काठमाडौं– मंसिर १६ गते देशभरका विभिन्न स्थानीय तहमा रिक्त भएका ४४ स्थानमा स्थानीय तहको उपनिर्वाचन हुँदैछ । ती तहमा प्रमुख राजनीतिक दलहरुले उम्मेदवार घोषणा थालेको छ ।काठमाडौंको कीर्तिपुर नगरपालिकामा नेकपा एमालेले केन्द्रीय सदस्य डा सुरेन्द्र मानन्धरलाई उम्मेदवार बनाउने भएको छ । यता माओवादी केन्द्रले प्राडा शिवशरण महर्जनलाई उम्मेदवार घोषणा गरेको छ । महर्जन ०७९ को स्थानीय तह चुनावमा कांग्रेसका राजकुमार नकर्मीसँग पराजित भएका थिए । कांग्रेसले भने यहाँ उम्मेदवार चयन गर्न सकेको छैन ।
मेयरको उम्मेदवारका बन्न कांग्रेस नगर समितिले ११ जनाको नाम सिफारिस गरी क्षेत्रीय कमिटीमा पठाएको छ । सिफारिसमा नगर सभापति कृष्णमान डंगोलको नाम पहिलो नम्बरमा छ । त्यस्तै, राप्रपाले इन्जिनियर ध्रुव महर्जनलाई उम्मेदवार बनाउने घोषणा गरिसकेको छ । पहिलोपटक स्थानीय निर्वाचनमा भाग लिन लागेको राष्ट्रिय स्वतन्त्र पार्टीले उम्मेदवार चयन गर्न सकेको छैन ।
ग्रामथानमा माओवादीबाट माझी, कांग्रेसबाट बलराम
मोरङको ग्रामथानमा नेपाली कांग्रेसले बलराम सरदारलाई उम्मेदवार बनाउने निर्णय गरेको छ । बिहीबार बसेको जिल्ला संसदीय समितिको बैठकले उनको नाम टुंगो लगाएको मोरङ–४ का क्षेत्रीय सभापति विनोद बस्नेतले बताए । यहाँ माओवादी केन्द्रले अध्यक्षमा नमोनारायण माझीलाई उम्मेदवार बनाउने घोषणा गरेको छ । माझी केही समय अगाडि नेपाली कांग्रेस छोडेर माओवादी केन्द्रमा प्रवेश गरेका थिए ।
उनी ०७४ सालमा फोरम लोकतान्त्रिकबाट ग्रामथान गाउँपालिकाको १ नम्बर वडाको वडाध्यक्षमा निर्वाचित भएका थिए । यस्तै २०७९ सालको निर्वाचनमा स्वतन्त्र रूपमा सोही वडाको अध्यक्षमा उम्मेदवार बनेका उनी तेस्रो बनेका थिए । यहाँ कांग्रेस, एमालेले भने उम्मेदवारबारे निर्णय गरिसकेको छैन ।
महाबुमा कांग्रेसबाट झलक
नेपाली कांग्रेसले दैलेखको महाबु गाउँपालिकामा झलकबहादुर भण्डारीलाई उम्मेदवार बनाउने निर्णय गरेको छ । जिल्ला संसदीय समितिको बिहीबारको बैठकले भण्डारीलाई उम्मेदवार बनाउने निर्णय गरेको कांग्रेस दैलेखका सभापति मणिराम रेग्मीले बताए । यहाँ एमाले र माओवादीले उम्मेदवारको टुंगो लगाएको छैन ।
नेकपा एमालेले जाजरकोटको नलगाड नगरपालिकाको उपमेयरका लागि सुनिता बोहोरालाई उम्मेदवार बनाउने निर्णय गरेको छ । यहाँ कांग्रेसले इन्द्राचन्द सिंहलाई उम्मेदवार बनाउने निर्णय गरेको छ । जाजरकोट केन्द्रविन्दु भई आएको भूकम्पमा परी नलगाड नगरपालिका उपप्रमुख सरिता सिंहको मृत्यु भएको थियो ।
दोलखाको गौरीशंकर गाउँपालिकाको उपाध्यक्षमा एमालेले उमा शेर्पालाई उम्मेदवार बनाउने भएको छ । कांग्रेसले पासाडिकी तामाङलाई अघि सारेको छ । त्यहाँ गत निर्वाचनमा कांग्रेस माओवादी गठबन्धनबाट श्याम तामाङले जितेका थिए । तामाङको हृदयाघातका कारण निधन भएपछि अहिले उपनिर्वाचन हुन लागेको हो ।
रास्वपाको उम्मेदवार बन्न फारम भर्नुपर्ने
राष्ट्रिय स्वतन्त्र पार्टी (रास्वपा)ले आफ्नो पार्टीको तर्फबाट उम्मेदवार बन्न फारम भर्न आह्वान गरेको छ । पार्टीले उम्मेदवारीका लागि आवेदन दिन ‘गुगल फारम’ वा निर्वाचन परिचालन समितिमा उपलब्ध आवेदन फारम भर्न समेत सूचना जारी गरेको छ । केन्द्रीय निर्वाचन संयोजन समितिबाट स्थानीय तह उपनिर्वाचनका लागि प्रारम्भिक निर्वाचन कार्यतालिका समेत तयार गरेको कार्यवाहक प्रवक्ता मनिष झाले बताए ।
संयोजक एवं प्रतिनिधिसभा सदस्य पराजुलीले आजदेखि उम्मेदवार आह्वान गरेर केही दिनमा टुंगो लगाउने बताए । पराजुलीका अनुसार उम्मेदवार छनोट सर्वसम्मत प्रक्रियाबाट टुंगो लगाइने छ । यदि एकभन्दा बढी आकांक्षी भएमा ‘प्राइमरी’ मतदानमार्फत उम्मेदवार चयन गरिने छ ।
यसैगरी रास्वपाले स्थानीय तहको उपनिर्वाचनका लागि सातै प्रदेशमा निर्वाचन परिचालनको जिम्मेवारी तोकेको छ । केन्द्रीय निर्वाचन संयोजन समितिका संयोजक गणेश पराजुलीको सभापतित्वमा बुधबार बसेको बैठकले प्रतिनिधिसभा सदस्य एवं केन्द्रीय सदस्यहरुलाई निर्वाचन परिचालनको जिम्मेवारी तोकेको कार्यवाहक प्रवक्ता मनिष झाले जानकारी दिए ।
रास्वपाले कोशी प्रदेशमा निशा डाँगीलाई जिम्मेवारी तोकेको छ । डा चन्दा कार्कीलाई मधेश, शिशिर खनाललाई बागमती, विन्दाबासिनी कंसाकारलाई गण्डकी, केन्द्रीय सदस्य कुसुम महर्जनलाई लुम्बिनी, लिमा अधिकारीलाई कर्णाली र विष्णुकुमार श्रेष्ठलाई सुदुरपश्चिमको जिम्मेवारी तोकेको छ ।
