गोदावरी - सुदूरपश्चिम प्रदेशमा पर्यटन विकास कार्यक्रमअन्तर्गत २२ वटा योजना सम्पन्न भएका छन् । सुदूरपश्चिम प्रदेशको उद्योग, पर्यटन, वन तथा वातावरण मन्त्रालय अन्तर्गतको पर्यटन विकास कार्यक्रम कार्यान्वयन एकाइले गत आवमा प्रदेश पर्यटन पूर्वाधार निर्माणका २० र सङ्घतर्फका दुई गरी २२ वटा योजना सम्पन्न गरेका हुन् ।
प्रदेश पर्यटन विकास कार्यक्रम कार्यान्वयन एकाइका निमित्त कार्यालय प्रमुख डबलबहादुर बोहराले प्रदेशभर पहिचान भएका पर्यटकीय क्षेत्रमा पूर्वाधार निर्माण तथा स्तरोन्नतिका लागि विनियोजन गरिएको कूल रु चार करोड दुई लाख २० हजारमध्ये रु तीन करोड ६८ लाख ८१ हजार र सङ्घ शसर्तको रु २५ लाखमा रु २४ लाख खर्च भएको जानकारी दिए ।
बाजुराको बडीमालिका पर्यटकीय क्षेत्रमा रु ३५ लाख ९० हजारको लागतमा बडीमालिका मन्दिर परिसर, बासुधारा, रौलेगोल, थिउरे, लौडी विनायक, भुज्याडा ठाउँमा रेलिङको पदमार्ग निर्माण, स्वामी कार्तिक खापर गाउँपालिका–३ मा यात्रु प्रतिक्षालय तथा फिल्ड निर्माण र गौमुल गाउँपालिकाको दहकोट झर्ना संरक्षण तथा व्यवस्थापन गरिएको उहाँले जानकारी दिए । यस्तै, खप्तडमा पदमार्ग स्तरोन्नतिमा रु ३६ लाख ५३ हजार, दार्चुलाको अपि बेसक्याम्पमा पर्यटकीय आवासगृह मर्मत तथा आवासगृह निर्माणमा रु ३५ लाख २८ हजार, ब्यास गाउँपालिका–१ स्थित योखरजाङ पदमार्ग निर्माणमा रु नौ लाख ९६ हजार, मालिकार्जुनधाम पर्यटन पूर्वाधार निर्माण र पर्यटन प्रवर्द्धनमा रु नौ लाख ९६ हजार खर्च रिएको निमित्त प्रमुख बोहराले बताए ।
यसैगरी कैलालीको गोदावरी धाममा पर्यटकीय पूर्वाधार निर्माण र पर्यटन प्रवद्र्धनमा रु २२ लाख २९ हजार, शिवपुरी धाममा पुर्वाधार स्तरोन्नतिमा रु २९ लाख ९६ हजार, बेहडाबाबामा धार्मिक पर्यटकीय पूर्वाधार निर्माणमा रु नौ लाख ८५ हजार, जाखौर ताल र मुरफुट्टा तालमा मिचाहा प्रजाती जलकुम्भी हटाउन रु नौ लाख ९९ हजार, बुढीतोलामा रिङ्ने हिलसाइड साइक्लिनिङ निर्माणमा रु नौ लाख ४७ हजार र टीकापुर—७ डल्फिन क्षेत्रमा पर्यटकीय विश्रामगृह निर्माणमा रु नौ लाख ९१ हजार खर्च गरिएको पर्यटन एकाइ कार्यालयले जनाएको छ ।
यस्तै, रु १० लाखमा कैलालीको टीकापुर–५ मा त्रिवेणी धामको संरचना, मोहना, कर्णाली, भेरी कर्णाली र सेती कर्णाली धार्मिक पर्यटकीय गन्तव्य निर्माण गरिएको छ । कैलाली र कञ्चनपुरमा एकीकृत पर्यटन सर्किटमा पर्यापर्यटन पूर्वाधार निर्माणमा रु ४९ लाख ९० हजार, डडेल्धुराको परशुरामधाम क्षेत्रमा ‘पानी फोहोरा’ निर्माणमा रु १९ लाख ८८ हजार, कञ्चनपुरको शुक्लाफाँटा नगरपालिका क्षेत्रमा पर्ने बतासे झर्ना संरक्षण एवं व्यवस्थापनमा रु १० लाख, भीमदत्त नगरपालिकामा पर्ने भम्केनीधाममा आवश्यक पूर्वाधार निर्माणका लागि रु १९ लाख ८८ हजार खर्च गरिएको एकाइ कार्यालयका निमित्त प्रमुख बोहराले बताए ।
यसैगरी गत आवमा सङ्घतर्फको शसर्त अनुदानबाट रु २५ लाखमध्ये १४ लाख ७६ हजारको लागतमा बाजुराको त्रिबेणी नगरपालिका–६ ठुलाघर, पन्धारास्थित भगवती मन्दिर जाने बाटोमा उद्यानसहितको पदमार्ग र डोटीको जोरायल गाउँपालिका–४ गोल्लामा रु ९ लाख ८४ हजारको लागतमा वगनचौर पार्क निर्माण गरिएको जनाइएको छ । प्रदेशमा पर्यटकीय क्षेत्रको प्रवर्द्धन र पूर्वाधार निर्माणका लागि चालु आर्थिक वर्षको पहिलो चौमासिकदेखि कार्ययोजना बनाएर अघि बढ्ने योजना रहेको प्रदेश पर्यटन विकास कार्यक्रम कार्यान्वयन एकाइले जनाएको छ ।
