- अध्यक्षको दौडबाट सम्मानित नेता झलनाथ खनाल बाहिरिए
- महासचिव घनश्याम भुसाललाई अध्यक्षमा समर्थन
- खनालले अघि सारेको समाजवादी कार्यक्रमलाई भुसालले अँगाल्ने
- खनालको साथले पनि वर्तमान अध्यक्ष माधव नेपालसँग प्रतिस्पर्धा गर्न भुसाललाई कठिन हुने अनुमान
काठमाडौं– नेकपा एकीकृत समाजवादीको भावी अध्यक्षको दौडबाट सम्मानित नेता झलनाथ खनाल बाहिरिएका छन् । उनले पार्टी महासचिव घनश्याम भुसाललाई अध्यक्षमा समर्थन गर्ने भएका छन् । बुधबार खनालनिवास डल्लुमा दुई नेताबीच भेटवार्ता भएको थियो । त्यसक्रममा खनाल भुसाललाई अध्यक्षमा अघि बढाउन सहमत भएका हुन् ।
डल्लुमा लगातार केही दिनदेखि युवा विद्यार्थीहरूको भीड लागेको थियो । उनीहरूले खनाल र भुसालमध्ये एक जनामात्रै अध्यक्षका लागि अघि बढ्नुपर्ने भन्दै आपसमा समझदारी गर्न दबाब दिएका थिए । दुई जना नेता नै अध्यक्षमा लड्ने भए चुनाव जित्न मुस्किल पर्ने उनीहरूको विश्लेषण थियो ।
सोहीअनुसार बुधबार दुई नेताबीच भेटवार्ता भएको र भुसाललाई अघि बढाउन खनाल सहमत भएको पार्टी सचिव जीवनराम श्रेष्ठले बताए । दुई नेतालाई मिलेर अघि बढ्नका लागि उपमहासचिव प्रकाश ज्वाला, युवा नेताहरू नरेश शाही, सन्दीप राईलगायतले चर्को दबाब दिएका थिए । त्यसपछि खनालले अगाडि सारेको समाजवादी कार्यक्रमलाई भुसालले अँगाल्ने र नेतृत्वमा भुसाललाई साथ दिने सहमति भएको हो । सचिव श्रेष्ठका अनुसार छलफलमा खनालले छोरा निर्भिक खनाल र भुसालले नरेश शाहीलाई साथमा राखेका थिए । र, दुई नेताबीचको अहिलेको सहमतिलाई एमालेको आठौं महाधिवेशनको निरन्तरताको रुपमा पनि व्याख्या गरिएको छ । आठौं महाधिवेशनमा खनाल र भुसाल एउटा कित्तामा थिए । माधवकुमार नेपाल र केपी ओली अर्को कित्तामा रहेका थिए ।
एकीकृत समाजवादीका सम्मानित नेता खनालले पार्टीलाई क्रान्तिकारी र समाजवादी बाटोमा लैजानका लागि मिलेर अगाडि बढ्ने सहमति भएको बताए । प्रभावसँगको कुराकानीमा खनालले नेता भुसालसँग भएको महाधिवेशन केन्द्रित छलफलमा वैचारिक र राजनीतिक सहमति भएको बताए । उनले भने, ‘हामीहरूबीच पार्टीलाई क्रान्तिकारी र समाजवादी बाटोमा लैजानका लागि वैचारिक र राजनीतिक सहमति भएको छ । अब हामी महाधिवेशनमा मिलेर जान्छौं । यसमा दायाबायाँ हुँदैन ।’
खनाल अध्यक्षको दौडबाट पछि हटेपछि भुसालको प्रतिस्पर्धा पार्टी अध्यक्ष नेपालसँग हुने भएको छ । नेपाललाई हराउन भने भुसाललाई त्यति सजिलो छैन । कारण अधिकांश प्रदेशबाट आउने प्रतिनिधिमा नेपालको बहुमतजस्तो छ । पदाधिकारीदेखि सचिवालय हुँदै केन्द्रीय कमिटीसम्म आइपुग्दा पनि नेपालको पक्षमा ठूलो टिम छ । जसले गर्दा उनी अध्यक्षको दौडमा रहेकामध्ये शक्तिशाली दाबेदार हुन् । उनले एमालेसँगको विद्रोहलाई अनुमोदन गर्न पनि आफू अध्यक्ष हुनुपर्ने तर्क गर्दै आएका छन् ।
एकीकृत समाजवादीको महाधिवेशन यही असारको १६ देखि २० गतेसम्म काठमाडौंमा हुँदै छ । यस महाधिवेशनलाई १०औं भनिएको छ । महाधिवेशनमा एक हजार ८४९ जना प्रतिनिधि सहभागी हुने उक्त पार्टीले जनाएको छ ।
-1752335779.jpg)
