समीकरण भत्काउने प्रतिपक्षको परम्परा नै भइसक्यो । सत्तापक्ष र प्रतिपक्षका कतिपय बाटाहरूमा आन्तरिक अन्तरविरोध भने गम्भीर प्रकारको देखिन्छ ।
पुष्पकमल दाहाल
प्रधानमन्त्री
काठमाडौं– ठूला दलहरुको काँध चढेर बेलाबेला गठबन्धन परिवर्तन गरिरहने माओवादी केन्द्रका अध्यक्ष पुष्पकमल दाहाल नेतृत्वको सत्ता यतिबेला गम्भीर संकटसँग जुधिरहेको छ । एक त प्रमुख सत्ताधारी दल नेकपा एमालेका अध्यक्ष केपी शर्मा ओलीको असन्तुष्टि, अर्कोतिर एकीकृत समाजवादीका अध्यक्ष माधवकुमार नेपालको आक्रोश ।
सत्ताधारी दल राष्ट्रिय स्वतन्त्र पार्टी (रास्वपा)का सभापतिसमेत रहेका उपप्रधान तथा गृहमन्त्री रवि लामिछानेमाथि लागेको सहकारी ठगी आरोप प्रकरणले दाहाल नेतृत्वको सरकारलाई उत्तिकै कमजोर बनाएको छ । शनिबारमात्र यस विषयमा छलफल गर्न प्रधानमन्त्री दाहालले पार्टीको संसदीय दलको बैठक डाकेका थिए । बैठकमा दाहालले प्रतिपक्षी सत्ता समीकरण परिवर्तनको खेलमा लागेको बताएका थिए ।
यतिबेला नेपाली कांग्रेस गृहमन्त्री लामिछानेलाई सहकारी प्रकरणमा संलग्न रहेको आरोप लगाउँदै संसदीय छानबिन समिति गठनको अडानमा छ । यही कारण अवरुद्ध बनेको संसद्को हिउँदे अधिवेशन वैशाख २ मा अन्त्य भयो । कांग्रेसको मागको कुनै सुनुवाइविना अन्त्य गरिएको संसद् अधिवेशन वैशाख २८ गतेका लागि बोलाइएको छ । कांग्रेसले यो अधिवेशनमा पनि संसदीय छानबिन समितिको माग गर्दै सदन अवरोधको तयारी गरेको छ ।
यही अधिवेशनको पूर्वसन्ध्यामा प्रधानमन्त्री दाहालले संसदीय दलको बैठकमा अहिलेको राजनीतिक अवस्थाबारे ब्रिफिङ गरेका थिए । ‘प्रतिपक्षको काम भनेको समीकरण भत्काउने परम्परा नै भइसक्यो । सत्तापक्ष र प्रतिपक्षका कतिपय बाटाहरूमा आन्तरिक अन्तरविरोध भने गम्भीर प्रकारको देखिन्छ,’ दाहालको भनाइ उद्धृत गर्दै माओवादी केन्द्रका एक सांसदले भने । यद्यपि दाहालले अहिले नै समीकरण भत्काउन सक्ने स्थिति नरहेको दाबी गरेका छन् ।
अस्थिरता र अविश्वासको जगमा अहिलेको सरकार बनेको छ । यसकै कारणले यसको आयु चाँडै टुंगिनेवाला छ ।
डा. प्रकाशशरण महत
प्रवक्ता, नेपाली कांग्रेस
दाहालले यस्तो दाबी गरे पनि सत्ता गठबन्धनमा एमाले अध्यक्ष केपी शर्मा ओली सुदूरपश्चिम र कोशी सरकारको नेतृत्व चयन प्रक्रियामा सन्तुष्ट छैनन् । सुदूरपश्चिममा एकीकृत समाजवादीका दीर्घ सोडारीलाई मुख्यमन्त्री बनाएपछि एमाले रुष्ट रहेको छ । एमालेले सोडारीलाई विश्वासको मत नदिने चेतावनी दिइसकेको छ । यहाँको सरकार निर्माणमा प्रधानमन्त्री दाहालको भूमिकामाथि प्रश्न उठाउँदै ओलीले यसबारे नेताहरुसँग छलफल जारी राखेका छन् । सोही कारण शनिबार मुख्यमन्त्री सोडारीले विश्वासको मत लिन बोलाइएको बैठक अनिश्चितकालका लागि स्थगित गरिएको छ ।
यही मेसोमा एकीकृत समाजवादीका अध्यक्ष नेपालले आफूलाई प्रधानमन्त्री बनाउन ‘लबिइङ’ तीव्र पारेका छन् । नेपाललाई नेपाली कांग्रेसका सभापति शेरबहादुर देउवाले राष्ट्रपति रामचन्द्र पौडेलसँगसमेत यसबारे विश्वस्त पार्न भेटाइसकेको बताइएको छ । देउवालेमात्र हैन एमालेलाई पहिलो दल बनाउने रणनीतिमा रहेका ओलीलेसमेत नेपाललाई प्रधानमन्त्रीको ‘अफर’ गरेको बताइन्छ । अहिले एमाले ७८ सिटसहित दोस्रो दल हो ।
नेपाललाई प्रधानमन्त्री बनाए एकीकृत समाजवादीको १० सिटसहित एमालेको ८८ सिट पुग्ने र केही स्वतन्त्र सांसद ल्याएर प्रतिनिधिसभामा पहिलो दल बन्ने दाउमा ओली रहेका छन् । यस्तो अवस्था देखेर दाहाल स्वयं पनि नेपाललाई प्रधानमन्त्री मान्न तयार भएको बताइएको छ । यसो गर्दा दाहाल एक त आफ्नो पार्टीलाई सत्तामा राख्न सफल हुने र नेपाललाई पार्टी फुटाउँदाताकाको गुण लगाएजस्तो पनि हुने राजनीतिक विश्लेषकहरुको तर्क छ ।
कांग्रेस संस्थापनइतर भने एमालेसँग मिलेर भए पनि दाहाल नेतृत्वको सरकार ढलाउनुपर्ने रणनीतिमा देखिन्छ । डा. शेखर कोइराला, महामन्त्री गगन थापालगायत यो लाइनमा निरन्तर लागेका छन् । यो बीचमा कोइरालाले ओलीसँगसमेत भेटेका छन् । एमाले र कांग्रेस मिल्दा मात्र देशले निकाश पाउने दाबी कोइरालाको छ । ‘२०७० को दोस्रो संविधानसभामा जब कांग्रेस र एमाले पहिलो र दोस्रो पार्टी भए, कांग्रेस र एमाले एकै ठाउँमा उभिए अनि संविधान जारी भयो,’ कोइराला भन्छन् ।
शनिबार बाँकेको कोहलपुरमा आयोजित नेपाली कांग्रेस बाँके क्षेत्र नं १ को सम्मेलनलाई सम्बोधन गर्दै कोइरालाले सहकारी ठगीमा मुछिएका गृहमन्त्री लामिछानेको अनुसन्धानका लागि संसदीय छानबिन समिति नबनेसम्म कांग्रेसले संसद् चल्न नदिने पनि बताए । ‘हामीले गृहमन्त्रीको राजीनामा मागेका होइनौं, संसदीय छानबिन बनाऔं सहकारी ठगीमा उहाँको संलग्नता नदेखिए उहाँ गृहमन्त्री रहिरहनुहुने छ तर संसदीय समिति बनाउन सरकार किन डराएको ?,’ कोइराला प्रश्न गरे ।
यसैबीच कांग्रेस प्रवक्ता डा. प्रकाशशरण महतले वर्तमान सरकारको आयु लामो नरहेको ठोकुवा गरेका छन् । शनिबार विश्व प्रेस स्वतन्त्रता दिवसको सन्दर्भमा नेपाल प्रेस युनियन केन्द्रीय समितिले काठमाडौंमा आयोजना गरेको अन्तरक्रियामा महतले लोकतान्त्रिक सरकार चाँडै आउने बताएका हुन् । ‘अस्थिरता र अविश्वासको जगमा अहिलेको सरकार बनेको छ । यसकै कारणले यसको आयु चाँडै टुंगिनेवाला छ । र, चाँडै नै लोकतन्त्रप्रति समर्पित कुराले होइन, कामले पारदर्शिता, विकास र स्थिरताप्रति समर्पित सरकार आउने छ भन्ने विश्वास दिलाउन चाहन्छु,’ प्रवक्ता महतले भने ।
