आवेगमा जुत्ता प्रहार गरेँः तिरुवा
काठमाडौं– नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’माथि कार्यक्रम स्थलमै जुत्ता प्रहार भएपछि आइतबार खैलाबैला भयो । अध्यक्ष दाहाललाई रतन तिरुवा नामका युवाले जुत्ता प्रहार गरेका थिए । जुत्ता प्रहार गर्ने रतन तुरुन्तै पक्राउ पनि परे । आखिर को हुन् रतन ? किन अध्यक्ष दाहालमाथि यिनले जुत्ता प्रहार गरे ?
यो कौतुहलतालाई नेकपा जिल्ला अध्यक्ष जुम्लाका बिरबहादुर कुव“रले स्पष्ट पारेका छन् । उनका अनुसार पूर्वप्रधानमन्त्री समेत रहेका नेकपाका अध्यक्ष प्रचण्डमाथि जुत्ता प्रहार गर्ने नेत्रविक्रम चन्द विप्लव समूहका समर्थक हुन् ।
नेकपा जुम्लाका अध्यक्ष कुँवरले उनी बाहिर हल्ला भएजस्तो शहीद पुत्र नभएको जानकारी दिएका छन् । आइतबार दिउँसो काठमाडौंको प्रदर्शनीमार्गस्थित राष्ट्रियसभा गृहमा प्रचण्डमाथि २२ वर्षीय तिरुवाले जुत्ता प्रहार गरेका थिए ।
रनत जुम्लाको सिँजा गाउँपालिका–२ घोर्डिङाका मनु तिरुवाका छोरा भएको थाहा भएको छ । उनी पूर्वलडाकु वा नेकपाकै कार्यकर्ता रहेको भनी गरिएको प्रचार निराधार रहेको नेकपाका जुम्ला अध्यक्ष कुँवरले बताएका छन् । ‘उनी प्रहरीसमक्ष आफू पूर्वलडाकु र शहीदको छोरा रहेको भनेको सुन्नमा आएको छ’ कुँवरद्वारा जारी विज्ञप्तिमा भनिएको छ, ‘माओवादी जनयुद्ध रोकिएको नै १४ वर्ष भइसक्यो, २२ वर्षको मान्छे कसरी पूर्वलडाकु भयो ?।’
उनका बाबुको मृत्यु भएको साँचो भएपनि उनी युद्धमा मारिएको नभई अर्कै कारणले त्योपनि भारतमा मृत्य भएको कुँवरको दावी छ । यसबारे सत्तारुढ दल नेकपा जुम्लाले आइतबार नै प्रेस विज्ञप्ति जारी गरेको हो ।
विज्ञप्तिमा रनत तिरुवा शहीद परिवार वा नेकपाको कर्ताकर्ता नभएको स्पष्ट पारिएको छ । रनत यसअघि पनि अराजक गतिविधिमा संलग्न रहेको र प्रहरीले खोजी गरिरहेका व्यक्ति भएको नेकपा जुम्लाले दावी गरेको छ ।
यसैबीच अध्यक्ष प्रचण्डलाई जुत्ता हानेको अभियोगमा पक्राउ परेका तिरुवाले नेकपा प्रचण्डले गरेको वर्गसंघर्षको कुराले आफूलाई आक्रोशित बनाएपछि जुत्ता प्रहार गरेको बताएका छन् । तर, उनले प्रहार गरेको जुत्ताले भने प्रचण्डलाई लागेन । तैपनि उनी प्रहरी फन्दामा परेका छन् ।
प्रहरी नियन्त्रणमा रहेका उनले पत्रकारहरूसँग भने, ‘प्रचण्डले भाषणको क्रममा गरेको बर्गसंघर्षको कुरा चित्तै नबुझेकाले आवेगमा जुत्ता हानेको प्रहार गरेको हुँ । यस सन्दर्भका अध्यक्ष दाहालले भने कुनै आधिकारिक प्रतिक्रिया दिएका छैनन् । तर, उनी निकट स्रोतका अनुसार दाहालले आफूमाथि भएको जुत्ता प्रहार जनताको आक्रोश भएको बताएका छन् । स्रोतले भन्यो, ‘उहाँले उक्त घटनालाई सामान्यरूपमा लिनुभएको छ ।’
