काठमाडौं– चालु आर्थिक वर्ष २०८१/८२ को दोस्रो महिना अर्थात् भदौमा वैदेशिक रोजगारीका लागि ५७ हजारभन्दा बढी नेपाली श्रमिक विदेशिएका छन् । वैदेशिक रोजगार विभागले सार्वजनिक गरेको विवरणअनुसार भदौ महिनामा ५७ हजार ४९३ जना नयाँ तथा पुनः श्रम स्वीकृति लिएर रोजगारीका लागि विभिन्न मुलुकमा गएका हुन् ।
विभागको तथ्यांकअनुसार भदौमा विदेशिने नेपालीहरुको संख्या गत साउन महिनाको भन्दा दुई हजारले कमी भएको छ । साउनमा ५९ हजार ५७५ जनाले वैदेशिक रोजगारीका लागि श्रम स्वीकृति लिएका थिए । विभागको तथ्यांकअनुसार नेपाली युवाहरु ९५ वटा मुलुकमा श्रम स्वीकृति लिएर रोजगारीका लागि गएका छन् ।
गत आवको अन्तिमसम्म पहिलो गन्तव्यको रुपमा रहेको संयुक्त अरब इमिरेट्स (युएई)ले चालु आवको सुरुआती महिनादेखि नै पहिलो स्थान ओगटेको छ । विभागको तथ्यांकअनुसार युएईमा जानका लागि भदौमा १८ हजार ६०५ जनाले श्रम स्वीकृति लिएका छन् ।
यस्तै भदौ महिनामा रोजगारीका लागि कतार जान ११ हजार २९१ जनाले श्रम स्वीकृति लिएका छन् । संख्याको हिसाबमा कतार दोस्रो स्थानमा परेको छ । त्यसैगरी तेस्रो स्थानमा परेको साउदी अरेबियामा १० हजार ८३५ जना श्रमिकले श्रम स्वीकृति लिएर रोजगारीका लागि पुगेको विभागले उल्लेख गरेको छ । गत आवदेखि नै साउदी र कतार जाने नेपालीको संख्या हाराहारीमा रहेको विभागको तथ्यांकले देखाएको छ ।
यस्तै चौथो गन्तव्यमा कुवेत रहेको छ । कुवेतका लागि चार हजार २१५ जना रोजगारीका लागि पुगेका छन् । यस्तै युरोपेली मुलुक रोमानिया पाँचौं स्थानमा परेको छ । जहाँ एक हजार ८८८ जना गएका छन् ।यसैगरी नेपालीहरुको प्रमुख गन्तव्यको रुपमा रहेको मलेसियामा भने नगन्य मात्रामा श्रमिकले श्रम स्वीकृति लिएका छन् । मलेसिया सरकारले गत मे अन्तिमबाट विदेशी कामदार लिन बन्देज गरेसँगै त्यहाँ जाने नेपालीको संख्या भदौमा एक हजार १९३ जनामात्रै रहेको छ ।
यद्यपि, विभागको तथ्यांकलाई हेर्दा उल्लिखित मुलुकहरुले नै नेपालको वैदेशिक रोजगारीको ठूलो हिस्सा (झण्डै ८० प्रतिशत बढी) ओगटेको देखिन्छ । यसैगरी जापान एक हजार ४५६, बहराइन ९६०, मोरिसस ८२२, माल्दिभ्स जान ७३८, क्रोएसिया ७०९, साइप्रस ६१२, ओमान जान ५०२ र जोर्डनका लागि ३३८ जनाले श्रम स्वीकृति लिएका छन् । त्यस्तै भदौ महिनामा इपिएस प्रणालीबाट दक्षिण कोरिया जाने नेपालीको संख्या एक हजार १०६ मात्रै रहेको छ ।
विभागबाट कूल श्रम स्वीकृति लिनेमध्ये पुनः श्रम स्वीकृति लिने १७ हजार ९३६ जना छन् भने पहिलोपटक विदेश जान श्रम स्वीकृति लिनेको संख्या ३९ हजार ५५७ जना रहेका छन् । चालु आवको दोस्रो महिनामा श्रम स्वीकृति लिनेमध्ये छ हजार ७२३ जना महिला श्रमिक रहेको विभागले उल्लेख गरेको छ । चालु आव सुरु भएसँगै वैदेशिक रोजगारीका लागि युरोपेली मुलुकमा जान श्रम स्वीकृति लिने नेपालीको संख्या घटेको विभागको तथ्यांकले देखाएको छ ।
यसरी श्रम स्वीकृति लिएर जानेहरुमा उच्च दक्षता भएकादेखि अदक्ष श्रमिक रहेको विभागले सार्वजनिक गरेको विवरणमा उल्लेख छ । भदौ महिनामा उच्च दक्षता हासिल गरेका ५५ जना र पेसागत दक्षता भएका ३०९ जना नेपालीहरु श्रम स्वीकृति लिएर रोजगारीको लागि विभिन्न मुलुकमा पुगेका छन् । वैदेशिक रोजगारीको क्रममा सबैभन्दा बढी दक्ष कामदार गएको विभागले जनाएको छ । यो संख्या ३७ हजार ७८३ रहेको छ । यस्तै अर्धदक्ष श्रमिकका रुपमा छ हजार १७५ जना बाहिरिएका छन् भने १३ हजार १७१ अदक्ष श्रमिक भदौ महिनामा विदेशिएका छन् ।
धेरै श्रमिक गएका १० मुलुक
युएई– १८,६०५
कतार– ११,२९१
साउदी– १०,८३५
कुवेत– ४,२१५
रोमानिया– १,८८८
जापान– १,४५६
मलेसिया– १,१९३
कोरिया– १,१०६
बहराइन– ९६०
मौरिसस– ८२२
