काठमाडाैं - सुदूरपश्चिम प्रदेशका मुख्यमन्त्री दीर्घ सोडारी राजनीतिक संकटमा फसेका छन् । नेकपा एकीकृत समाजवादी पार्टीबाट मुख्यमन्त्री बनेका उनी राजीनामा दिने या विश्वासको मतका लागि संसद्का सामना गर्ने अवस्थाबाट गुज्रिएका हुन् ।
नेपाली कांग्रेस, नेकपा एमाले र नागरिक उन्मुक्ति पार्टीले राजीनामा दिएर मार्गप्रशस्त गर्न दबाब दिँदै आएका छन् । तर, अल्पमतमा रहेका मुख्यमन्त्री सोडारीले विश्वासको मत लिने भन्दै सत्ता लम्ब्याउँदै आएका छन् । प्रदेशसभाबाट बजेट पारित हुन नसक्दा प्रदेश ‘बजेट होलिडे’मा चलेको छ । मुख्यमन्त्री सोडारीले विश्वासको मत पाउने अवस्था छैन । त्यही भएर छिट्टै सरकारबाट बाहिरिने तयारीमा रहेको माओवादी केन्द्रले जनाएको छ ।
यता कोशी प्रदेशमा भने आज एमालेका हिक्मत कार्की नेतृत्वको सरकारबाट माओवादी अलग हुने भएको छ । पार्टीका प्रदेश अध्यक्ष हर्क नेम्बाङले सहमतिको सरकार गठन हुने सम्भावना टरेपछि सरकारबाट बाहिरिने अवस्थामा पुगेको बताए ।
‘हामीले यसअघि सहमतीय सरकार गठन गरौं भनेका थियौं, त्यसका लागि केही प्रयत्न भए तर सहमतीय सरकार गठनको आधार भत्कियो,’ उनले भने । कोशीमा पनि माओवादी केन्द्र लामो समयदेखि सत्तामा रहँदै आएको थियो ।
