काठमाडौं– उद्योगी अरुण चौधरीलाई बाँसबारी छालाजुत्ता कारखानाको १० रोपनी जग्गा फिर्ता गर्न मालपोत कार्यालयले पत्र काटेको छ । मालपोत कार्यालय डिल्लीबजारले च्याम्पियन फुटवेयरको नाममा उद्योगी चौधरीलाई चाँडो जग्गा फिर्ता गर्न पत्र काटेको हो ।
मालपोत कार्यालयले बुधबार काटेको पत्रमा चाँदबाग स्कुल, बाँसबारी सञ्चालक समितिका अध्यक्ष सञ्जय ठकुरलाई पनि उपस्थित हुन भनेको छ । डलर अर्बपति विनोद चौधरीका भाइ अरुणलाई बाँसबारी छालाजुत्ता कारखानाको १० रोपनी जग्गा घोटाला गरेको आरोपमा नेपाल प्रहरीको केन्द्रीय अनुसन्धान ब्युरो (सिआइबी) को माघ १८ गते पक्रेको थियो । उनीसहित सिआइबीले तत्कालीन सञ्चालक समिति अध्यक्ष अजितनारायणसिंह थापा र चाँदबागका अध्यक्ष ठाकुरलाई पक्रेको थियो ।
तीनै जनालाई जिल्ला अदालत काठमाडौंको आदेशपछि बुधबार नै जमानीमा रिहा गरेको थियो । अदालतको आदेशअनुसार रिहा भएपछि सीआईबीले २५ दिनभित्र अनुसन्धान सकेर मुद्दा बुझाउनुपर्ने बाध्यता नरहेको बताएको छ ।
किर्ते गरी सरकारी जग्गा हिनामिना गरेको कसुरमा भइरहेको अनुसन्धानलाई थप गति दिने तयारी प्रहरीको छ । सीआईबीले अब एक वर्षसम्म यो प्रकरणको अनुसन्धान गर्न पाउँछ । यो बीचमा अन्य संलग्नको पनि खोजी हुने भएको हो । अहिले हिरासत मुक्त भएकाहरुले पनि अभियोगबाट उन्मुक्ति नपाउने सीआईबीका प्रहरी उपरीक्षक नवराज अधिकारीले बताए ।
मालपोतले बाटोको म्यादबाहेक २१ दिनभित्र डिल्लीबजार आइपुग्न निर्देशन दिएको छ । ‘२०८० माघ २२ को पत्रानुसार उक्त जग्गा नेपाल सरकारका नाममा श्रेष्ता अध्यावधिक गरी ल्याउन २०८० माघ २४ को आदेश मबोमिज त्यस प्रालिका नाममा यो पत्र लेख्ने कार्य भएको छ । पत्र प्राप्त भएको मितिलिे बाटोको म्याद बाहेक २१ दिनभित्र आफै वा वारेस मुकरर गरी कार्यालय समयभित्र उपस्थिति हुनु होला,’ डिल्लीबजार मालपोत कार्यालयका मालपोत अधिकृत बोगराज शर्मा कट्टेलले जारी गरेको पत्रमा भनिएको छ ।
पत्र बुझिसकेको चाँदबाग स्कुलले जनाएको छ । सीआईबीले बाँसबारीमा रहेको सरकारी जग्गा हड्पिएकोबारे डिल्लीबजार मालपोत कार्यालयलाई लिखित जानकारी गराएको थियो । सरकारको निर्णयविनै १० रोपनीमा चाँदबाग रेसिडेन्सीको नाममा व्यक्तिगत बनाएको भन्दै सीआईबीले जफतका लागि जानकारीसहित पत्राचार गरेको हो । उनीहरुमाथि २०४३ सालमा स्थापित च्याम्पियन फुटवेयरको नाममा सरकारी स्वामित्वको जमिन २०५१ सालका व्यक्तिको बनाएको आरोप छ ।
पक्राउ परेपछि अरुणले आफूहरुले सरकारी जग्गा हिनामिना गरेको स्विकारेको प्रहरीको दाबी छ । ‘हाम्रो लगानीअनुसार बाँसबारी छालाजुत्ता कारखानाले जग्गा दिएको थियो । तर, सो जग्गा अहिले च्याम्पियन फुटवेयर हुँदै अर्को कम्पनीको नाममा आएको हो । उक्त जग्गा फिर्ता गर्न म तयार छु,’ सिआइबीसँग हिरासत रहेका बेला चौधरीले भनेको प्रहरीको दाबी छ ।
चौधरी च्याम्पियन फुटवेयरको लगानीकर्ता हुन् । च्याम्पियन फुटवेयर स्थापना गरेको त्यहाँको १० रोपनी जग्गा बाँसबारी छाला जुत्ता कारखानाको कम्पाउन्ड हो । उक्त जग्गामा चौधरी समूहले चाँदबाग स्कुल सञ्चालन गरेको छ । बाँसबारी छाला जुत्ता कारखानालाई २५ प्रतिशत शेयर दिने गरी चौधरी समूहले च्याम्पियन फुटवेयर स्थापना गरेको थियो ।
