कुन दलबाट को–को उम्मेदवार
नेकपा एमाले
रुक्मिणी कोइराला, पर्शुराम अधिकारी, उषादेवी थरुनी, रोचकुमारी चौलागाई, विजेता झा, त्रिलोचन निर्मल पौडेल, विवेक देवकोटा, ध्रुवराज विश्वकर्मा, सम्झना देवकोटा, चक्रबहादुर पराजुली, हेमन्द्र शेरचन, तुलसाकुमारी केसी, झपेन्द्रबहादुर घर्ती क्षेत्री, विमलाकुमारी शाही, डिल्लीप्रसाद भट्ट, हिक्मत विक, सावित्रादेवी घिमिरे, ईश्वरीप्रसाद खरेल र रामचन्द्र जोशी
नेपाली कांग्रेस
कृष्णप्रसाद सिटौला, आनन्दप्रसाद ढुंगाना, विष्णुदेवी पुडासैनी, जीतजंग बस्नेत, कृष्ण रोकाया, नारायणदत्त भट्ट, बलदेव बोहरा, पदमबहादुर परियार, किरणबाबु श्रेष्ठ र विष्णुदेवी सापकोटा
माओवादी केन्द्र
चम्पादेवी कार्की, श्रीकृष्ण अधिकारी, मनरुपा शर्मा, विष्णु विक, झक्कु सुवेदी र रेणु चन्द
राप्रपा
उद्धव पौडेल, हेमजंग गुरुङ, नानु नगरकोटी, भरतमणि भट्ट, पूर्णबहादुर विश्वकर्मा, गौमाया श्रेष्ठ, रोमबहादुर भण्डारी र विजयलक्ष्मी सिंह
नेमकिपा
हिमालयश्वर मूल, श्रीकृष्ण महर्जन, संगीता नेपाली र कृष्ण लक्ष्मी दुवाल
नेकपा एकीकृत समाजवादी
घनश्याम रिजाल र सावित्री मल्ल
जसपा
पूजा चौधरी
जनमत
रामशंकर महासेठ र बालगोविन्द चौधरी
तथ्यांकमा निर्वाचन
सिट – १९
उम्मेदवार – ५१
मतदाता – २०४७ जना
मतभार – ५७,५५९
मतदानस्थल – ७
मतदाना केन्द्र– १४
प्रदेश सांसद मतभार– ५३
स्थानीय तहका जनप्रतिनिधि मतभार– १९
काठमाडौं– राष्ट्रिय सभा निर्वाचन आज हुँदै छ । चुनावी मैदानमा सत्तारुढ दलहरु नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र जनमत पार्टी छन् ।
प्रमुख प्रतिपक्षी दल नेकपा एमाले, राष्ट्रिय प्रजातन्त्र पार्टी (राप्रपा) र नेपाल मजदुर किसान पार्टी (नेमकिपा) पनि राष्ट्रिय सभा चुनावका प्रतिस्पर्धी दलहरु हुन् । चुनावअन्तर्गत मतदान आज बिहान ९ बजेदेखि अपराह्न ३ बजेसम्म हुने निर्वाचन आयोगले जनाएको छ ।
चुनावमा मतदाता प्रदेशसभा सदस्य ५४९ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख गरी एक हजार ४९८ जना छन् । चुनावमा प्रदेश सांसदको मतभार ५३ र गाउँपालिकाका अध्यक्ष तथा उपाध्यक्ष र नगरपालिकाका प्रमुख तथा उपप्रमुखको १९ मतभार तोकिएको छ । यस आधारमा कूल दुई हजार ४७ मतदाताको मतभार ५७ हजार ५५९ छ ।
मतदानका लागि प्रत्येक प्रदेश राजधानीमा एक÷एक वटा मतदानस्थल छन् । सोही स्थानमा दुई÷दुई वटा मतदान केन्द्र पनि छन् । यसरी देशभरमा सातवटा मतदानस्थल र १४ वटा मतदान केन्द्र छन् ।
निर्वाचन आयोगका अनुसार कोशी प्रदेशका लागि प्रदेश निर्वाचन कार्यालय विराटनगर, मधेस प्रदेशका लागि महेन्द्रनारायण निधि मिथिला संस्कृति केन्द्र जनकपुरधाम र बागमती प्रदेशका लागि भुटनदेवी मावि प्राविधिक शिक्षालय, ‘एफ’ हेटौंडामा तोकिएको छ ।
गण्डकी प्रदेशका लागि प्रदेश निर्वाचन कार्यालय पोखरा, लुम्बिनी प्रदेशका लागि कर्मचारी मिलन केन्द्रको भवन, घोराही, कर्णाली प्रदेशका लागि प्रदेश निर्वाचन कार्यालय सुर्खेत र सुदूरपश्चिम प्रदेशका लागि प्रदेशसभा भवन धनगढीलाई मतदानस्थल तोकिएको छ ।
आयोगका प्रवक्ता शालिग्राम शर्मा पौडेलका अनुसार प्रदेशसभाका सदस्यका लागि सेतो रङको कागजमा हरियो रङको मसीको विवरण तथा चुनाव चिह्न रहेको मतपत्र र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखका लागि सेतो रङको कागजमा रातो रङको मसीको विवरण तथा चुनाव चिह्न रहेको मतपत्रको व्यवस्था छ ।
चुनावमा प्रदेशसभाका सदस्य र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख रहेको निर्वाचक मण्डल रहने छ ।
निर्वाचन (कसुर तथा सजाय) ऐन, २०७३ को व्यवस्थाबमोजिम मतपत्रमा मत संकेत गरेपछि त्यस्तो मतपत्र कसैलाई देखाउन, प्रदर्शन गर्न वा मत संकेत गरेको व्यहोरा कुनै प्रकारले सार्वजनिक गर्न नहुने विषयलाई मध्यनजर गरी सम्बन्धित मतदान केन्द्रहरुमा आयोगले तोकेको कुनै एक परिचयपत्र साथ उपस्थित भई आफ्नो विवेकको गोप्य मताधिकारको प्रयोग गर्न निर्देश गरेको छ ।
चुनावमा सबैभन्दा बढी नेकपा एमालेबाट १९ जना उम्मेदवार छन् । सत्तारुढ दल नेपाली कांग्रेसका १० जना उम्मेदवार छन् । सत्ता नेतृत्व दल माओवादी केन्द्रबाट राष्ट्रिय सभा चुनावमा छ जना उम्मेदवार छन् । उनीहरु सबै माओवादीका युद्धकालीन नेताहरु हुन् ।
राप्रपाबाट उद्धव पौडेल, हेमजंग गुरुङ, नानु नगरकोटी, भरतमणि भट्ट, पूर्णबहादुर विश्वकर्मा, गौमाया श्रेष्ठ, रोमबहादुर भण्डार र विजयलक्ष्मी सिंह उम्मेदवार छन् । लुम्बिनीका उम्मेदवार निरञ्जन थापाले पनि उम्मेदवारी फिर्ता लिए ।
राप्रपाले अरु उम्मेदवार उठाउन चाहे पनि मधेस प्रदेश, कर्णाली र सुदूरपश्चिम प्रदेशमा जनप्रतिनिधि एक–एक जनामात्रै हुँदा प्रस्तावक र समर्थक नै पाएन । नेमकिपाबाट राष्ट्रिय सभा चुनावमा चार जना उम्मेदवार छन् । हिमालयश्वर मूल, श्रीकृष्ण महर्जन, संगीता नेपाली र कृष्ण लक्ष्मी दुवाल नेमकिपाका उम्मेदवार हुन् ।
नेकपा एकीकृत समाजवादीबाट राष्ट्रिय सभामा घनश्याम रिजाल र सावित्री मल्ल, जनता समाजवादी पार्टीबाट पूजा चौधरी र जनमतले नेता रामशंकर महासेठ तथा बालगोविन्द चौधरीलाई उम्मेदवार बनाएको छ । यस आधारमा चुनावी मैदानमा ५१ जना उम्मेदवार छन् ।
एमाले र राप्रपाबीच कोशीमा चुनावी गठबन्धन छ । अन्य प्रदेशमा भने छैन । नेपाल मजदुर किसान पार्टी चुनावी चुनाव लड्दै छ । जनमतले मधेस र लुम्बिनी प्रदेशमा एक्लै चुनाव लड्ने भएको छ । बाँकी प्रदेशहरुमा भने सत्तारुढ दलहरु कांग्रेस माओवादी केन्द्र, नेकपा एस, जसपा रहेको गठबन्धनसँग सहकार्य गर्ने भएको छ ।
प्रदेशगत मतदाता
देशको पूर्वी क्षेत्रको प्रदेश कोशीमा राष्ट्रिय सभा चुनावका लागि ३६७ जना मतदाता छन् । प्रदेश सांसद ९३ जना तथा गाउँपालिकाका अध्यक्ष र उपाध्यक्ष एवं नगरपालिकाका प्रमुख र उपप्रमुख २७४ छन् ।
जसअनुसार कोशी प्रदेशमा प्रदेशसभा सदस्यको मतभार चार हजार ९२९ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार पाँच हजार २०६ गरी जम्मा १०१३५ मतभार छ ।
मधेस प्रदेशमा ३७४ जना मतदाता छन् । त्यसमध्ये प्रदेश सांसद १०७ जना र गाउँपालिका अध्यक्ष र उपाध्यक्ष तथा नगरपालिकाका प्रमुख र उपप्रमुख २६७ जना छन् । प्रदेशसभा सदस्यको मतभार पाँच हजार ६७१ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार पाँच हजार ७३ गरी जम्मा १० हजार ७४४ मतभार रहेको आयोगले जनाएको छ ।
बागमती प्रदेशमा ३४७ जना मतदाता छन् । प्रदेश सांसद ११० तथा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख २३७ जना छन् । प्रदेशसभा सदस्यको मतभार पाँच हजार ८३० र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार चार हजार ५०३ गरी जम्मा १० हजार ३३३ मतभार छ ।
गण्डकी प्रदेशमा २३० जना मतदाता छन् । प्रदेश सांसद ६० जना र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख १७० जना मतदाता छन् । प्रदेशसभा सदस्यको मतभार ३ हजार १८० र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार तीन हजार २३० गरी जम्मा छ हजार ४१० मतभार छ ।
लुम्बिनी प्रदेशमा मतदाता ३०५ जना छन् । प्रदेश सांसद ८७ जना र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख २१८ जना छन् । यहाँ प्रदेशसभा सदस्यको मतभार चार हजार ६११ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार चार हजार १४२ गरी जम्मा आठ हजार ७५३ मतभार छ ।
कर्णाली प्रदेशमा १९६ जना मतदाता छन् । प्रदेश सांसद ४० जना र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख १५६ जना छन् । यस आधारमा प्रदेश सदस्यको मतभार दुई हजार १२० र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार दुई हजार ९६४ गरी जम्मा पाँच हजार ८४ मतभार छ ।
यस्तै, सूदुरपश्चिम प्रदेशमा २२८ जना मतदाता छन् । त्यसमध्ये प्रदेश सांसद ५२ जना तथा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख १७६ जना छन् । प्रदेश सांसदको मतभार दुई हजार ७५६ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखतर्फको मतभार तीन हजार ३४४ गरी जम्मा छ हजार १०० मतभार कायम रहेको आयोगले जनाएको छ ।
