- पाँचपटक प्रधानमन्त्री बनिसकेका देउवामाथि पार्टीभित्रै आक्रोश बढ्दो छ । सर्वसाधारण पनि देउवामाथि रुष्ट सुनिन्छन्
- देउवाले पत्नी डा. आरजु देउवालाई केन्द्रीय समिति र समानुपातिकमा सांसदको मौकामात्र दिएनन्, संसदीय समितिको सभापतिसमेत बनाइदिए
- पार्टीमा तानाशाही प्रवृत्ति देखाउन थालेका देउवालाई सार्वजनिक मञ्चबाटै दुई महामन्त्री गगन थापा र विश्वप्रकाश शर्माले नेतृत्व छाड्न आग्रह गरेका छन्
काठमाडौं– कांग्रेसको विधानअनुसार २०८२ मंसिरसम्म शेरबहादुर देउवाले पार्टीको नेतृत्व ढुक्कले गर्न पाउँछन् । अझ उनी संसदीय दलको नेतासमेत हुन् । संसदीय दलको नेता भएपछि सरकारको नेतृत्व गर्ने अवसर पार्टीले पाए देउवा नै प्रधानमन्त्री बन्न पाउँछन् ।
तर देउवामाथि पार्टीभित्रै आक्रोश बढ्दो छ । सर्वसाधारण पनि देउवामाथि रुष्ट सुनिन्छन् । कारण पटक–पटक प्रधानमन्त्री पदमा पुग्दा पनि जनताका लागि उपलब्धिमूलक काम गर्न नसक्नु । भ्रष्टाचार बढेको बढ्यै, सुशासनमा प्रश्नमाथि प्रश्न उठ्दा देउवा मौन बस्छन् । अझ पछिल्लोपटक पत्नी डा. आरजु देउवालाई केन्द्रीय समितिमा ल्याउँदा र समानुपातिक सांसद बनाउँदा पनि उनको चर्को विरोध भएको थियो । आरजु अहिले प्रतिनिधिसभाका कृषि समितिमा सभापतिसमेत बनिसकेकी छन् ।
त्यसैले कांग्रेसका धेरै नेताहरु देउवाकै कारण नयाँ पुस्ता पार्टीप्रति आकर्षित नभएको दाबी गर्छन् । अझ बोलीकै विषयलाई लिएर पनि कांग्रेस नेताकर्याकर्ता बेलाबेला देउवाको आलोचना गर्छन् । यही विषयमा शनिबार देउवाले नेताहरुसँग घुमाउरो पारामा कटाक्ष गरे । ‘म राम्रो बोल्ने मानिस होइन, तपाईंहरूलाई थाहा छ । कम बोल्ने, काम बढी गर्न खोजिरहेको छु, हेरौं के हुन्छ,’ शनिबार बुटवलमा आयोजित पार्टीको लुम्बिनी प्रदेश सम्मेलनलाई सम्बोधन गर्ने क्रममा भने ।
यद्यपि देउवा पार्टीमा शक्तिशाली छन् । किनभने १४औं महाधिवेशनमा देउवाले पार्टी लगभग कब्जा नै गरे । झण्डै ८५ प्रतिशत केन्द्रीय सदस्य देउवापक्षका निर्वाचित भए । संस्थापनइतरमा डा. शेखर कोइराला उनका प्रतिद्वन्द्वी थिए । गगन थापा महामन्त्रीका उम्मेदवार । तर अहिले शेखर र गगन नै बोलचाल बन्दको अवस्थामा छन् । बोलचाल बन्द भए पनि शेखर र गगन बुटवलमा भने एकै मञ्चमा देखिए । संस्थापनइतरका दुई बलिया नेता नमिल्दा देउवा झनै बलिया छन् । सत्ता गठबन्धनमा देउवालाई ‘वेटिङ प्राइममिनिस्टर’का रुपमा हेरिन्छ ।
नेतृत्व छाड्न आग्रह
शुक्रबार संस्थापनइतरका नेता डा. शेखर कोइरालाले नवलपरासी पश्चिम पुगेर घुमाउरो पारामा देउवाले ससम्मान नेतृत्व छाड्नुपर्ने बताएका थिए । ‘अब जनतामा आशा जगाउन र देशलाई नयाँ ढंगले समृद्धिको बाटोमा लैजान उहाँहरूले ससम्मानपूर्वक नेतृत्व छाड्नुपर्छ,’ कोइरालाले भनेका थिए । सोही मञ्चमा केन्द्रीय सदस्य चन्द्र भण्डारीले शेखर कांग्रेसको सभापति भएको हेर्न जनताले चाहेको बताएका थिए । ‘एकपटक कांग्रेसजन र नेपाली जनताले शेखर कोइरालालाई कांग्रेस सभापति भएको हेर्न चाहेका छन्, वर्तमान र भविष्य हेर्न सक्ने नेता डा. शेखर कोइराला हुन्,’ उक्त सभामा भण्डारीले भनेका थिए ।
शनिबार बुटवलको मञ्चमा पनि केन्द्रीय सदस्य भण्डारीले देउवालाई नेतृत्व छाड्न आग्रह गरे । ‘शेरबहादुर दाइ अब अन्तिम हो,’ भण्डारीले भने । पार्टीको जिम्मा शेखरलाई दिनुपर्ने उल्लेख गर्दै भण्डारीले भने, ‘उहाँले अब यो मुलुक बनाइदिनुपर्छ । भोलि पार्टी सम्हाल्ने कोही छन् भने विचारका धनी महामन्त्रीहरूलाई साथ लिएर बढ्ने डाक्टर साब हो, बेस्ट सर्जन पनि हो, थेरापिस्ट पनि हो । अब उहाँ अगाडि लागेर देश बनाउनुपर्छ ।’
महामन्त्री विश्वप्रकाश शर्माले पनि अब देउवाले प्रधानमन्त्री बन्छु भनेर लाग्न नहुने धारणा राखे । बुटवलमा भएको लुम्बिनी कांग्रेसको प्रदेश सम्मेलनलाई सम्बोधन गर्दै शर्माले गौतम बुद्धको उदाहरण दिँदै पद नयाँ पुस्ताका लागि छाड्न आग्रह गरे । ‘भगवान गौतम बुद्धले बुद्धत्व प्राप्त गर्नुभयो, सत्ताको कुर्सीमा एकपटक पनि नबसीकन । त्यसकारण आदरणीय सभापतिजीले पाँच–पाँचपटक प्रधानमन्त्रीको बनिसक्नुभयो,’ शर्माले भने, ‘अब प्रधानमन्त्री बन्ने कुराको चाहिँ लौ अघि बढ् मेरो समकालीन कोही साथीहरु र आऊ कोही युवाहरु भन्दै गर्दा अर्कै ऊर्जा देशव्यापीरुपमा बढ्ने छ । सभापतिको जुन शालीनता छ । त्यसैले त्यो दिन पनि आउला ।’
अर्का महामन्त्री गगन थापाले पनि शर्माको भनाइमा सहमति जनाउँदै कांग्रेस जोगाउने हो भने देउवाले अब नेतृत्व छाड्नुपर्ने बताए । ‘सभापतिज्यूलाई मैले भनेको छु । यो पार्टीमा तपाईंको पुस्ताका साथीहरु पनि थुप्रै हुनुहुन्छ । नयाँ पुस्ताका साथीहरु पनि हुनुहुन्छ,’ थापाले सोही मञ्चबाट भने, ‘केही समयपछि कांग्रेसको नेतृत्वमा सरकार बन्छ । विश्वप्रकाश शर्माले भन्नुभएजस्तो यत्रो वर्ष मैले पार्टीमा हुर्काएको साथीहरु हुनुहुन्छ यिनीहरुलाई सिकाएको छु । पार्टीको मात्र हैन देशको भारी पनि बोक्न सक्छन् भनेर भन्नुभयो भने पार्टी पनि बाँच्छ, देश पनि बाँच्छ ।’
