विराटनगर– मोरङमा शनिबार दुर्घटनामा तीन जनाको मृत्यु भएको छ । पथरी शनिश्चरे–२ जय चौकस्थित पूर्व–पश्चिम राजमार्गमा रोकेर राखेको गोरु लोड गरिएको ट्रकमा अर्को ट्रक पछाडिबाट ठोक्किँदा दुई जनाको मृत्यु भएको छ ।
करिब बिहान ७ बजेतिर पश्चिमबाट पूर्वतर्फ आउँदै गरेको प्रदेश १–०२–००१ ख ८०९१ नम्बरको ट्रकले सडकमा रोकेर राखेको गोरु लोड गरिएको ना ८ ख ६७ नम्बरको ट्रकलाई ठक्कर दिएको थियो । सो दुर्घटनामा ट्रकका चालक चितवन भरतपुर नगरपालिका–११ का २८ वर्षीय अजय अधिकारी र सहचालक भरतपुर–१ कै ३० वर्षीय अंकित घर्तीमगरको मृत्यु भएको इलाका प्रहरी कार्यालय पथरीका डीएसपी दिलिप गिरीले जनाए ।
दुर्घटनामा चालक अधिकारीको घटनास्थलमै र सहचालक घर्तीमगरको उपचारका क्रममा झापाको बिर्तामोडस्थित बीएण्डसी अस्पतालमा मृत्यु भएको प्रहरीले जनाएको छ । ठक्कर दिने ट्रक नवलपरासीबाट ७ सय ५० कार्टुन गोर्खा स्ट्रङ वियर लिएर झापातर्फ जाँदै गरेको थियो ।
पथरीका डीएसपी दीलिप गिरीका अनुसार ठक्कर दिने ट्रक तीव्र गतिमा रहेको र नियन्त्रण गुमाएर दुर्घटना भएको थियो । लामो रुटमा एक जनामात्रै चालकले कुदाएको र चालकको निद्रा नपुगेका कारण अगाडि रहेको अर्को ट्रक ठम्याउन नसक्दा पनि ठोक्किएको हुन सक्ने उनको दावी छ । रोकेर राखेको ट्रकमा भने जीवित र मृत गरेर २८ वटा गोरु भेटिएका छन् । जसमा चारवटा मरेका र २४ वटा जीवितै थिए ।
‘वियर लोड गरेको ट्रकले अर्कोलाई ठक्कर दिँदा भएको दुर्घटनामै गोरु मरेका हुन सक्छन्,’ उनले भने, ‘२४ वटा जीवितै भेटिएका पनि सबै घाइते अवस्थामा छन् ।’ गोरु सर्लाहीको लालबन्दीस्थित पशु हाटबजारबाट खरिद गरेर ल्याइएको खुलेको प्रहरीको भनाइ छ । प्रारम्भिक अनुसन्धानबाट प्रक्रिया पूरा गरेरै झापाको घैलाडुब्बातर्फ गोरु लिएर गएको खुलेको प्रहरीको भनाइ छ ।
डीएसपी गिरीले सर्लाहीबाट निरजकुमार सिंहले चौपाय खरिद बिक्री केन्द्रबाट पठाएका गोरु झापा दमकका जीवन कार्कीले ल्याएको खुलेको जानकारी दिए । पाँच हजारका दरले एक लाख ४० हजार रूपैयाँमा सबै गोरु खरिद गरेको बिल पनि साथमै रहेको उनको भनाइ छ । गोरु लोड गरिएको ट्रक र त्यसका चालक सर्लाहीको हरिवन नगरपालिका–७ का ३७ वर्षीय हिरणराज वम्जनलाई नियन्त्रणमा लिएर घटनाका बारेमा बाँकी अनुसन्धान गर्ने काम भइरहेको प्रहरीले जनाएको छ ।
यस्तै, शनिबार नै विराटनगर महानगरपालिका– १ बुद्धचौकमा को २८ प ६८४७ नम्बरको मोटरसाइकलले ठक्कर दिँदा पैदल यात्रु ४० वर्षीया रमा पौडेलको मृत्यु भएको छ । दुर्घटनामा गम्भीर घाइते भएकी उनको उपचारका क्रममा विराट नर्सिङ होममा मृत्यु भएको मोरङ प्रहरीका प्रवक्ता डीएसपी मानबहादुर राईले बताए । दुर्घटनामा झापा गौरीगञ्ज घर भइ विराटनगरमा डेरा बस्दै आएका मोटरसाइकल चालक १९ वर्षीय विकाश कर्ण पनि गम्भीर घाइते भएका छन् ।
