काठमाडौं– इलाम–२ मा आगामी वैशाख १५ गते हुने उपनिर्वाचनका लागि २० जनाको उम्मेदवारी परेको छ । मुख्य निर्वाचन अधिकृतको कार्यालय इलामले जनाएअनुसार १२ जना राजनीतिक दलका उम्मेदवार छन् । बाँकी आठ जना भने स्वतन्त्र उम्मेदवार हुन् ।
राजनीतिक दलबाट उम्मेदवारी दर्ता गराउनेमा नेकपा एमालेबाट सुहाङ नेम्बाङ, नेपाली कांग्रेसबाट डम्बर खड्का, राष्ट्रिय स्वतन्त्र पार्टीबाट मिलन लिम्बू, नेकपा एकीकृत समाजवादीबाट जितबहादुर राई, जनमत पार्टीबाट प्रेमद्धिप थाम्सुहाङ, नेपाल मजदुर किसान पार्टीबाट श्यामबहादुर दर्जी, मंगोल नेसनल अर्गनाइजेसनबाट मनिबहादुर लिम्बू छन् ।
मुख्य निर्वाचन अधिकृत केशवप्रसाद घिमिरेले राष्ट्रिय प्रजातन्त्र पार्टी (राप्रपा)बाट लक्ष्मी गुरुङ, राप्रपा नेपालबाट गणेशबहादुर चौहान, राष्ट्रिय मुक्ति आन्दोलन दलबाट जयवन्तविक्रम शाह, नेपाली जनता दलबाट रेशमबहादुर सुनार र नेसनल रिपब्लिकन पार्टीबाट धनराज रानामगरको उम्मेदवारी दर्ता भएको बताए । पहिचान पक्षधरबाट स्वतन्त्र उम्मेदवार डकेन्द्रसिंह थेगिमले उम्मेदवारी दर्ता गराएका छन् । अन्य स्वतन्त्र उम्मेदवारहरू डाकप्रसाद गौतम, अर्जुनबहादुर शाही, केशवकुमार चापागाईं, दीपेश बोहोरा, मनोज निरौला, योगेन्द्र गुरुङ र राज बश्याल रहेका छन् ।
शनिबार उम्मेदवारी दर्ता गरेका उम्मेदवारविरुद्ध आज (आइतबार) बिहान १० बजेदेखि ३ बजेसम्म उजुरी दिने, ३ देखि ५ बजेसम्म मनोनयनपत्र र उजुरी जाँचबुझ गरी निर्णय गर्ने कार्यसूची रहेको छ । चैत २६ गते (भोलि) उम्मेदवारको नामावली प्रकाशन गर्ने, चैत २७ गते उम्मेदवारले नाम फिर्ता लिने, अन्तिम नामावली प्रकाशन गर्ने र चुनाव चिह्न दिने निर्वाचन कार्यतालिका रहेको मुख्य निर्वाचन अधिकृत घिमिरेले बताए । निर्वाचनअन्तर्गत मतदान भने वैशाख १५ गते हुने कार्यसूची छ ।
निर्वाचनमा यसपटक सत्ता नेतृत्व दल माओवादी केन्द्रले इलाम–२ मा एमाले उम्मेदवार नेम्बाङलाई समर्थन गर्ने भएको छ । नेत्रविक्रम चन्दको दल नेकपाले पनि नेम्बाङलाई नै समर्थन गर्ने निर्णय गरेको छ । अघिल्लोपटक यहाँ माओवादीले कांग्रेसका उम्मेदवार खड्कालाई समर्थन गरेको थियो । गएको चुनावको नतिजाअनुसार माओवादीसँग कम्तीमा पाँच हजार मत छ । चन्दको दलसँग भने कति मत छ भन्ने यकीन छैन । किनभने यो दलले अघिल्लोपटक चुनावमा भाग लिएन ।
पहिचान पक्षधर स्वतन्त्र उम्मेदवार थेगिमलाई उपप्रधान तथा स्वास्थ्यमन्त्रीसमेत रहेका उपेन्द्र यादव नेतृत्वको जनता समाजवादी पार्टी (जसपा), पूर्वप्रधानमन्त्री डा. बाबुराम भट्टराई नेतृत्वको नेपाल समाजवादी पार्टी (नेसपा), कुमार लिङ्देन नेतृत्वको संघीय लोकतान्त्रिक राष्ट्रिय मञ्च र केपी पालुङ्वा नेतृत्वको राष्ट्रिय जनमुक्ति पार्टीको समर्थन छ । धरानका मेयर हर्कराज साम्पाङले पनि थेगिमलाई समर्थन गरेका छन् । उनले केही दिनअघि इलाम पुगेर थेगिमलाई मत मागिदिएका थिए । करिब आठ हजार मत ‘होल्ड’ गरेको बताइने किरात धर्मगुरु आत्मनन्द लिङ्देनको पनि थेगिमलाई समर्थन रहेको छ । थेगिमलाई लामो समय धर्मगुरु लिङ्देनले किरात धर्म तथा साहित्य उत्थान संघको अध्यक्ष बनाएका थिए ।
उम्मेदवारी दर्ताको क्रममा दलहरूले केन्द्रीय नेताहरूलाई इलाममा उतारेका थिए । एमालेले पूर्वउपसभामुख डा. शिवमाया तुम्बाहाङ्फे, कोशीका पूर्वमुख्यमन्त्री हिक्मतकुमार कार्की, सांसद महेश बस्नेत, माओवादीका पूर्वसांसद धिरेन्द्र शर्मा, नेता कान्छा लावतीलगायत नेताहरूको उपस्थितिमा नेम्बाङको उम्मेदवारी दर्ता गराएको थियो । नेम्बाङ बुबा सुवासचन्द्रको निधनपछि सोही क्षेत्रमा उम्मेदवार बनेका हुन् ।
कांग्रेसका उम्मेदवार खड्काको उम्मेदवारी दर्तामा केन्द्रीय सहमहामन्त्री भीष्मराज आङ्देम्बे, प्रचार विभाग प्रमुख मीन विश्वकर्मा, कोशीका पूर्वमुख्यमन्त्री उद्धव थापालगायत नेता थिए । रास्वपा उम्मेदवार मिलन लिम्बूको उम्मेदवारी दर्तामा उपसभापति डोलप्रसाद अर्याल, सहमहामन्त्रीहरू कबिन्द्र बुर्लाकोटी, विपीन आचार्य, सचेतक निशा डाँगीलगायत नेता थिए ।
नेकपा एकीकृत समाजवादीका उम्मेदवार राईको उम्मेदवारी दर्तामा पूर्वप्रधानमन्त्री तथा पार्टीका सम्मानित नेता झलनाथ खनाल, राप्रपा उम्मेदवार गुरुङको उम्मेदवारी दर्तामा अध्यक्ष राजेन्द्र लिङ्देन र वरिष्ठ उपाध्यक्ष रवीन्द्र मिश्रलगायत नेता पुगेका थिए ।
बझाङमा १२ उम्मेदवार
बझाङ प्रदेशसभा (१) मा हुने उपनिर्वाचनमा १२ जनाले उम्मेदवारी दिएका छन् । नेपाली कांग्रेसबाट अभिषेकबहादुर सिंह, नेकपा एमालेबाट दमनबहादुर भण्डारी, नेकपा माओवादी केन्द्रबाट जनकबहादुर बुढा, नेकपा एकीकृत समाजवादीबाट दिलबहादुर सिंह र जनता समाजवादी पार्टी (जसपा)बाट रामबहादुर जाग्रीले उम्मेदवारी दर्ता गराएका छन् ।
राष्ट्रिय मातृभूमि पार्टीबाट गजेन्द्रबहादुर थापा, संघीय लोकतान्त्रिक राष्ट्रिय मञ्चबाट दीपकबहादुर खड्का, नेपाल मजदुर किसान पार्टीबाट खगेन्द्रबहादुर शाही र नेसनल रिपब्लिक पार्टीबाट कमल घर्तीमगरको पनि उम्मेदवारी दर्ता भएको मुख्य निर्वाचन अधिकृत सुदर्शन लामिछानेले जानकारी दिए ।
उनका अनुसार जनमत पार्टीबाट सुशीला विष्ट, नेपाली जनता दलबाट अशोक सुनार र राष्ट्रिय प्रजातन्त्र पार्टी (राप्रपा)बाट किशोरकुमार खड्काले उम्मेदवारी दर्ता गराएका छन् । सडक दुर्घटनामा परी सुदूरपश्चिम प्रदेशका आन्तरिक मामिलामन्त्रीसमेत रहेका सांसद पृथ्वीबहादुर सिंहको निधन भएपछि यहाँ उपनिर्वाचन हुन लागेको हो । उपनिर्वाचन आगामी १५ वैशाखमा हुने छ ।
