काठमाडौं– मिर्गौला प्रत्यारोपणका लागि प्रधानमन्त्री केपी ओली त्रिभुवन विश्वविद्यालय शिक्षण अस्पताल महाराजगन्जमा भर्ना भएका छन् । बुधबार मिर्गौला प्रत्यारोपण गर्न सोमबार बेलुका उनी अस्पताल भर्ना भएका हुन् ।
१२ वर्षअघि भारतमा उनको पहिलोपल्ट मिर्गौला प्रत्यारोपण गरिएको थियो भने बुधबार गरिने पत्यारोपण दोस्रोपटक हो । बुधबार उनलाई नाताले भान्जी पर्ने समीक्षाले मिर्गौला दान गर्ने भएकी हुन् । उनी पनि सोमबार नै अस्पतालमा भर्ना भएकी छन् ।
स–सानो रोगको उपचार गर्न नेताहरू र विशेषगरी सरकारमा बस्नेहरूले सरकारी खर्चले विदेशमा उपचार गरेको भनेर अत्यन्तै विरोध गर्दैगर्दा प्रधानमन्त्री ओलीले मिर्गौला प्रत्यारोपण, त्यो पनि दोस्रोपटक (जसलाई अत्यन्तै गम्भीर र जटिल मानिन्छ) नेपालमै गर्ने भएपछि आमनागरिकले उनको स्वास्थ्य लाभ र प्रत्यारोपणको कामना गरिरहेका छन् ।
१२ वर्षअघि प्रधानमन्त्री ओलीका दुवै मिर्गौलाले काम गर्न छाडेपछि भारतमा गएर प्रत्यारोपण गरिएको थियो । ०६४ साउनमा उनको पहिलो मिर्गौला प्रत्यारोपण गरिएको थियो । प्रधानमन्त्री ओलीले त्यसबेला नेपालमा प्रत्यारोपण गर्ने अवस्था नभएकाले भारतमा गर्नुपरेको बताएका छन् ।
अस्पतालमा भर्ना हुनुअघि भिडियो सन्देश जारी गर्दै उनले यस्तो बताएका हुन् । उनले अहिलेको प्रत्यारोपण जटिल नभएको उल्लेख गर्दै आफ्नै मुलुकमा आफ्नै देशका चिकित्सकबाट प्रत्यारोपण गराउन पाउँदा खुसी लागेको बताएका छन् ।
प्रधानमन्त्री ओलीले आफ्नो स्वास्थ्य अवस्थालाई लिएर ढुक्क हुन आम नेपालीलाई आग्रह गरेका छन् । अस्पतालमा भर्ना हुनुअघि एक भिडियो सन्देश जारी गर्दै प्रधानमन्त्री ओलीले १२ वर्षअघि आफ्नो मिर्गौला प्रत्यारोपण गरेको स्मरण गर्दै बुधबार फेरि पनि मिर्गौला प्रत्यारोपण गर्न लागेको बताए ।
उनले आफ्नै मुलुकमा, आफ्नै देशमा प्रत्यारोपण गराउन पाउँदा खुसी भएको बताए । खेलको बीचमा राम्रो खेलाडीले मैदान नछाड्ने भन्दै आफ्नो स्वास्थ्यलाई लिएर ढुक्क हुन सबैलाई आग्रह गरेका छन् । उनले पुनः मिर्गौला प्रत्यारोपणपछि थप ऊर्जा र आत्मविश्वास लिएर काममा फर्किने विश्वास व्यक्त गरेका छन् ।
प्रधानमन्त्री ओलीको मिर्गौला प्रत्यारोपण त्रिवि शिक्षण अस्पतालकै युरोलोजी तथा ट्रान्सप्लान्ट सर्जन प्रा.डा. प्रेमराज ज्ञवाली नेतृत्वको टोलीले गर्नेछ । टोलीमा डा.रमेश सिंह भण्डारी, डा.दिव्या सिंहलगायत छन् । डा.ज्ञवालीका अनुसार सुरु गरेको ३ देखि ५ घन्टामा प्रत्यारोपण सकिन्छ । प्रत्यारोपणपछि बिरामीको अवस्था हेरेर ५–७ दिनमा अस्पतालमा राखिन्छ ।
अस्पताल स्रोतकाअनुसार भारतस्थित अपोलो अस्पतालका एक डाक्टर पनि काठमाडौं आइसकेका छन्, जो १२ वर्षअघि ओलीको मिर्गौला प्रत्यारोपणमा संलग्न थिए ।
यसैबीच, शिक्षण अस्पतालले प्रधानमन्त्री ओली प्रत्यारोपणको छैटौँ दिनमा फर्किन सक्ने जनाएको छ । अस्पतालका निर्देशक प्रेमकृष्ण खड्काले पत्रकारहरूसँग कुरा गर्दै प्रधानमन्त्री ओली पाँच–छ दिनमा फर्किहाल्ने बताए । प्रधानमन्त्री ओलीले ०६४ साउनमा मिर्गौला प्रत्यारोपण गरिएको थियो । त्यसले राम्रोसँग काम नगरेपछि गत कात्तिकदेखि नियमित डायलाइसिस गराउँदै आएका छन् ।
