयोजना भएको थियो ।
ओली २०७७ माघ २३ गते पनि दरबारमार्गमा शक्ति प्रदर्शनमा उत्रिएका थिए यसैगरी । तत्कालीन नेकपा छाडेर पुष्पकमल दाहाल र माधव नेपाल हिँडेपछि ओलीले दरबारमार्गमा शक्ति प्रदर्शन गरेका थिए । त्यतिबेला ओलीले सडकमा आफ्नो डमीसमेत राख्न लगाएका थिए । यसरी हेर्दा ओलीको दरबारमार्गप्रेम बढ्दो देखिएको कतिपय बताउँछन् ।
