काठमाडौं–भारतको चर्चित आईटीसी ग्रुप अफ होटेलस् अन्तर्गतको फर्च्युन होटेलले नेपालको भक्तपुरमा फर्च्युन रिसोर्ट एण्ड वेलनेस स्पा नाममा आफ्नो शाखा विस्तार गरेको छ ।
नेपालमा शाखा विस्तारसँगै भारतको चर्चित फर्च्युन होटेलले अन्तराष्ट्रिय यात्रा सुरु गरेको छ । उक्त रिसोर्ट ८,००० वर्ग फिट क्षेत्रफलमा फैलिएको प्रि फड्सन क्षेत्र र ११,००० वर्ग फिट क्षेत्रफलमा फैलिएको स्विमिङ्ग पुल नै आकर्षणको केन्द्र रहेको छ । यहाँ करिब ६०० पाहुनाहरु आरामले अटाउने होटल सञ्चालकले बताएका छन् ।
काठमाडौँबाट मात्र २० किलोमिटर र त्रिभुवन विमानस्थलबाट १८ किलोमिटरको दुरीमा अवस्थित फर्च्युन रिसोर्ट एण्ड बेलनेस स्पाबाट अन्य पर्यटकीय स्थलहरु पनि सहजै पुग्न सकिन्छ । साथै होटलले अतिथि र समुदायसँग सम्बन्ध राख्दै सम्पूर्ण विश्वका यात्रुहरुमाझ उत्कृष्ट गन्तयको रुपमा रहेको नेपालमा आतिथ्य संस्कारमा एउटा अर्थपूण छाप छोड्ने विश्वास लिएको छ ।
उद्योग ,वाण्ज्यि तथा आपूर्ति मन्त्री दामोदर भण्डारी र फर्च्युन होटलका प्रबन्ध निर्देशक समिर एमसीले उक्त स्पाको उद्घाटन गरेका हुन् ।समारोहमा बोल्दै फर्च्युन होटलका प्रबन्ध निर्देशक समिर एमसीले भने “नयाँ आर्थिक वर्ष ०८१–८२ को शुरुवातमै फर्च्युन रिसोर्ट एण्ड वेलनेस स्पाको उद्घाटन गर्न पाउँदा हामी निकै खुशी छौँ । भारत बाहिर हाम्रो अन्तर्राष्ट्रिय यात्राको डेब्यूमा पहिलो शाखाको सुरुवात नेपालमा गर्न पाउँदा हामी निकै हर्षित छौँ । हामी दक्षिण एसिया र नजिकका अरु देशहरुमा पनि हाम्रो उपस्थिति बढाउँदै जानेछौँ र आजको यो उद्घाटन हाम्रो यात्राको नयाँ कोसेढुङ्गा हो । सांस्कृतिक सम्पदा, प्राकृतिक सौन्दर्यजस्ता विविध कुराहरुले नेपाल उत्साहपूर्ण अनुभवको खोजीमा हिँड्ने पर्यटकहरुको पहिलो रोजाईमा पर्छ । त्यसैले हामी हाम्रो संजालको प्रयोग गर्दै फर्च्युन होटेल्स्को सुविधाहरु नेपालमा ल्याउन चाहन्छौँ।’
शान्त वातावरणमा अवस्थित फर्च्युन रिसोर्ट एण्ड वेलनेस स्पाले भित्री शान्ती खोज्नेहरूका लागि विश्राम लिने विशेष ठाउँ हुने विश्वास लिइएको छ । होटलमा प्रशस्त कोठा, कटेज तथा न्यानो र आधुनिक सजावटले सजिएका सुइटहरू छन् । प्रत्येक कोठा अत्याधिक आरामदायी बनाएको छ ।
हिलटेक हेल्थ एण्ड होम्स प्रालिका अध्यक्ष कमल जैनप्रति कृतज्ञता व्यक्त गर्दै समिर एमसीले थप भने, “भक्तपुरमा हाम्रो पहिलो रिसोर्ट सुरु गर्दै गर्दा सांस्कृतिक रुपमा धनी साथै संगीत तथा नृत्यको केन्द्रको रुपमा रहेको भक्तपुरमा यस्तो रमणीय गन्तव्य सिर्जना गर्ने सपना बोकेकोमा हामी होटल संचालकहरुलाई बधाई दिन चाहन्छौँ। विश्वकै अग्लो शिव मुर्ती मध्ये एक कैलाशनाथ महादेव प्रतिमाको चरणमा एउटा शान्त रिसोर्टको योजनागरिएको छ । यो अवधारणाले नेपाल आउने पर्यटकहरुको वेल(बिइङ र स्पा अनुभवलाई अझै सुदृढ गर्नेछ ।’
रिसोर्टमा स्पा, रिल्याक्सिङ्ग ट्रिटमेन्ट रुम, थेरापी रुम, सौना, स्टिम रुम, जिम, आकर्षक दृश्य देखिने स्विमिङ्ग पुल जस्ता विभिन्न आरामदायी सुविधाहरु उपलब्ध छन् । स्पा थेरापिस्टहरूको विशेषज्ञ टोलीले गर्ने स्पामा इसेन्सियल ओइलहरू, र शरीर, दिमाग र आत्मालाई सन्तुलन ल्याउने प्राकृतिक सामग्रीहरू प्रयोग गरेर डिटक्सिफिकेशन र क्लिन्जिङ, गहिरो आराम र समग्र प्राकृतिक चिकित्सा र पंचकर्म उपचारहरू प्रदान गर्ने योजना होटेलको छ।
शाकाहारी खानाका पारखीहरुलाई रिसोर्टमा रहेको रेन्बो रेस्टुरेन्टमा सम्पूर्ण प्रकारका स्वादिष्ट शाकाहारी खानेकुराहरु उपलब्ध छन् । साथै नेप्ट्यून बार तथा लाउन्जमा विभिन्न प्रकारका मदिराहरु उपलब्ध हुने कम्पनीले रिसोर्टले जनाएको छ । थरि थरिका स्वादिष्ट भोजन र पुल बारको साथ रिसोर्टले आफ्ना ग्राहकहरुलाई सर्वोत्कृष्ट सेवा प्रदान गर्न कुनै कसर बाँकी राखेको छैन । थुप्रै फराकिलो व्याङ्गवेटहरु रहेको रिसोर्टले वैवाहिक गन्तव्यको रुपमा पनि चर्चा कमाउन सक्ने सम्भावना राखेको छ ।
