- एमाले नेतृत्वको सरकारविरुद्ध कांग्रेसको इतरसमूह
- एमालेबाट मन्त्री भएका सञ्चार र भूमिसुधार मन्त्रीको राजीनामा माग
- डा. शेखर कोइरालासँगै महामन्त्री गगन थापा सरकारविरुद्ध चर्किंदै
काठमाडौं– वर्तमान सत्ता गठबन्धनको मूल सूत्रधार मानिने नेपाली कांग्रेसका नेता डा. शेखर कोइरालाले नेतृत्व गरेको संस्थापनइतरसमूह सरकारविरुद्ध उभिन थालेको छ । यसअघि माओवादी केन्द्रका अध्यक्ष पुष्पकमल दाहाल नेतृत्वको गठबन्धन सरकार ढल्नु पहिले पनि उक्त समूह सरकारविरुद्ध उभिएको थियो ।
सातबुँदे समझदारीअनुसार ३० असारमा ओली नेतृत्वमा कांग्रेस सम्मिलित गठबन्धन सरकार बनेको हो । यति छोटो अवधिमै उक्त समूहका नेताहरू सरकारविरुद्ध उभिँदै एमालेका मन्त्रीहरूको राजीनामा माग्न थालेका छन् ।
गत शनिबार सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुुब्बा गुरुङले पोखरा पुगेर ‘प्रहरी महानिरीक्षक (वसन्तबहादुर कुँवर)को जिब्रो थुत्नुुपर्ने’ हिंसाप्रेरित अभिव्यक्ति दिएका थिए । त्यसविरुद्ध कांग्रेस सांसद शंकर भण्डारीले विज्ञप्ति निकालेर गुरुङलाई बर्खास्त गर्न माग गरिसकेका छन् । देशको शान्ति सुरक्षामा तलमाथि भए त्यसको जिम्मेवार प्रधानमन्त्री ओली हुने उनको चेतावनी छ ।
कांग्रेसनिकट सहकारीपीडितहरूले नेकपा एमालेबाट भूमि व्यवस्था, सहकारी तथा गरिबी निवारणमन्त्री भएका बलराम अधिकारीको पनि राजीनामा माग्दै आएका छन् । उनीहरूले पछिल्ला दिनमा काठमाडौंमा प्रदर्शन गरेका छन् । मन्त्री अधिकारीको पुत्लासमेत जलाए ।
बुधबार मन्त्री अधिकारीले बैंकबाट कम ब्याजमा रकम लिएर बढी ब्याज खान सहकारीमा पैसा राख्नेहरूले आन्दोलन गरेको आरोप लगाएका थिए । त्यसपछि कांग्रेसनिकट सहकारीपीडितहरूको निसानामा मन्त्री अधिकारी परे ।
यसबाहेक अघिल्लो साता सम्पन्न कांग्रेस केन्द्रीय समिति बैठकमा इतरसमूहका नेताहरू सरकारविरुद्ध चर्को सुनिए । समूहका मूल नेता डा. कोइरालाले त बैठकमा एमालेसँगको सत्ता सहकार्यले पार्टीलाई पुग्ने क्षतिबारे विश्लेषण नै सुनाएका थिए ।
इतरसमूहमै रहेका महामन्त्री गगन थापाले एमाले नेतृत्वको सरकार सफल बनाएर आगामी निर्वाचनमा एमालेसँगै प्रतिस्पर्धा गर्नुपर्ने अवस्था कांग्रेसका लागि चुनौतीपूर्ण रहेको औंल्याएका थिए । थापाको यो अभिव्यक्तिको घुमाउरो अर्थ एमालेसँगको गठबन्धनलाई निरन्तरता नदिउँ भन्ने बुझिएको बैठकमा सहभागी एक नेताले बताए ।
कांग्रेसको इतरसमूहका सांसदहरूबाट संसद्मै सरकारविरोधी अभिव्यक्तिसमेत सुनिन थालिएको छ । तर, एमाले सांसदहरूले प्रतिवाद गरेका छैनन् । बरु, उनीहरूले कुनै हालतमा यो गठबन्धन २०८४ सम्म जाने दाबी गर्दै आएका छन् ।यहीबीच प्रधानमन्त्री ओलीले दोहो¥याएर आफ्नो सत्ता सञ्चालनको अवधिबारे भनिरहेका छन् । कांग्रेसबाट गृहमन्त्री भएका रमेश लेखकले दुई दलबीच १७ असारमा भएको सत्ता सहकार्यको सातबुँदे समझदारी कार्यान्वयन हुने र त्यसमा शंका नगर्न आग्रह गरे ।
राजनीतिक विश्लेषक हरि रोका प्रधानमन्त्री ओलीले यसअघि नै टुंगो लागेको आफ्नो पदावधिलाई दोहो¥याएर भन्नु र गृहमन्त्री लेखकले सहमति कार्यान्वयन हुन्छ भन्नुलाई गठबन्धनमा ‘खटपट’ पैदा भएको अर्थमा विश्लेषण गर्छन् ।‘दुई वर्ष प्रधानमन्त्री बन्ने भन्ने कुरा ओलीजीले दोहो¥याइराख्नुपर्ने विषय होइन । सबैलाई थाहा छ त । किन दोहो¥याउनुभयो,’ उनले प्रभावसँग भने, ‘गृहमन्त्री लेखकले पनि समझदारी कार्यान्वयन हुन्छ भन्नु आवश्यक छैन । तर, भन्नुुभयो । यसको अर्थ त आपसी विश्वास जगाउने प्रयास हो । मतलव गठबन्धनमा खिचडी पाकिरहेको संकेत हो ।’
रोकाले कांग्रेस–एमाले गठबन्धनको सैद्धान्तिक जग नै फितलो रहेको पनि टिप्पणी गरे । त्यसले गर्दा ढल्न सक्ने र कारक कांग्रेसको इतरसमूह हुने उनको विश्लेषण छ ।
