- एमाले, रास्वपा र पहिचान पक्षधरको उम्मेदवार टुंगो, चुनावी मैदानमा सक्रिय
- रास्वपा उम्मेदवार लिम्बूलाई सभापति रविले मागे मत
- कांग्रेस र माओवादीको उम्मेदवार टुंगो हुन बाँकी
काठमाडौं– इलामलाई उपनिर्वाचनले छपक्कै छोपेको छ । केन्द्रीय नेताहरू धमाधम इलाम पुगिरहेका छन् । उम्मेदवार घोषणा गर्ने क्रम जारी छ । केही दलको भने उम्मेदवार तय हुन बाँकी छ । उम्मेदवार घोषणा गरेका दलहरूले त मत नै माग्न थालिसके ।शनिबार राष्ट्रिय स्वतन्त्र पार्टी (रास्वपा)का सभापति रवि लामिछानेले इलाम पुगेर आफ्ना दलका उम्मेदवार मिलन लिम्बूलाई मत मागे । निर्वाचन जिताएर संसद्मा पठाउन इलाम–२ वासीसँग याचना गरे । त्यसक्रममा उनले दल परिवर्तन गर्न आवश्यक नभएको पनि बताए ।
‘पार्टीहरूले नेता र उम्मेदवारहरू त दिए । तर, उनीहरूले अवसरलाई व्यक्तिगत लाभलाई प्रयोग गरेर मुलुकलाई हरिकंगाल बनाए । जसले मुलुकको यो हालत बनाए, उनैलाई भोट त म दिन्नँ भन्नुुस्,’ उनले इलाम पुगेर भने, ‘म स्पष्ट आग्रह गर्छु तपाईंहरूलाई पार्टी त्याग्न पर्दैन, अब घण्टी चुनाव चिह्न आएको छ, अब सोच्नु पर्दैन ।’लामिछानेले हालसम्म व्यक्ति र पार्टीले मात्रै इलामबाट चुनाव जितेको बताए । जनता र इलामले चुनाव जितेको भए इलामवासी समस्यैसमस्यामा गुज्रिनु पर्दैनथ्यो भनेका छन् ।
रास्वपा उम्मेदवार लिम्बूले पनि आफू इलामे माटो, अबकरे, अर्थोडक्स चियाको उम्मेदवार भएको बताउँदै मत दिन आग्रह गरे । जनमतको सम्मान गर्ने र इलामे जनताप्रति अति बफादार हुने पनि बताए । इलाम–२ को उपचुनावमा एमालेबाट सुहाङ नेम्बाङ उम्मेदवार छन् । उनले पनि घरदैलो अभियान सुरु गरेका छन् । जनवादी गीत बजाउँदै उनी घरदैलो अभियानमा छन् । उनी आफ्नै पिता स्वर्गीय सुवासचन्द्र नेम्बाङको चुनाव क्षेत्रमा एमाले उम्मेदवार बनेका हुन् । उनी पेसाले अधिवक्तासमेत हुन् । हालै राजनीतिमा सक्रिय भएका सुहाङले आफ्नो पक्षमा चुनावी माहोल बनाउन प्रयसा गरिरहेका छन् ।
गत वर्षको मंसिरमा भएको प्रतिनिधिसभा चुनावमा दोस्रो स्थान हासिल गरेको कांग्रेसबाट भने उम्मेदवार टुंगो लागेको छैन । सहमहामन्त्री भीष्मराज आङ्देम्बेका अनुसार आइतबार कांग्रेस संसदीय बोर्डको बैठक बस्दै छ । बोर्डको बैठकले उम्मेदवार टुंगो लगाउने उनले बताए । त्यहाँ यसअघि चुनाव लडेका इलाम कांग्रेस सभापति डम्बर खड्कादेखि नेताहरू भेषराज आचार्य, केशव थापा, रमेश लिङ्देनलगायत चुनावी मैदानमा छन् ।
पार्टी सभापति शेरबहादुर देउवाले यसपटक चुनाव जित्ने उम्मेदवार अघि सार्ने बताउँदै आएका छन् । बुधबारमात्रै आकांक्षीहरूसँग उनले सम्वाद गरेका थिए । राजेन्द्र लिङ्देन नेतृत्वको राप्रपाले भने त्यहाँ लक्ष्मी गुरुङलाई उम्मेदवार बनाएको छ । पहिचान पक्षधरहरूले प्रदेश १ पुनःनामंकन संघर्ष समिति संयोजक डकेन्द्रसिंह थेगिमलाई उम्मेदवार बनाइसकेको छ । माओवादी केन्द्रले केन्द्रमा आकांक्षीहरूको नाम पठाइसकेको छ । तर, उम्मेदवार टुंगो लगाएको छैन । यहीबीच एमाले अध्यक्ष केपी शर्मा ओलीले माओवादीले सुहाङलाई समर्थन गर्ने बताएका छन् । उपनिर्वाचन १५ वैशाखमा हुने छ ।
-1752335779.jpg)
