- मंसिर १४ गतेबाट एमालेले सुरू गरेको झुलाघाट–चिवाभञ्ज्याङ यात्रा पुस १ गते सकाएको थियो
- रास्वपाले पुस ९ गतेदेखि तीन दिनसम्म नारायणगढ–बुटवल दबाब यात्रामा ११३ किलोमिटर यात्रा तय गरेको थियो
- यही शैलीमा कांग्रेस महामन्त्री गगन थापाले माघ १३ गतेबाट ‘मेची–महाकाली संवाद यात्रा’ गर्ने गरी प्रचार थालेका छन्
काठमाडौं– सरकार कार्यसम्पादनमा असफल छ । तर न त प्रमुख प्रतिपक्षीको विरोध छ न सत्तापक्षभित्रको असन्तुष्ट पक्षको । त्यसैले प्रधानमन्त्री पुष्पकमल दाहाल सिंहदरबारमा ढुक्कले सरकार हाँकिरहेका छन् ।
दाहाल कहिले निर्देशनको चाङ लगाउँछन् त कहिले प्रतिबद्धता नै बिर्सेर दर्जनौं कार्यक्रम उद्घाटन गर्न पुग्छन् । यही मौकामा विरोध गर्ने कुनै मेलोमेसो नमिलेपछि प्रमुख प्रतिपक्षी दल नेकपा एमाले झुलाघाट–चिवाभाञ्ज्याङ यात्रामा निस्कियो ।
मंसिर १४ गतेबाट सुरू भएको यात्रा पुस १ गते सकिएको थियो । उक्त यात्रापछि एमालेले सरकारको आलस्यताबारे खासै केही भन्न सकेनन् । बरु पछिल्ला दिनहरुमा एमाले अध्यक्ष ओलीले आन्दोलन गर्ने चेतावनी दिइरहेका छन् । अघिल्लो बिहीबारमात्र ओलीले सरकार बुख्याचा जस्तो भएको आरोप लगाउँदै कार्याकर्तालाई आन्दोलनका लागि तयार रहन निर्देशन दिएका थिए । यद्यपि राष्ट्रिय सभा निर्वाचनका कारण ओलीको बोली सेलाएको छ ।
ठ्याक्कै ओलीलेझैँ राष्ट्रिय स्वतन्त्र पार्टी (रास्वपा)ले पनि नारायणगढ–बुटवल यात्रा पूरा गरेको छ । यहाँको सडक समयमा बनोस् भनेर रास्वपा अध्यक्ष रवि लामिछानेसहितका नेताहरुले दबाब यात्रा तय गरेका थिए । पुस ९ गतेदेखि तीन दिनसम्म भएको उक्त यात्राका क्रममा रास्वपाले ११३ किलोमिटर यात्रा तय गरेको थियो । सो यात्रापछि रास्वपाले विभिन्न आयोजनामा पनि यसरी नै दबाब यात्रा आयोजना गर्ने जनाएको छ । रास्वपाले पनि सुस्त सरकारको विषयमा खासै विरोध गर्न सकेको छैन । हुन त आफैं चोखिनका लागि हर प्रयास गरिरहेको पार्टीले सरकारको विरोध गर्नु निकै परको कुरा भएको राजनीतिक विश्लेषकहरु बताउँछन् ।
ओली र रविको सिको गर्दै नेपाली कांग्रेसका महामन्त्री गगन थापाले पनि देश दर्शन गर्ने भएको छन् । ‘मेची–महाकाली संवाद यात्रा’ नाम दिइएको उक्त यात्रामा कांग्रेसबाट गगन एक्लै हिँड्ने तयारीमा छन् । यो यात्रा माघ १३ गते झापाबाट सुरू हुने गगनको सचिवालयले जनाएको छ । ‘जनताका कुरा सुन्ने मेची–महाकाली संवाद यात्रा माघ १३ गते झापा भद्रपुर मेचीपुलबाट सुरू भएर मोरङ, सुनसरी, सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, चितवन, नवलपुर, नवलपरासी, रूपन्देही, कपिलवस्तु, दाङ, बाँके, बर्दिया, कैलाली हुँदै कञ्चनपुरसम्म पुग्ने छ,’ गगनको सचिवालयले भन्यो ।
कांग्रेसले यसअघि नै तय गरेको समुदायमा कांग्रेस अभियान माघ १२ बाट सुरू हुँदै छ ।
यो अभियान हुँदाहुँदै गगनले भने आफ्नै अभियान सुरू गर्नु अचम्मको विषय भएको कांग्रेसकै नेताहरु बताउँछन् । यसो त कांग्रेसमा प्रतिपक्षी बन्ने लाइनमा छन् गगन । १४औं महाधिवेशनमा डा. शेखर कोइराला समूहबाट महामन्त्रीमा भिडेका उनले भागबण्डा नपाएको भन्दै असन्तुष्टि जनाउँदै आएका छन् । यही मेसोमा गगनले संवाद यात्राको डिजाइन गरेको बताइएको छ ।
महामन्त्री थापाले भने कांग्रेसकै कार्यक्रमअन्तर्गत आफूले यो संवाद यात्राको थालनी गर्न लागेको बताएका छन् । ‘माघ १२ माघदेखि कांग्रेसले समुदायमा कांग्रेस अभियान सञ्चालन गर्दै छ । त्यही अभियानअन्तर्गत हुलाकी राजमार्गले छोएका जिल्लाका नागरिकको कुरा सुन्न संवाद यात्रा गर्न लागेको हो,’ थापाले भने । थापाले पनि बेलाबेला सरकारको मन्त्रीहरुको काम राम्रो नभएको भन्दै असन्तुष्टि जनाउँदै आएको छ ।
-1752335779.jpg)
