- पछिल्लो समय दाहाल, देउवा र ओली एकैसाथ छलफलमा जुट्न सकेका छैनन्
- यही बेला प्रधानमन्त्री दाहाल र एकीकृत समाजवादीका अध्यक्ष नेपाल भने नेकपाकालको झल्को दिनेगरी देउवाको दैलो पुगेका छन्
- मधेस प्रदेशमा जसपाको सरकार जोगाउन उपेन्द्र यादवलाई लिएर नेपाल देउवानिवास पुगेको स्रोतको दाबी
काठमाडौं– नेकपाकालमा केपी शर्मा ओलीले प्रतिनिधिसभा विघटन गरेपछि पार्टी छाडेरै पुष्पकमल दाहाल र माधवकुमार नेपाल कांग्रेस सभापति शेरबहादुर देउवाको दैलो धाएका थिए । यही झल्को दिनेगरी प्रधानमन्त्री दाहाल र माधवकुमार नेपाल पुनः देउवाको दैलोमा धाउन थालेका छन् ।
सदनमा बजेट ल्याउन मुस्किल हुने देखिएपछि जेठ १३ गते बिहानै प्रधानमन्त्री दाहाल देउवानिवास बूढानीलकण्ठ पुगेका थिए । दाहाल–देउवाबीच ४० मिनेट कुराकानी भएको थियो । भेटमा के कुराकानी भयो ? यो विषय अहिले नै पटाक्षेप भएको छैन । यद्यपि एमाले अध्यक्ष ओली भने यो भेटपछि तीन शीर्ष नेताको बैठकबाट भाग्न थालेका छन् ।
यसअघि सहकारीको रकम अपचलनको विषयमा छानबिन गर्न गठन गरिने संसदीय समितिको कार्यदेश (टिओआर) शीर्ष तीन नेताले टुंग्याउने भनिएको थियो । यद्यपि तीन नेताबीच यसबारे कुनै बैठक हुन सकेन । ‘एमाले अध्यक्ष ओली देउवा र दाहालको एक्लाएक्लै भेटबाट सशंकित भएको देखिन्छ,’ नेपाली कांग्रेसका एक नेताले भने, ‘त्यसयता तीन शीर्ष नेताको भेट हुन सकेको छैन ।’
शीर्ष नेता नबसी टिओआर टुंग्याइयो । सहकारीको रकम अपचलनको विषयमा संसदीय छानबिन विशेष समिति बन्यो । आगामी आर्थिक वर्षको बजेट संसद्मा प्रस्तुत भइसकेको छ । योसँगै सेलाएको राजनीति सत्तामै रहेका एकीकृत समाजवादीका अध्यक्ष नेपाल बुधबार देउवानिवास पुगेसँगै पुनः तरंगित भएको छ । जनता समाजवादी पार्टी (जसपा) नेपालका अध्यक्ष उपेन्द्र यादव, लोकतान्त्रिक समाजवादी पार्टीका अध्यक्ष महन्थ ठाकुरसहितको छलफलमा नेपाल पनि मिसिन पुगेपछि राजनीतिमा नयाँ तरंग छाएको हो ।
बैठकमा एकीकृत समाजवादीका अध्यक्ष नेपालले सरकारमा आफूहरुलाई कुनै स्थान नदिइएको र अध्यादेश ल्याएर पार्टी फुटाउन सक्ने डर अझै रहेको गुनासो गरेको स्रोतले बताएको छ ।
मधेसको नेतृत्व जोगाउने प्रयासमा उपेन्द्र
बूढानीलकण्ठमा नेताहरुबीच मधेस सरकार टिकाउने विषयमासमेत छलफल भएको नेताहरुले बताएका छन् । मधेसमा अहिले जसपका सरोज यादव मुख्यमन्त्री छन् । केन्द्रमा सत्ता गठबन्धन फेरिएसँगै नेकपा एमाले र माओवादी केन्द्रले ३० वैशाखमा मुख्यमन्त्री सरोजकुमार यादवलाई दिएको समर्थन फिर्ता लिएका थिए । यो बीचमा उपेन्द्र यादवको पार्टी दुई टुक्रा भयो भने उनी सरकारबाट बाहिरिसकेका छन् ।
मुख्यमन्त्री यादवले आउँदो २३ गते विश्वासको मत लिने तयारी गरेका छन् । यसै विषयमा बुधबार भेट केन्द्रित भएको नेताहरुले बताएका छन् । कांग्रेस सभापतिका स्वकीय सचिव भानु देउवाले पनि यस विषयको पुष्टि गरे । ‘मधेस सरकार गठनमा कसरी जाने भन्ने विषयमा छलफल भयो । अरू समसामयिक विषयमा पनि छलफल भयो,’ देउवाले भने ।
मधेसमा १०७ सिटमध्ये एमालेको २३, कांग्रेसको २२, जसपा नेपालको १६, जनमत पार्टीको १३ सिट रहेको छ । त्यस्तै लोसपाको नौ सिट, माओवादी केन्द्रको सात सिट र एकीकृत समाजवादीको सात सिट रहेको छ । राष्ट्रिय प्रजातान्त्र पार्टी (राप्रपा), नेपाल संघीय समाजवादी र नागरिक उन्मुक्ति पार्टीले एक–एक सिट पाएका छन् । मधेसमा छ जना स्वतन्त्र उम्मेदवारले जितेका छन् ।
यहाँ कांग्रेसका २२, जसपा नेपालका १६, लोसपाका नौ र एकीकृत समाजवादीका सात गरी ५४ पु¥याएर गठबन्धनको अर्को सरकार बनाउने प्रयासमा उपेन्द्र लागेको देखिन्छ । बैठकपछि उपेन्द्रले मधेस सरकार जोगाउन प्रतिपक्षमा रहेका दलहरू एक ठाउँमा उभिने बताए । यादवले राष्ट्रिय राजनीतिमा पनि अब एकीकृत समाजवादीसहित प्रतिपक्ष दलहरू एकजुट भएर अघि बढ्ने छनक दिए ।
