काठमाडौं- गण्डकी प्रदेशमा नेपाली कांग्रेसका नेता सुरेन्द्रराज पाण्डे दोस्रोपटक मुख्यमन्त्री बनेका छन् । बुधबार मुख्यमन्त्री नियुक्त भएका पाण्डेले पद तथा गोपनीयताको शपथसमेत लिएका छन् । उनले कांग्रेसबाट अर्थमन्त्रीमा टकराज गुरुङ र सामाजिक विकासमन्त्रीमा विन्दुकुमार थापालाई नियुक्त गरेर मन्त्रीमण्डल बिस्तार गरेका छन् ।
नेपालको संविधानको धारा १६८ को उपधारा (३) बमोजिम सबैभन्दा ठूलो दलको संसदीय दलको नेताको हैसियतमा पाण्डेलाई गण्डकीका प्रदेश प्रमुख डिल्लीराज भट्टले मुख्यमन्त्रीमा नियुक्त गरेका हुन् । यसअघिका मुख्यमन्त्री खगराज अधिकारीले लिएको विश्वास मत असंवैधानिक भन्दै सोमबार सर्वोच्चले बदर गरिदिएपछि पाण्डे मुख्यमन्त्री बनेका हुन् । सर्वोच्चले पाण्डेलाई मुख्यमन्त्रीमा नियुक्त गर्न ४८ घण्टे अल्टिमेटमसमेत दिएको थियो ।
२०८० वैशाख १४ मा मुख्यमन्त्री बनेका पाण्डेले केन्द्रमा सत्ता गठबन्धन फेरबदल भएसँगै गते चैत २१ गते राजीनामा दिएका थिए । उनको राजीनामा चैत २५ गते स्वीकृत भएको थियो । लगत्तै एमालेका अधिकारी मुख्यमन्त्री बनेका थिए । अधिकारीले वैशाख २३ गते विश्वासको मत लिएका थिए ।
अधिकारीले सभामुख कृष्णप्रसाद दाहालसहितको ३० मत लिएर विश्वासको मत पाएको घोषणा गरिएको थियो । सभामुख दाहालको उक्त घोषणा असंवैधानिक ठहर भएको छ । सोमबार सर्वोच्चले उक्त निर्णयलाई सच्याएको हो ।
६१ सदस्यीय प्रदेशसभामा कांग्रेस २७ सिटसहित पहिलो दल हो । यहाँ एमालेका २२, माओवादी केन्द्रका सात, राप्रपाकाका दुई, एकीकृत समाजवादी पार्टीका दीपक मनाङे र डा. बाबुराम भट्टराईको दल नेपाल समाजवादी पार्टी (नेसपा)का एक सांसद छन् ।
मुख्यमन्त्री नियुक्त भएसँगै पाण्डेलाई सरकारको आयुको चिन्ता भने थपिएको छ । किनभने उनले ३० दिनभित्र विश्वासको मत लिनुपर्ने हुन्छ । राप्रपा, नेसपा र एकीकृत समाजवादीले साथ दिएमात्र पाण्डेको सरकार जोगिने अवस्था छ ।
