- अनुपम फुडल्याण्डमा उपत्यका प्रेस युनियनले आयोजना गरेको दसैंको शुभकामना आदानप्रदान कार्यक्रममा शेखरलाई वरिष्ठ नेता भनी व्यंग्य कस्दै एक महिनायता बोलचालै नभएको बताएका थिए गगनले
- दुई नेताबीचको दरार सम्बन्ध आइतबार अर्थात् मंसिर २४ गते भने ‘क्लाइमेक्स’मा आयो
- बुधबारको बैठकपछि गगन निराश देखिँदा शेखर भने हँसिलो देखिन्थे । कारण, गगनलाई गलाउन सफल भएकोमा हो कि ?
काठमाडौं– नेपाली कांग्रेसमा पार्टीगत मर्यादाक्रम हेर्दा पार्टी संस्थापनइतरमा महामन्त्री गगन थापा पहिलो नम्बरमा देखिने नेता हुन् । तर १४ औं महाधिवेशनमा यो खेमाको नेतृत्व दाबी डा. शेखर कोइरालाले गरेका थिए । यसकारण पनि यो समूहका धेरै नेताहरुको रोजाइ कोइराला नै हुने गर्छ । विद्रोही स्वभावका गगन भने यो मान्न तयार देखिँदैनन् ।
कांग्रेस संसदीय दलको निर्वाचनमा गगनले शेखरलाई रोकेर पार्टी सभापति शेरबहादुर देउवासँग भिड्दै विद्रोह गरे । देउवा संसदीय दलको नेतामा निर्वाचित हुँदा आफ्नो समूहको पूरा मत नआएको भन्दै गगनले असन्तुष्टि जनाए, त्यो पनि अर्का महामन्त्री विश्वप्रकाश शर्मामार्फत । शर्मा उनै नेता हुन् जसले संसदीय दलको नेता बन्न गगनलाई उक्साएका थिए ।
त्यही बेलाबाटै शेखर भने गगनलाई गलाउने प्रयासमा लागे ।
माओवादी केन्द्रका अध्यक्ष पुष्पकमल दाहाल नेतृत्वको सरकारमा कांग्रेसबाट शेखरपक्षलाई दुई मन्त्री पर्दा गगनसँग छलफलै नगरी धनराज गुरुङ र डिगबहादुर लिम्बूलाई सरकारमा पठाए । कतिपयले मोहनबहादुर बस्नेत पनि शेखरकै समूहबाट मन्त्री बन्न पुगेको पनि बताइन्छ । त्यसपछि गगन झनै आक्रोशित बने । सार्वजनिक मञ्चहरुमा गगन आफ्नै टिम बनाउने भन्दै गर्जिन थाले । यद्यपि गगन फेरि मत्थर बने । असोज २ मा शेखरले बोलाएको भेलामा उपस्थित भए ।
भेला बालुवाटारस्थित शेखरको सचिवालयमा बसेको थियो । केन्द्रीय समितिमा आफ्नो समूहबाट खरोसाथ देउवाविरुद्ध उत्रने एजेण्डा तय भयो । तर गगनबाहेक केन्द्रीय समितिमा अरुले खासै देउवाविरुद्ध आवाज उठाएनन् । त्यतिबेला डा. शेखर वरिष्ठ नेता बन्ने लबिइङमा थिए । कांग्रेसमा रामचन्द्र पौडेल राष्ट्रपति बनेयता उक्त पद खाली नै छ । गगनले यसमा लबिइङ गर्छन् कि भन्ने आशा डा. शेखरमा थियो । तर महामन्त्री थापाले कुनै लबिइङ गरेनन् ।
त्यसपछि शेखर–गगनको दूरी थप लम्बियो । असोजमा कोशी प्रदेशमा केदार कार्की मुख्यमन्त्री बनेपछि थप सशंकित बने, गगन । कात्तिक २ गते उनले आफ्नो असन्तुष्टि सार्वजनिक मञ्चमै पोखे । अनुपम फुडल्याण्डमा उपत्यका प्रेस युनियनले आयोजना गरेको दसैंको शुभकामना आदानप्रदान कार्यक्रममा शेखरलाई वरिष्ठ नेता भनी व्यंग्य कस्दै एक महिनायता बोलचालै नभएको बताए गगनले । ‘वरिष्ठ नेताजीसँग एक महिनाजति भयो भेट नभएको । पत्रपत्रिकामा पढिरहेको छु,’ गगनले त्यतिबेला भनेका थिए ।
दुई नेताबीचको सम्बन्ध आइतबार अर्थात् मंसिर २४ गते ‘क्लाइमेक्स’मा आयो । शेखर पक्षले बैठक मंगलबारका लागि बैठक डाके । गगनलाई निम्तो दिन खोज्दा फोन उठेन । गगनले आफू मधेसमा निस्कने भएकोले भेलामा सहभागी हुन नसक्ने जनाउ दिए । आफूलाई डा. शेखरलाई सीधा सम्पर्क नगरी सचिवालयबाट फोन गएकोमा गगनको असन्तुष्टि रहेको बताइन्छ । त्यसपछि दुई नेतालाई मिलाउन अर्जुननरसिंह केसीले प्रयास गरे । सोमबार दुवै नेतालाई डाकेर गगनका ससुरासमेत रहेको केसीले तीन घण्टा आफ्नो निवासमा छलफल गरे । भदौ १७ गते यसरी नै केसीले भेला राख्दा शेखर उनको घर गएका थिएनन् । यसपटक भने शेखर केसीनिवास बूढानीलकण्ठ पुगे । त्यसपछि मंगलबारका लागि राखिएको भेला बुधबारका लागि स¥यो ।
बुधबार १ बजेका लागि डाकिएको बैठकमा गगन सबैभन्दा ढिला पौने २ बजेतिर आइपुगे । उनी भेलास्थल अनुपम फुडल्याण्ड पुग्दा सञ्चारकर्मीले घेरेपछि उनले खुसीसाथ भने– माइती आएजस्तो लाग्यो । गगनको यही बोलीबाट प्रस्ट हुन्छ उनी शेखर समूहबाट अन्माइसकेका नेता हुन् । अन्माइसकेका अर्थात् बिदा गरिएका । यस्तो अवस्थामा पनि एक देखिन उनी शेखरले डाकेको बैठकमा आइपुगे ।
करिब साढे दुई घण्टा चलेको बैठकको अन्तिममा गगनले आफ्नो असन्तुष्टि पोखे । ‘समूहभित्र संवादको कमी भयो भन्ने कुरा पनि उठ्यो । यसलाई नियमित गरौं भन्नेमा पनि छलफल भयो । कम छलफल हुँदा असमझदारी बढ्यो,’ बाहिर सञ्चारकर्मीसँग गगनले भने । भित्र बैठकमा भने गगनले आफूलाई युज एण्ड थ्रोका लागिमात्र आफ्नो खोजी भएको भन्दै डा. शेखरलाई चेतावनी दिएका थिए । ‘समूह एकताबद्ध हुने हो भने देउवासँग भिडौं, हाम्रो समूहमा नभिडौं,’ गगनको भनाइलाई उद्धृत गर्दै एक नेताले भने । यसो त गगनले अब एक भएर शेखरलाई नै संसदीय दलको नेता बनाउने प्रयासमा लागिपर्नुपर्ने बताएका थिए । ‘हामी एकताबद्ध भएर संसदीय दलको नेता फेर्न लागौं, देउवा नै प्रधानमन्त्री हुने अवस्था भयो भने २०८२ मा महाधिवेशन हुन सक्दैन,’ गगनको भनाइ उद्धृत गर्दै ती नेताले भने ।
संसदीय दलको नेताबाट देउवालाई हटाउन सक्ने अवस्था नभएको पटक–पटक डा. शेखरले नै बताउँदै आएका छन् । किनभने देउवाको पक्षमा अधिकतम मत छ । गत पुसमा भएको निर्वाचनमा देउवाले ६४ मत पाउँदा थापाले २५ मतमात्र पाएका थिए । यस्तो अवस्थामा गगनले शेखरलाई संसदीय दलको नेता बनाएर प्रधानमन्त्रीको यात्रामा लाग्न आग्रह गरेका हुन् । बुधबारको बैठकबाट निस्कँदा गगन निराश देखिँदा शेखर भने हँसिलो देखिन्थे । कारण, गगनलाई गलाउन सफल भएकोमा हो कि ? यसको जवाफ भने आगामी राजनीतिक फेरबदलले बताउँला ।
