- अर्थतन्त्र सुधारका विषयमा अभिव्यक्ति बढाउँदै कांग्रेस महामन्त्री थापा
- नेकपा एमालेको नेतृत्वलाई लक्षित गर्दै सरकारले वृद्धभत्तादेखि विभिन्न कार्यक्रम घोषणा गर्दा ढुकुटीको पैसा रित्तिएको थापाको दाबी
- २०७९ को निर्वाचनयता थापा अर्थमन्त्री बन्ने चर्चा लगातार चल्दै आएको छ
काठमाडौं– नेपाली कांग्रेसका महामन्त्री गगन थापा जसरी पनि मन्त्री बन्ने होडमा छन् । कांग्रेस स्रोतका अनुसार थापाले अर्थमन्त्री बन्ने रहर गरिरहेका छन् । ‘पछिल्लो दिन महामन्त्रीज्यू जसरी पनि अर्थमन्त्री बन्ने भनेर लागिरहनुभएको छ,’ कांग्रेस स्रोतले भन्यो ।
थापाले अर्थतन्त्र सुधारका विषयमा अभिव्यक्ति दिन थालेका छन् । शनिबारमात्र सिन्धुपाल्चोकको चौतारा पुगेर उनले देशको अर्थतन्त्र नसुध्रिएको बताएका थिए । ‘हाम्रो अर्थतन्त्र जुन अवस्थामा हुनुपर्ने हो त्यो छैन,’ थापाले भने । नेकपा एमालेको सरकारले वृद्धभत्तादेखि विभिन्न कार्यक्रम घोषणा गरेकोतर्फ लक्षित गर्दै थापाले ढुकुटीको पैसा बाँड्दाबाँड्दा रित्तो हुन पुगेको तर्क गरे ।
‘सरकारले धमाधम एकपछि अर्को घोषणा गर्न थाल्यो । कसैले यति वर्षको उमेरदेखि भत्ता दिन्छु भन्यौं । कसैले यसलाई भत्ता दिन्छु भन्यौं,’ थापाले भने, ‘अनि सरकारको खुत्रुकेको रकम घट्यो ।’यसअघि पनि थापाले अर्थतन्त्र सुधारबारे विभिन्न मञ्चहरुबाट सरकारलाई सुझाव दिँदै आइरहेका छन् । त्यसो त थापा अर्थमन्त्री बन्ने हल्ला यसअघि पनि नचलेको होइन । २०७९ को निर्वाचनयता थापा अर्थमन्त्री बन्ने चर्चा लगातार चलेको हो । यसपटक भने सरकारमा सहभागी भएका मन्त्रीहरुको कमजोरी देखाउँदै कांग्रेसमा थापानिकट नेताहरुले मन्त्री फेरबदल गर्नुपर्ने दबाब दिइरहेका छन् ।
रविमाथि कारबाहीको जस लिँदै थापा
राष्ट्रिय स्वतन्त्र पार्टी (रास्वपा)का सभापति रवि लामिछाने सहकारी ठगी आरोपमा अहिले कास्की प्रहरीको कारागारमा छन् । कात्तिक २ गते प्रहरीले लामिछानेलाई काठमाडौंबाट नियन्त्रणमा लिएर पोखरा लगेको थियो । उनी पक्राउबारे कांग्रेसमा धेरैले महामन्त्री थापालाई नै जस दिन्छन् । थापाकै प्रयासमा सहकारीको मुद्दा स्थापित भएको कांग्रेस सभापति शेरबहादुर देउवाले समेत बताएका थिए ।
‘सहकारीसम्बन्धी कुरा हाम्रो महामन्त्री गगनकुमार थापाले धेरै अध्ययन गरेर भन्नुभएको रहेछ । उहाँलाई धन्यवाद दिन चाहन्छु । मैले वास्तवमा पत्याएकै थिइनँ, यस्तो छ भनेर,’ असोज २ गते सानेपामा आयोजित कार्यक्रममा देउवाले भनेका थिए ।लामिछाने सहकारी प्रकरणमा मुछिएको विषयलाई स्थापित गर्न महामन्त्री थापाले सदनमा निरन्तर प्रयास गरेका थिए । यसैले पनि उनले अहिले अर्थमन्त्री पाउनुपर्ने उनीनिकट नेताहरु बताउँछन् । ‘महामन्त्रीले निकै दुःख गर्नुभएको छ । अहिले फ्रन्टलाइनमा उहाँ नै देखिनुहुन्छ,’ थापानिकट एक केन्द्रीय सदस्यले भने, ‘ढिलोचाँडो उहाँ अर्थको नेतृत्वमा पुग्नुहुन्छ ।’
पछिल्ला दिनहरुमा मन्त्री हेरफेरको चर्चा पनि बढ्दो छ । उद्योगमन्त्री दामोदर अधिकारी, पर्यटनमन्त्री बद्री पाण्डेसहित एमाले र कांग्रेसबाट तीन÷तीन जना मन्त्री हटाउनेबारे कांग्रेस सभापति देउवा र प्रधानमन्त्री केपी शर्मा ओलीबीच पटक–पटक भेटवार्ता भइसकेको बताइएको छ । सोमबार साँझ प्रधानमन्त्री ओलीसँग भेट्न देउवा बालुवाटार पुगेको प्रधानमन्त्रीको सचिवालयको दाबी थियो । यसबारे बुझ्दा देउवाका स्वकीय सचिव भानु देउवाले भने कुनै भेट नभएको बताए । ‘सभापतिज्यू घरमै हुनुहुन्छ । बालुवाटार जानुहुन्न । जाने कुनै कार्यक्रम पनि छैन,’ सोमबार साँझ उनले प्रभावसँग भने ।
सरकार हेरफेरको विषयमा कुनै छलफल नभएको प्रधानमन्त्रीको सचिवालयले जनायो । ‘बाहिर हल्ला चलाएजस्तो मन्त्रिपरिषद् हेरफेरको कुनै तयारी छैन । हरेक मन्त्रीसँग प्रधानमन्त्रीले कार्ययोजना सम्झौता गर्नुभएको छ । त्यहीअनुसार धमाधम काम हुँदै छ,’ प्रधानमन्त्री सचिवालयले जनायो । देउवा आफैं पनि अहिले नै मन्त्री हेरफेरको पक्षमा नरहेको बालुवाटार स्रोतको दाबी रह्यो । देउवानिकट स्रोतले भने महामन्त्री थापा आफंैले मन्त्री बन्नका लागि चर्चा चलाउने गरेको आरोप लगाए ।
यसअघि शुक्रबारमात्र पर्यटन मन्त्रालय पुगेर थापाले हवाई क्षेत्रमा भइरहेको अनियमितताबारे आफ्नै सहमहामन्त्री बद्री पाण्डेको ध्यानाकर्षण गराएका थिए । मन्त्री पाण्डे पछिल्लोपटक क्यासिनो लाइसेन्सका कारण विवादमा छन् । उनलाई कांग्रेसकै सांसद राजेन्द्र बजगाईंले भ्रष्टचार गरेको आरोप लगाएका हुन् ।
