काठमाडौं– प्रधानमन्त्री केपी शर्मा ओलीको आज मिर्गौला प्रत्यारोपण गरिँदै छ । प्रधानमन्त्री ओलीलाई झापास्थित चारआलीकी ३२ वर्षीया समीक्षा संग्रौलाले मिर्गौला दान दिँदै छिन् ।
दोस्रोपटक मिर्गौला प्रत्यारोपणका लागि प्रधानमन्त्री ओली सोमबार साँझ नै महाराजगञ्जस्थित शिक्षण अस्पतालमा भर्ना भएका छन् । प्रधानमन्त्री ओलीलाई मंगलबारबाट आवश्यक औषधि दिन सुरु गरिएको अस्पतालले जनाएको छ ।
अस्पतालले मंगलबार प्रेस विज्ञप्ति जारी गर्दै मृगौला प्रत्यारोपण तयारीका लागि अस्तताल भर्ना भएको दोश्रो दिन सम्पूर्ण परीक्षण गरी औषधि दिन सुरु गरिएको जनाइएको हो । प्रत्यारोपण अगाडि गरिने नियमित डायलासिस तथा ल्याव परीक्षणहरू गर्ने क्रम जारी रहेको विज्ञप्तिमा उल्लेख छ । अस्पतालले प्रधानमन्त्रीको स्वास्थ्य स्थिति राम्रो अवस्थामा रहेको र विशेषज्ञहरूको निरन्तर निगरानीमा रहेको पनि जनाएको छ ।
प्रधानमन्त्री ओलीको स्वास्थ्य अवस्थाबारे जानकारी लिन सरकारका केही मन्त्रीहरू मंगलबार त्रिवि शिक्षण अस्पताल पुगेका थिए । भारतीय राजदूत विनयमोहन क्वात्रा पनि प्रधानमन्त्री ओलीको स्वास्थ्य अवस्थाबारे जानकारी लिन मंगलबार अस्तपताल पुगेका थिए । यसैबीच प्रधानमन्त्री ओलीको राजनीतिक नेतृत्वदेखि, कर्मचारी, स्वदेश र विदेशका विभिन्न पेशा व्यवसायी र लाखौँ कार्यकर्ताले मुलुकको कार्यकारी प्रमुख एवं सत्तारुढ नेपाल कम्युनिष्ट पार्टी (नेकपा)का अध्यक्ष ओलीको स्वास्थ्यलाभको कामना गरेका छन् ।
प्रधानमन्त्री ओलीको शरीरको संवेदनशील अंगको दोस्रो प्रत्यारोपण र चिकित्सकीय प्रबन्धका कारण सबैले अस्पतालमा भेटेर शुभकामना दिन सम्भव नहुने भएकाले प्रधानमन्त्रीका प्रेस सल्लाहकार सूर्य थापाले बताए । उनका अनुसार ‘केपी शर्मा ओली डटकम’मा स्वास्थ्यलाभको कामना गर्न चाहनेले सन्देश दिन सक्ने सूचना गरेलगत्तै मंगलबार उक्त साइटमा विभिन्न क्षेत्रबाट स्वास्थ्यलाभको कामना गरेका छन् ।
‘सम्माननीय प्रधानमन्त्रीज्यूको सफल मिर्गाैला प्रत्यारोपण तथा शीघ्र स्वास्थ्यलाभको शुभकामना व्यक्त गर्न चाहने स्वदेश तथा विदेशमा रहनुहुने सम्पूर्ण महानुभावले यहाँ आफ्नो सन्देश राख्न अनुरोध गर्दछौँ’ थापाले उक्त जानकारी आफ्नो सामाजिक सञ्जालमा समेत समावेश गरेका छन् ।
अस्पताल भर्ना हुनुअघि प्रधानमन्त्री ओलीले आफू चाँडै स्वास्थ्यलाभ गरी समृद्धिका सपना पूरा गर्ने बाँकी कार्यभार पूरा गर्ने अभियानमा सामेल हुने उल्लेख गर्दै भिडियो सन्देश दिएका थिए । यसअघि २०६४ साउनमा पहिलोपटक मिर्गाैला प्रत्यारोपण गराएका प्रधानमन्त्री ओली त्यसयता विभिन्न समयमा फलोअप उपचार गर्दै सरकार र पार्टीको नेतृत्व तहमा रही काम गर्दै आएका छन् ।
यसैबीच राष्ट्रपति विद्यादेवी भण्डारीले पनि प्रधानमन्त्री ओलीको स्वास्थ्यलाभको कामना गरेकी छन् । राष्ट्रपति भण्डारीले ट्विट गर्दै प्रधानमन्त्री ओलीको मिर्गौला प्रत्यारोपणको सफलताका लागि कामना गरेकी हुन् । उनले मंगलबार अपराह्न ट्वीट गर्दै प्रधानमन्त्रीको शीघ्र स्वास्थ्यलाभको कामना गरेकी छन् ।
नेकपा अध्यक्ष पुष्पकमल दाहाल ‘प्रचण्ड’ मंगलबार साँझ प्रधानमन्त्री ओलीको स्वास्थ अवस्थाबारे जानकारी लिन अस्पताल पुगेका थिए । यस्तै, उपराष्ट्रपति नन्दबहादुर पुनले सोमबार प्रधानमन्त्री निवास बालुवाटारमै पुगेर सफल प्रत्यारोपणको कामना गरेका थिए । नेकपा सचिवालय बैठकले यसअघि नै शीघ्र लाभको कामना गरिसकेको छ, जहाँ प्रधानमन्त्री ओलीले आफ्नो स्वास्थ्योपचारको योजनाबारे जानकारी गराएका थिए ।
यस्तै, प्रमुख प्रतिपक्षी दल नेपाली कांग्रेसका नेताहरूले पनि विभिन्न माध्यमबाट प्रधानमन्त्री ओलीको स्वास्थ्यलाभको कामना गरेका छन् ।
