- पञ्चायतकालमा बिपीले सत्ताधारीको मनशाय बुझ्न, कांग्रेसप्रति जनताको चाहना बुुझ्न र कांग्रेसले उठाएको मुद्दालाई कूूटनीतिक नियोगका प्रतिनिधिहरूमार्फत अन्तर्राष्ट्रियकरण गर्न चियापान आयोजना गरेका थिए
- कांग्रेस, एमाले, रास्वपा र राप्रपाले चियापान आयोजना गर्दै आएका छन्
- चियापानलाई नेताहरूबीच सम्बन्ध सुधार र मेलमिलापको कडी बनाउने प्रयास
काठमाडौं– कठोर पञ्चायती शासनको बेला पहिलो जननिर्वाचित प्रधानमन्त्रीसमेत रहेका कांग्रेस नेता विश्वेश्वरप्रसाद (बिपी) कोइराला जेलमा थिए । कांग्रेस प्रचार विभाग प्रमुख मीन विश्वकर्माका अनुसार त्यसबेला बिपीले कार्यकर्तासँग भेट गर्न पाउँदैनथे ।
कूटनीतिक नियोगका प्रतिनिधिहरूमार्फत कांग्रेसको एजेण्डा विश्वभर सुनाउन पाउँदैनथे । राजनीतिक कार्यक्रम गर्ने त परको कुरा । यसपछि कोइरालाले एउटा जुक्ति निकाले– चाडबाडको अवसरमा चियापान कार्यक्रम गर्ने । यसलाई पञ्चायती शासकहरूले प्रतिबन्ध लगाएन ।
चार विभाग प्रमुख विश्वकर्मा भन्छन्, ‘चियापानमा बिपी तत्कालीन सत्ताधारी, कूूटनीतिक नियोगका प्रतिनिधि र जनतालाई निम्ता दिन्थे । चियापानलाई उनले सत्ताधारीको मनशाय बुझ्ने, कांग्रेसप्रति जनताको चाहना बुुझ्ने र कांग्रेसले उठाएको मुद्दालाई कूूटनीतिक नियोगका प्रतिनिधिहरूमार्फत अन्तर्राष्ट्रियकरण गर्ने मञ्चको रूपमा प्रयोग गर्न थाले ।’
बिपीको निधनपछि नेता गणेशमान सिंहले चियापानलाई निरन्तरता दिए । त्यसपछि हरेक पार्टी सभापतिले चियापानलाई एउटा परम्पराको रूपमा निरन्तरता दिँदै आएका छन् । यसपटक कांग्रेसले यही ११ कात्तिकमा चियापान आयोजना ग¥यो ।
तीन दिनपछि बुधबार नेकपा एमालेले कांग्रेसले जसरी चियापान आयोजना ग¥यो । जहिल्यै एकअर्काको उछितो काढ्ने नेताहरू चियापानमा एउटै राउण्ड टेबलको वरिपरि बसे । चिया खाँदै मस्त गफिए ।
फोटो पत्रकार प्रदीपराज वन्तले सार्वजनिक गरेको एउटा तस्बिरमा प्रधानमन्त्री पुष्पकमल दाहाल, सभामुख देवराज घिमिरे, रास्वपा सभापति रवि लामिछाने, नेकपा महासचिव नेत्रविक्रम चन्द, कांग्रेस सभापति शेरबहादुर देउवा, एमाले अध्यक्ष केपी शर्मा ओली, नेकपा एसका सम्मानित नेता झलनाथ खनालसहितका नेताहरू लस्करै बसेका देखिन्छन् । जहाँ प्रधानमन्त्री दाहाल र सभामुख घिमिरे त हंशमुक देखिए ।
नेताहरूबीच चियापानमा पूरै हार्दिकता र सौहाद्र्रता देखियो । उनीहरूले चियापानमा राजनीतिक रूपमा घोचपेच गरेनन् । बरु मज्जाले भलाकुसारी गरे । शुभकामना साटासाट गरे । एमाले महासचिव शंकर पोखरेल चियापानले दलहरूबीच सहकार्यको वातावरण बनाउन मद्दत पुुग्ने गरेको बताउँछन् । त्यही भएर एमालेले हरेक वर्ष दसैंपछि चियापान आयोजना गर्दै आएको उनले बताए ।
‘तीन दशकअघिदेखि एमालेले चियापान आयोजना गर्दै आएको छ । यसको एउटै उद्देश्य दलहरूका नेताहरूबीच हार्दिकता विकास गर्ने र सौहाद्र्रता स्थापित गर्ने हो । यसो हुँदा दलहरूबीच जनताको मुद्दामा सहकार्य गर्न सहज हुन्छ,’ उनले भने ।एमालेले चियापान गर्न थालेको प्रजातन्त्रको पुनर्वहाली भएपछि हो । जतिबेला एमाले अध्यक्ष मनमोहन अधिकारी र महासचिव मदन भण्डारी थिए । उनीहरूले २०४८ सालमा पहिलोपटक एमालेको तर्फबाट चियापान आयोजना गरेका थिए । त्यसपछि एमालेले चियापानलाई निरन्तरता दिँदै आएको छ ।
यस्तो चियापानमा विशुुद्ध गैरराजनीतिक गफगाफमा नेताहरू रमाउँछन् । बुुधबार पनि यस्तै भयो । चियापानको सुरुमै उपस्थित सबैलाई धन्यवाद दिँदै एमाले अध्यक्ष ओलीले भने, ‘तर, थप राजनीतिक विषयमा कुरा गर्न चाहन्नँ । यो राजनीतिक कुरा गर्ने ठाउँ होइन ।’दलीय नेतृत्वहरूबीच सम्बन्ध थप सुुदृढ पार्न औचित्यपूर्ण देखिने चियापान नयाँ दल राष्ट्रिय स्वतन्त्र पार्टीले गएको ७ असारमा आयोजना गरेको थियो । त्यहाँ प्रधानमन्त्री दाहाल, कांग्रेस सभापति देउवा, एमाले अध्यक्ष ओलीसहित अन्य दलका नेताहरू सहभागी थिए । आपसी हाँसिमजाक गरेका थिए ।
त्यसअघि राष्ट्रिय प्रजातन्त्र पार्टीले २७ पुसमा चियापान आयोजना गरेको थियो । पृथ्वीनारायण शाहको जन्मजयन्तीको अवसरमा राप्रपाले चियापान आयोजना गर्दै आएको छ । उक्त दलका प्रवक्ता सगुनसुन्दर लावतीका अनुसार यस वर्ष पनि चियापान आयोजना गरिने छ । राप्रपाको चियापानमा पनि प्रधानमन्त्रीदेखि सबै दलका नेता भेला हुने गरेका छन् । कमल थापा पार्टी अध्यक्ष हुँदा २७ पुस २०६५ मा पहिलोपटक राप्रपाले चियापान आयोजना गरेको थियो । त्यसलाई हालसम्म निरन्तरता दिइँदै आएको छ ।
जबकि, अन्य दिन भने नेताहरू एकअर्काबीच हिलो छ्यापाछ्याप गर्छन् । आरोपैआरोपको वर्षा गर्छन् । यतिसम्मकी कहिलेकाहीँ त तल्लोस्तरमा झरेर गालीसमेत गर्छन् । त्यस्तो अवस्थाले भेट हुुँदा पनि कोही नेताबीच त सम्वादहीनता स्थिति हुने गरेको छ । तर, पञ्चायतकालमा बिपीले थालनी गरेको चियापान वर्षौंदेखि नेताहरूको सम्बन्ध सुधार र मेलमिलापको कडी बन्दै आएको देखिन्छ ।
