चौतरा– नेपाल कम्युनिस्ट पार्टी(नेकपा)का अध्यक्ष पुष्पकमल दाहाल ‘प्रचण्ड’ पछिल्लो समय पार्टीभित्र देखिएको विवादलाई ढाकछोप गर्ने समाधान गर्ने प्रयासमा लागेका छन् । नेकपाभित्रै विवादमा रहेको एमसीसीबारे उनले अध्ययन गरी आवश्यक संशोधनपछि मात्र पास गरिने बताए ।
शनिबार सिन्धुपाल्चोकस्थि प्रथम सुकुटे महोत्सवको उद्घाटन गर्दै अध्यक्ष दाहालले अध्ययन नै नगरी त्यसको बिरोध वा समर्थन गर्नुको कुनै औचित्य नभएको बताए । मुलुकको हितविपरीत हुने बुँदालाई संशोधन गरी पास गर्न सकिन्छ भन्ने पार्टीको धारणा रहेको उनको भनाइ छ ।
पूर्वप्रधानमन्त्री समेत रहेका दाहालले ५५ अर्बको लागि आफ्नो राष्ट्रिय हितविपरीत सम्झौता नहुने बताए । उनले भने, ‘संशोधन नगर्दा अघि बढ्न कठिन छ । त्यसैले केही बुँदा परिमार्जन गरेरमात्र सम्झौता हुन्छ ।’
यस्तै, पछिल्लो समय नेकपाभित्र विवादको विषय बनेको नेता वामदेव गौतमबारे समेत मुख खोलेका छन् । उनले उक्त विषयबारे विवाद गर्नु गलत रहेको धारणा राखे । उनले एकाध नेताले निहुँ खोज्दैमा पार नलाग्ने बताउँदै राष्ट्रिय सभाबाट प्रधानमन्त्री बन्न पाउनेगरी संविधान संशोधन गर्ने उपाध्यक्ष गौतमको व्यक्तिगत चाहना भएको बताए । संविधान संशोधनको शर्त फिर्ता लिएपछिमात्र वामदेवलाई राष्ट्रियसभामा पठाउने निणय भएको उनको भनाइ थियो ।
अध्यक्ष दाहालले नारायणकाजी श्रेष्ठ, वामदेव गौतमजस्ता मान्छे संसदमा पठाउँदा राष्ट्रियसभाको इज्जत बढ्ने दावी गर्दै भने, ‘चुनाव हार्दैमा उहाँलाई अयोग्य भन्न मिल्दैन ।’ अध्यक्ष दाहालले कार्यक्रममा सुकुटेसँग आफ्नो भावनात्मक सम्बन्ध रहेको समेत बताए । स्मरणीय के छ भने अध्यक्ष दाहाल मानसिक तनाव पर्नेवित्तिकै सुकुटे पुग्ने गरेका छ । उक्त कुराको समेत उनले स्मरण गरेका थिए ।
यसैबीच नेकपाका वरिष्ठ नेता झलनाथ खनालले पार्टीको सचिवालयले गरेको निर्णय सबैले मान्नुपर्ने बताएका छन् । शनिबार विदुरमा प्रेस संगठन नेपालले आयोजना गरेको पत्रकार सम्मेलनमा नेता खनालले पार्टीको सचिवालयले गरेको निर्णयमा सबैले मान्नुको विकल्प नभएको बताए ।
पार्टी सचिवालयले वामदेव गौतमलाई राष्ट्रियसभामा मनोनीत गर्न गरेको निर्णयलाई प्रधानमन्त्री केपी ओलीले अस्वीकार गरेको भन्ने विषयमा पत्रकारले सोधेको प्रश्नको उनले भने, ‘पार्टीको निर्णय सबैले मान्नुपर्छ, प्रधानमन्त्रीले मान्नु नपर्ने, अरुले मान्नुपर्ने हुँदैन, पार्टीको निर्णयभन्दा बाहिर कोही जान पाउँदैन ।’
