- यसअघि १२ जनाको मृत्यु भएकोमा बिहीबार परराष्ट्रले थप सात जनाको मृत्यु भएको पुष्टि गरेको हो
- नेपाली नागरिकसँग गरेको सम्पूर्ण सम्झौता रद्द गर्न रुसी सेनालाई परराष्ट्र मन्त्रालयको अनुरोध
- नेपालीको अवस्था बुझ्न परराष्ट्रमन्त्री आफैं रुस जान इच्छुक
काठमाडौं– केही दिनअघि रुसी सेनामा भर्ना भएका नेपालीहरुले नेपाल सरकारले उद्धार गरिदिन भारत सरकारसामु याचना गरेका थिए । उनीहरुको बिलौना थियो– नेपाल सरकारले केही गर्न सकेन ।
‘हमारे नेपालसे कुछ नहीं हो रहा है । हम चाहते हैं कि यहां मौजूद सभी नेपाली अपने वतन लौट चाहते हैं,’ भारत सरकारको भरोसा गर्दै रुसी सेनाको कम्ब्याट लगाएका उनीहरुले हिन्दी भाषामै भन्दै थिए, ‘नेपाल और भारतके बीच अच्छे सम्बन्ध हैं । भारत और भारतीय दूतावास शक्तिशाली हैं । इसलिए हम आपसे मद्दत माँगना चाहते हैं ।’
आफू ३० जनाको टोलीमा आएकामा अब समूहमा पाँच जनामात्र बाँकी रहेको ती युवाले भिडियो सन्देशमा बताएका छन् । भारत गुहारेको भिडियो सन्देश आएको केही दिनमै सरकारले रुसी सेनामा भर्ना भएका थप सातजना नेपालीको मृत्यु भएको पुष्टि गरेको छ ।
रुसी सेनामा रहेका नेपालीलाई फिर्ता गराउन सरकारले उच्च प्राथमिकताका साथ कूटनीतिक प्रयास जारी राखेको उल्लेख गर्दै बिहीबार परराष्ट्रले सातजनाको मृत्यु भएको पुष्टि गरेको हो ।
‘रुसी सेनामा ज्यान गुमाएका नेपालीहरुको परिवारलाई रुसी सरकारबाट क्षतिपूर्ति उपलब्ध गराउन, घाइतेको उपचार गर्न तथा त्यहाँ कार्यरत नेपालीलाई फिर्ता पठाउनका लागि रुसी सरकारलाई पुनः अनुरोध गरिएको छ,’ परराष्ट्रको विज्ञप्तिमा भनिएको छ, ‘नेपाल सरकारको उपरोक्त प्रयासहरुका बावजुद रुसी सेनामा कार्यरत थप सातजना नेपाली नागरिकहरुको ज्यान गुमाउनुभएको दुःखद समाचार प्राप्त भएको छ ।’
परराष्ट्रका अनुसार धादिङका पूर्णबहादुर गुरुङ, जाजरकोटका नवीन शाही, उदयपुरका पदमबहादुर घिमिरे, झापाका गंगाराम अधिकारी, बागलुङका जितबहादुर विक, बाँकेका सञ्जय केसी र रसुवाका सुन्दर मोक्तानको मृत्यु भएको हो ।
सरकारले गत पुस ४ गते सार्वजनिक सूचना जारी गरेर सरकारी कामकाज, रुसी सरकारको छात्रवृत्ति तथा पेसा व्यवसायमा संलग्न भएकालाई बाहेक अन्य सर्वसाधारण नागरिकलाई रुस यात्रा गर्नुपरेमा ‘नो अब्जेक्सन सर्टिफिकेट’ (एनओसी) लिएर मात्र यात्रा गर्ने प्रावधान मिलाउन सम्बद्ध सबैलाई पुनः स्मरण गराएको थियो ।
यसअघि १२ जना नेपालीको मृत्यु भइसकेको परराष्ट्रले पुष्टि गरिसकेको छ । मंसिर १८ गते विज्ञप्ति जारी गर्दै परराष्ट्रले छ जनाको मृत्यु भएको जनाएको थियो । त्यतिबेला गोरखाका सन्दीप थपलिया, कपिलवस्तुको वाणगंगा–१ का रूपक कार्की, पोखराका देवान राई, स्याङ्जा पुतलीबजार–५ का पितम कार्की, दोलखाको मेलङ–६ का राजकुमार रोका र इलामका गंगाराज मोक्तानको ज्यान गएको परराष्ट्रले जनाएको थियो ।
त्यसपछि पुस १७ गते स्याङ्जाका हरिप्रसाद अर्याल, कैलालीका भरबहादुर शाह र धादिङका राजकुमार गिरीको निधन भएको मन्त्रालयका प्रवक्ता अमृतबहादुर राईले जनाएका थिए । यसैगरी रुसी सेनामा भर्ती भएका केही नेपाली युक्रेनको कब्जामा रहेको बताइएको छ ।
उपप्रधान तथा परराष्ट्रमन्त्री नारायणकाजी श्रेष्ठले रुसी सेनामा रहेका नेपालीलाई फर्काउन, ज्यान गुमाएका नेपालीहरूको शव स्वदेश फर्काउन र पीडितका परिवारलाई क्षतिपूर्ति अविलम्ब उपलब्ध गराउन रुसका विदेशमन्त्री सर्गेइ लाभ्रोभलाई अनुरोध गरेका थिए । फागुन २४ गते लाभ्रोभसँग टेलिफोनमार्फत कुराकानी गर्दै मन्त्री श्रेष्ठले रुसका विदेशमन्त्रीसँग उक्त अनुरोध गरेका थिए । यसैगरी मन्त्री श्रेष्ठले बुधबारमात्र यस विषयमा विस्तृत बुझ्न रुसी राजदूत अलेक्सेई नोभिकोभसँग भेटेका थिए । राजदूत नोभिकोभसँग श्रेष्ठले आफू रुस जाने इच्छासमेत व्यक्त गरेका छन् ।
कति नेपाली रुसी सेनामा संलग्न छन् भन्ने जानकारी सरकारसँग छैन । यस्तो अवस्थामा रुसले नेपालीसँग गरेको सबै सम्झौता रद्द गर्न मन्त्री श्रेष्ठले माग गरेका छन् । ‘रुसी सेनामा कति सेना छन् सरकारलाई थाहा छैन । रुसी सेनामा नेपालीले गरेका सम्झौता रद्द गर्नसमेत हामीले अनुरोध गरेका छौं,’ श्रेष्ठले भनेका छन् । यसअघि तत्कालीन परराष्ट्रमन्त्री नारायणप्रकाश साउद पनि रुस जाने इच्छा देखाएका थिए । तर गठबन्धन परिवर्तन भएसँगै साउद पदमुक्त भए ।
