काठमाडौं– नेपाली कांग्रेसका सांसद राजेन्द्र बजगाइँ संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेलाई जसरी पनि सरकारबाट हटाउने जोडबलमा लागेका छन् । माइतीघरमा एक्लै आन्दोलन गरेर होस् या ट्वीटरको स्पेसमा बोलेर, बजगाइँले पाण्डेलाई हटाउनैपर्ने एकसुत्रे मागमा लागेका हुन् ।
कांग्रेस–एमालेको गठबन्धन सरकार बनेपछि पाण्डेलाई सरकारमा पठाउन नहुने भन्दै रोक्ने जोडबलमा बजगाइँ लागेका थिए । ‘बद्रीजी खाली कोटामा बसेर कहिले सहमहामन्त्री, कहिले सांसद सबै भइसक्नुभएको छ, अब फेरि कोटामा मन्त्री हुनुहुन्न भन्ने मेरो तर्क हो,’ बजगाइँले भन्दै आएका छन्, ‘उहाँभन्दा सक्षम सांसद कांग्रेसमा धेरै छन् ।’ पाण्डे कांग्रेसको १४औं महाधिवेशनमा पिछडिएको क्षेत्र कोटाबाट सहमहामन्त्रीमा निर्वाचत भएका हुन् ।
पाण्डे र बजगाइँ दुवै कांग्रेसकै नेता हुन् । कुनै बेला महामन्त्री गगन थापा गुटमा रहेका बजगाइँ पछिल्लो समय शेखर कोइरालानिकट छन् । पाण्डे शेखरकै कोटामा कांग्रेसबाट मन्त्री बनेका हुन् ।बजगाइँले मन्त्री पाण्डेविरुद्ध कात्तिक १३ गते साँझ ट्वीटरमा झण्डै एक घण्टा धाराप्रवाह बोलेका थिए । आफूजस्ता कैयन् सक्षम सांसद हुँदासमेत पाण्डेलाई मन्त्री बनाएको भन्दै उनले असन्तुष्टि पोखेका थिए ।
एक क्यासिनो सञ्चालकले भैरहवाको क्यासिनो अनुमतिका लागि पर्यटनमन्त्री पाण्डेलाई करोड रकम दिएको बताएका छन् । उक्त विषयमा कांग्रेसकै नेताहरुबाट ‘भेरिफाइ’ भइसक्यो ।
राजेन्द्र बजगाइँ
सांसद, नेपाली कांग्रेस
बजगाइँ त्यसपछि माइतीघरमा आन्दोलनमा उत्रिए । आन्दोलनमा कसैले साथ नदिएपछि उनले मन्त्री पाण्डेलाई घूस खाएको आरोप लगाएका छन् । मंगलबार सामाजिक सञ्जालमा मन्त्री पाण्डेले घूस खाएको आरोप लगाउँदै बजगाइँले लेखेका छन्– एक क्यासिनो सञ्चालकले भैरहवाको क्यासिनो अनुमतिका लागि पर्यटनमन्त्री पाण्डेलाई करोड रकम दिएको बताएका छन् ।
उक्त विषयमा कांग्रेसकै नेताहरुबाट ‘भेरिफाइ’ भइसकेको बजगाइँको दाबी छ । नेपाल नागरिक उड्डयन प्राधिकरणका महानिर्देशक प्रदीप अधिकारीलाई हटाउने पक्षमा सभापति शेरबहादुर देउवा रहे पनि मन्त्री पाण्डेले बचाउ गरेको बजगाइँको तर्क छ । बजगाइँले पाण्डेलाई मन्त्री बन्नसाथ घर किनेको आरोपसमेत लगाएका छन् ।
आफूमाथि लगातार प्रहार हुन थालेपछि मन्त्री पाण्डेले मनोबल गिराउनेगरी प्रचार गरेको भन्दै आफूले घूस नखाएको दाबी गरे । ‘म राष्ट्रदेव पशुपतिनाथको अगाडि उभिएर के कसम खान सक्छु भने कुनै पनि नाममा मैले मन्त्री भएर घूस खाएको सुन्नुपर्यो र देख्नुपर्यो भने मेरो त्यहीबेला नाश होस्,’ मंगलबार नेपाल विद्याश्रम संस्कृत माध्यमिक विद्यालयको स्वर्ण महोत्सवका अवसरमा राजधानीमा आयोजित कार्यक्रममा पाण्डेले भने ।
म पशुपतिनाथको अगाडि उभिएर के कसम खान सक्छु भने कुनै पनि नाममा मैले मन्त्री भएर घूस खाएको सुन्नुपर्यो र देख्नुपर्यो भने मेरो त्यहीबेला नाश होस् ।
बद्री पाण्डे
मन्त्री, पर्यटन
उनले आफूले घूस खाएको विषय पुष्टि गर्नसमेत चुनौती दिए । ‘करोड खाएको कुरा केही अनलाइनहरुलाई प्रयोग गरेर, केही बिचौलियाका मतियारहरुले आरोप लगाएका छन्, करोड त के कौडी खाएको पुष्टि गरेको दिन म पशुपतिको ढोकामा आएर आत्महत्या गर्न आत्मविश्वास लिएर राजनीतिमा आएको हुँ,’ पाण्डेले भने ।
छानबिन गर्न एमाले नेताको माग
सत्तारुढ दल नेकपा एमालेका नेता कर्ण थापाले करोड घूस खाएको आरोप लागेको पर्यटनमन्त्री पाण्डेमाथि छानबिन हुनुपर्ने माग गरेका छन् । कसैले भनेको भरमा दोषी किटान गर्नुभन्दा यसको न्यायिक छानबिन हुनुपर्ने उनले बताए ।
‘आरोप तथ्यमा आधारित हुनुपर्दछ । कसैले भनेका भरमा दोषी वा निर्दोष किटान गर्नु उचित हुँदैन । यसमा पक्ष विपक्षमा लाग्नु पनि ठीक हुँदैन । निष्पक्ष छानबिन गरेरमात्रै यसको निरूपण हुनसक्छ,’ मंगलबार थापाले भनेका छन्, ‘छानबिनबाट दोषी देखिए दण्डित गर्ने र निर्दोष देखिए ससम्मान सफाइ दिइनु न्याय र लोकतन्त्रसम्मत हुने छ । सबैलाई मेरो अनुरोध छ । न्यायिक छानबिनको माग गरौं ।’ गत प्रतिनिधिसभा निर्वाचनमा थापा पाण्डेसँग पराजित भएका थिए ।
कांग्रेसबाट कमजोर मन्त्रीको सूचीमा
एमाले अध्यक्ष केपी शर्मा ओली नेतृत्वको सरकारमा कांग्रेसबाट दुई राज्यमन्त्रीसहित नौ जना मन्त्री छन् । जसको नेतृत्व प्रकाशमान सिंहले गरेका छन् । यी मन्त्रीमध्ये संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेको प्रस्तुति निकै कमजोर भएको कांग्रेसभित्र चर्चा छ । यद्यपि, गत साउनमा भने मन्त्रिपरिषद्मा स्वास्थ्यमन्त्री प्रदीप पौडेलभन्दा वरीयतामा मुनि रहेका पाण्डेलाई माथि तानिएको थियो । वरीयता हेरफेरमा १६ मा रहेका पाण्डेलाई १४ मा उकाल्दै पौडेललाई १६ मा लगिएको थियो ।
गत भदौ १६ गते कांग्रेस सभापति शेरबहादुर देउवाले पाण्डेलाई काम गर्न नसके मार्गप्रशस्त गर्न भनेका थिए । मन्त्रालयमा एमालेका कर्मचारीले काम गर्न नदिएको गुनासो लिएर देउवाकहाँ पुगेका पाण्डेलाई देउवाले भनेका थिए, ‘काम गर्न नसके छोड्नुस् । अर्को जान्छन् ।’ देउवाले पछिल्लोपटक ऊर्जामन्त्री दीपक खड्का, पर्यटनमन्त्री पाण्डे र स्वास्थ्यमन्त्री पौडेललाई हटाउने तयारी गरेका छन् । एमालेबाट उद्योगमन्त्री दामोदर अधिकारी, यातायातमन्त्री देवेन्द्र दाहाल र गरिबी निवारणमन्त्री बलराम अधिकारीको नाम सरकारबाट ‘आउट’ गर्नुपर्नेको सूचीमा रहेको बताइन्छ ।
