- डा. शेखर कोइरालासँग एक महिनायता भेटघाट र बोलचाल नै नभएको गगनको खुलासा
- गगनसँग पछिल्लो समय फोन कुराकानीसमेत हुन छाडेको शेखर सचिवालयको भनाइ
- देउवाको एकलौटीविरुद्ध लड्न जुटेको समूह आफैं टकरावमा
काठमाडौं– नेपाली कांग्रेसमा सभापति शेरबहादुर देउवाको मनपरी बढेको भन्दै एक भएर महाधिवेशन उत्रेका दुई नेता नै बोलचाल बन्द हुने अवस्थामा पुगेका छन् । देउवाको एकलौटीविरुद्ध १४औं महाधिवेशनमा डा. शेखर कोइराला र गगन थापा ‘टिम अप’ गरी भिडेका थिए ।
सभापतिमा देउवाले जित निकाल्दा महामन्त्रीमा शेखर समूहका गगन निर्वाचित भए । १३ औं महाधिवेशनमा भन्दा पार्टीमा देउवा थप शक्तिशाली बने । केन्द्रीय समितिमा देउवाको मनपरी अझै बढ्न थालेको छ । दुई–दुई महिनामा बस्नुपर्ने केन्द्रीय समिति वर्ष दिनसम्म बस्न नसक्दा पनि कांग्रेस संस्थापनइतरले खासै आवाज उठाउन सकेन । दुई महामन्त्री गगन र विश्वप्रकाश शर्माले भने केन्द्रीय समिति बैठकबारे आवाज उठाइरहे । उनै देउवाले भदौपछि एकैचोटि साउनमा केन्द्रीय समिति डाके ।
केन्द्रीय समिति लाइभ गरेर देउवाले वाहवाही बटुल्दा दुई महामन्त्री भने रक्षात्मक देखिए । कांग्रेसमा अझै पनि भ्रातृ संगठन लथालिंग अवस्थामा छन् । केन्द्रीय कोषाध्यक्षको चयन हुन गर्न देउवाले कुनै तयारी गरेका छन् । महाधिवेशन २०७८ मंसिरमा सम्पन्न भएको थियो । महाधिवेशन सकिएको छ महिनामा केन्द्रीय समितिमा पूर्णता दिनुपर्ने हो । त्यो काम अझै अपूरै छ । यस्तो अवस्थामा कांग्रेस कोशी प्रदेश सरकार निर्माणको प्रक्रियामा विवादमा तानियो ।
एउटै समूहका दुई नेताबीच बोलचालै बन्द
कोशी प्रदेशमा शेखर समूहका नेता केदार कार्की मुख्यमन्त्री भएका छन् । कोशी प्रकरणमा असन्तुष्ट जनाएका गगनले आफूले महिना दिनयता नेता शेखरलाई नभेटेको खुलासा गरेका छन् । ‘वरिष्ठ नेताजीसँग एक महिना जति भयो भेट नभएको । पत्रपत्रिकामा पढिरहेको छु । भेटघाट भएमा भनौंल,’ काठमाडौंको बत्तीसपुतलीमा बिहीबार नेपाल प्रेस युनियनले आयोजना गरेको शुभकामना आदानप्रदान कार्यक्रममा उनले भने ।
गगनसँग लामो समय संवाद हुन नसकेको शेखरको सचिवालय पुष्टि ग¥यो । शेखर गगन टसल संसदीय दलको निर्वाचनदेखि नै हो । यद्यपि गत असोज २ गते दुई नेताबीच बालुवाटारस्थित शेखरको सचिवालयमा केन्द्रीय समितिमा प्रस्तुत हुने एजेण्डाबारे छलफल हुँदा गगन उपस्थित भएका थिए । बरु निम्ता पाएका महामन्त्री शर्मा र केन्द्रीय सदस्य प्रदीप पौडेल भने गुटभेलामा आएनन् । केन्द्रीय सदस्य पौडेल पछिल्लोपटक शेखरसँग नजिकिन थालेका छन् ।
कोशी प्रकरणमा देउवासँग भेटेर आफूले पहिले अँध्यारो कोठामा काम गर्ने अनि पछि सबैलाई बोलाएर निर्णय गर्ने काम गर्न नहुने अडान राखेको दाबी गरे । ‘सभापतिजीलाई केही दिनअघि भेट भएको थियो । धेरै पछि उहाँसँग भेट भयो । प्रदेश सरकार निर्माणबारे मैले उहाँसँग हात जोडेर भने तपाईं पहिले काम गर्ने । काम गरेपछि निर्णय गर्ने । सबै कुरा अँध्यारोमा गर्ने । फोहोर सफा गर्नेबेला अरुलाई बोलाउने । यसो नगर्नूस् भनेर आएको छु,’ गगनले भने ।
उनले आफू शेखरको जस्तो विद्रोहमासमेत नलाग्ने बताए । कोशीमाझैं अरु प्रदेशमा पनि सरकार बदल्न कांग्रेस प्रदेश सांसदहरुले चाहेको उल्लेख गर्दै गगनले यसबारे शेखरलाई कटाक्षसमेत गर्न भ्याए । ‘कांग्रेसमा विद्रोह हैन बदल्नुपर्छ । परिवर्तनको चेत सम्बन्धमा म सचेत छु । पार्टीलाई बदल्नुपर्छ भन्ने हिसाबमा म लागेको छु । नेतृत्वको सन्दर्भमा सबै यसरी नै लाग्नुपर्नेछ,’ उनले भने ।
बागमती प्रदेशका केही कांग्रेस सांसदले आफूकहाँ आएर माओवादी नेतृत्वको प्रदेश सरकार कोशीमाझैं ढाल्न आग्रह गरेकोसमेत गगनले खुलाए । ‘हामी माओवादीको मुख्यमन्त्री मान्दैनौं । हाम्रो पनि १२÷१३ जना पुग्न लागेको छ । सरकार बदल्नुपर्छ भनेर बागमतीका साथीहरु आउनुभएको छ,’ गगनले भने, ‘मैले पार्टी सभापति र वरिष्ठ नेतालाई सोध्नुहोला भनेर फर्काएको छु ।’
कांग्रेसले जनयुद्ध दिवस मान्दैन
महामन्त्री थापाले नेकपा माओवादीले सशस्त्र द्वन्द्व सुरु गरेको फागुन १ गतेलाई ‘जनयुद्ध’ दिवस नमान्ने बताएका छन् । माओवादी केन्द्रका अध्यक्ष पुष्पकमल दाहाल नेतृत्वको सरकारले फागुन १ मा सार्वजनिक बिदा दिने २०७९ माघ २९ मा निर्णय गरेको थियो । महामन्त्री थापाले आफ्नो पार्टी सामेल नभएको त्यतिबेलाको सरकारले दिएको सार्वजनिक बिदालाई नमान्ने बताएका हुन् ।
‘यो सरकारको प्रधानमन्त्री माओवादीको अध्यक्ष हुनुहुन्छ । हामी अघिल्लो सरकारमा थिएनौं । यो सरकारले फागुन १ गते जनयुद्ध दिवस मनाउँछु भनेर बिदा दिन्छु भन्यो भने कांग्रेसले हामी गठबन्धनमा छौं, यसलाई मान्छौं भनेर स्वीकार गर्न सक्छ ? सक्दैन,’ महामन्त्री थापाले भने, ‘हाम्रा लागि त्यो सैद्धान्तिक विषय हुन्छ । हामी फागुन १ लाई दिवसको रूपमा मान्दैनौं ।’
फागुन १ मा बिदा दिने सरकारको निर्णयविरुद्ध सर्वोच्च अदालतमा द्वन्द्वपीडितले दायर गरेको रिट विचाराधीन छ । थापाले आगामी चुनावमा कांग्रेसले गठबन्धन गरे पार्टी एक नरहने बताएका छन् । ‘अबको चुनावमा कांग्रेसले गठबन्धन गर्दैन, ग¥यो भने पार्टी एक रहन्न,’ उनले भने ।
‘पपुलिजमको रोग हटाऊ’
पार्टी अहिले पपुलिजमको रोगले गाँजेको उल्लेख गर्दै गगनले यो रोगबाट हटाउन सबैले भूमिका निभाउनुपर्ने बताए । ‘अहिले पपुलिजमको रोग छ । पार्टीलाई पनि गाँजेको छ, संसद्लाई गाँजेको हुन्छ । पपुलिजमको रोगबाट जोगाउन सबै लाग्नुपर्छ,’ उनले भने ।
दसैंमा असुर प्रवृत्तिको अन्त्य गर्न आफैंबाट सुरुआत गर्नुपर्ने गगनको भनाइ थियो । ‘असुर कहाँ छ भनेर हामी झ्यालबाट हेर्छौं । आफैंभित्र भएको असुर प्रवृत्ति परास्त गरौं,’ दसैंको शुभकामना दिँदै उनले भने, ‘आफंैभित्रको कुन्ठा, आफैंभित्रको घमण्ड, प्रतिशोधको भावना अन्त्य गर्नुपर्नेछ ।’
-1745656903.jpeg)