काठमाडाैं - नेपालकाे सर्वाधिक बिक्री हुने राष्ट्रिय दैनिक-प्रभाव दैनिक पत्रिका ११औं वर्षमा प्रवेश गरेकाे छ । काठमाडाैंको सिफलमा अवस्थित विस २०७० सालमा स्थापना भई हाल १० वर्ष पूरा गरी ११ वर्षमा प्रवेश गरेकाे हाे ।यस पत्रिकाले विशेष गरी वैदेशिक रोजगारसम्बन्धमा लेख्ने गरेको छ ।
प्रकाशक कृष्णबहादुर कार्की(प्रबन्ध निर्देशक):
लोकतान्त्रिक गणतन्त्रको उदयसँगै प्रारम्भ भएको प्रभाव दैनिकको यात्रा आजबाट ११औं वर्षमा प्रवेश गरेको सुखद खबर आमपाठकहरुसँग साट्न पाउँदा हामी गौरवान्वित छौं । विभिन्न प्रतिकूल परिस्थितिका बावजुद हाम्रो एक दशकको यात्रा अनवरत रह्यो । यसक्रममा हामीले २०७२ को विनासकारी भूकम्प, भारतको नाकाबन्दी, कोरोना भाइरस (कोभिड–१९) महामारीजस्ता संक्रमणकालीन अवस्थाको सामना गर्नुप¥यो । प्राकृतिक विपत्ति र महामारीबाट निम्तिएको आर्थिक संकटले मुलुकको अर्थतन्त्रलाई समस्याग्रस्त बनाउँदा आर्थिक रुपमा बेहोर्नुपरेको चुनौतीलाई व्यवस्थापन गर्दै प्रकाशनलाई निरन्तरता दियौं । आफ्नो लक्ष्यबाट विचलित भएनौं । यो सफलता यहाँहरुकै सहयोग, सद्भाव, विश्वास र सहकार्यबाट प्राप्त भएकोमा दुईमत छैन ।
संघीय लोकतान्त्रिक गणतन्त्रलाई संस्थागत गर्दै मुलुकलाई आर्थिक समृद्धितर्फ अग्रसर गराउन सञ्चार गृहमार्फत खेल्नुपर्ने भूमिकामा हामीले कुनै सम्झौता गरेनौं । व्यावसायिक पत्रकारिताको मर्म, सिद्धान्त र पत्रकार आचारसंहितालाई पूर्णरूपमा आत्मसात् गरेर अगाडि बढ्यौं । यही कारण हामीले आमपाठकको विश्वास जित्न सक्यौं । हाम्रो प्रकाशन ‘प्रभाव दैनिक’को यस यात्रामा आदरणीय पाठक, विज्ञापनदातालगायत विभिन्न क्षेत्रबाट प्राप्त साथ, समर्थन तथा हौसलाको हामी ऋणी छौं । त्यसैगरी, निष्पक्ष र तटस्थ पत्रकारितालाई स्थापित गराउन सामूहिक रूपमा सहयोग पु¥याउनुहुने सिर्जनशील पत्रकार, लेखक, लगनशील कर्मचारी, इमान्दार वितरक, विज्ञापनदाता, शुभेच्छुक एवं सहयोगी सबैप्रति आभारी छौं ।
विगत एक दशकको अवधिमा प्राप्त उपलब्धि, सिकाइ र अनुभवलाई लिएर थप जिम्मेवार, विश्वसनीय एवं प्रभावकारी रुपमा अगाडि बढ्ने प्रण गर्दछौं । पछिल्लो समयमा विकसित भएको प्रविधिलाई पछ्याउँदै छापा माध्यमलाई परिमार्जन गरी समयनुकूल पाठकको चाहनाअनुसार सामग्रीहरू प्रकाशन गर्दै आएका छौं । साथै, अनलाइन संस्करण ‘प्रभावअनलाइन डटकम’ तथा ‘प्रभाव टेलिभिजन’ (युट्युब च्यानल)मार्फत पनि पाठक÷दर्शकसमक्ष सूचना प्रवाह गरिरहेका छौं । देशमा हुने अनियमितता र भ्रष्टाचारको उजागर गर्दै सबैलाई सूचित गर्ने कार्यमा हामी निरन्तर लागिरहने प्रतिबद्धता व्यक्त गर्दछौं ।
११औं वर्ष प्रवेशको अवसरमा हामीले २४ पृष्ठको ‘कर्मठ रिटर्नी’ नामक विशेषांक प्रकाशन गरेका छौं । वैदेशिक रोजगारीबाट फर्किएर विभिन्न पेसा, व्यवसायमा संलग्न भई उदाहरणीय काम गरिरहेका पात्रहरुलाई विशेषांकमा समेटेका छौं । यसले वैदेशिक रोजगारीबाट सिकेको सीप र आर्जन गरेको पुँजीको सदुपयोग गरी मुलुकको समृद्धिमा क्रियाशील हुन युवाहरुलाई प्रेरित गर्नेमा हामी आशावादी छौं ।
अन्त्यमा, हाम्रो यात्रामा सहयोगी बन्दै निरन्तर सहयोग र सद्भाव व्यक्त गर्ने तथा हाम्रा कमजोरीहरु औंल्याइ जिम्मेवार सञ्चार संस्था बन्न प्रेरित गर्ने सबैमा प्रभाव पब्लिकेसन प्रालिको तर्फबाट हार्दिक धन्यवाद गर्दछौं ।
साथै, आजै परेको लोकतन्त्र दिवसको शुभकामना ।
