हान्दियो रे है हान्दियो । हेर त हेर ! युट्युबमा ‘लाइभ’ दे को छ । निकै हतास स्वरमा काहिलो कराउँदै आइपुग्छ । एक्सलमा हिसाब किताब मिलाउँदै गरेको राँइलो किन चिच्याइरा छ, के यो भन्दै हपार्छ । तर, काहिँलो उही सुरमा छ । तेरो ल्यापटमा हेरौं न के ? पुरै लाइभ देको रे छ क्या !
काहिँलोको कुरा सुनेर राँइलो दिक्दारी हुँदै भन्छ । छाड्दे के छाड्दे यस्ता लाइभ साइभको पछि परिस् भने कहिल्यै पनि काम लाग्दैन । आजकल यी युट्युबे र फेसबुकेले ‘फेक न्युज’ दिएर पनि हैरान पार्छन् । कहाँको कुरा कहाँ लगेर जोड्छन् थाहै नहुने । हावादारी कुरामा लाइक र कमेण्ट हान्ने मान्छेकै कारण अहिले के सत्य हो कुन झूठो हो खुट्याउनै गाह्रो भइसक्यो ।
राँइलोको कुरा सुनेपछि काहिँलो सन्कँदै भन्छ । अँ सबै तेरा जस्तै हुन्छन् नि । भनेको कुरा सुने पो । उहाँ इजरेल र प्यालेस्टिनको रकेट बम हानाहान भइराको छ । युक्रेन रस्साले हान्न नपाउँदै अहिले इजरेल र प्यालेस्टाइन ठोका ठोक गर्न थाल्या छन् । हैन तेस्रो विश्वयुद्ध हुन थाल्या हो कि क्या हो, हेर पो भन्या त मैले ।
राँइलो अलि निराश जस्तै देखिन्छ । खै के के हुन लाग्या हो । एक ठाउँमा भए पो सिक्किम हेर्यो बाढी पैरो, बझाङ्ग सुन्यो भुकम्पले खत्तम अम्मिराका कि कता हो बाढीले स्वाहा । युक्रेनमा बारुदको करामत फेरि इजरेलमा रकेटको तमासा ।
‘त्यही भएर त के हो कुरा हेर’ भन्न आको त म काहिँलो फकाउँदै भन्छ । राँइलो आफ्नो ल्यापटपमा इजरेल प्यालेस्टाइनको ताजा अपडेट खोज्छ । भए भर सामाजिक सञ्जालदेखि देशी विदेशी समाचार च्यानलका युट्युबमासमेत ‘हमासको धमास’का बारेमा चर्चा भइरहेको छ ।
हिजोसम्म मान्छे मार्नेलाई आममाफी दियो भनेर चर्चा भइरहेको बेला अहिले एक्कासि फेरि अर्कै चर्चा भएकाले चासो दिनु स्वाभाविक पनि हो । त्यसमाथि पनि नेपाली विद्यार्थी नै बम बारुदमा परे भनेपछि त जानकारी त लिनै प¥यो !कहिल्यै राम्रा कुरा सुन्नै नचाहने भन्दै कान नसुनेको जस्तो गर्ने काहिँला बा पनि बम र बारुदको शब्द सुनेर तीन छक्क पर्दै भन्छन्, ‘कलियुग केटा हो कलि युग’ यो कलियुग नै खराव हो । कलियुगमा सत्यमाथि सँधै असत्यले राज गर्छ । झुठको खेती गर्ने अगाडि बढ्छ । बाहिर एउटा कुरा गर्छ भित्र अर्कै कुरा गर्छ । आफ्नो बाहेक अरु को त हेर्दैन हेर्दैन भन्दै राँइला र काहिँलालाई सुनाउनु हुन्छ ।
काहिँला बा को कुरा सुनेर राँइलो भन्छ, हो नि त्यस्तै त देखिन्छ । को कसबाट परिचालित छ भन्ने कुरा नै बुझ्न गाह्रो छ भन्यो खाली आफ्नोबाहेक अरुको सुन्न नै चाहँदैन । किन त्यस्तो हो काहिँला बा उल्टै राँइलोले सोध्छ ।राँइलोले सोधे पनि काहिँला बा भन्छन्, यो अरुको देखासिकी हो । के को इजरेल र प्यालेस्टाईनको कुरा गर्नु देखिनस् अस्ति उहाँ धरान, नेपालगञ्जमा के भाको?त्यस्तै हो । धरान नेपालगञ्जमा गाई खाने र गाई पुज्ने वीच कस्तो भाको थियो । त्यही भएर कसैले पनि अरुको धर्म, संस्कृति, भाषामाथि धावा बोल्यो भने हमासले धमास दिएजस्तै हुन्छ ।
हुन पनि नेपालीमा भन्छन् नि, ‘आगो ताप्नु मुढाको कुरा सुन्न बूढाको’ काहिँला बाहरुको पालामा यस्ता कुरा कति ढिला आइपुग्थे तर पनि सबै कुरा जानकार लिने गर्दथे । तर अहिले सबै कुरा अहिलेको अहिल्यै थाहा पाउने हुँदा पनि मानिसहरु बुझेर पनि नबुझेको जस्तो गर्छन् । राँइलोले काहिँलोलाई भन्छ ।
ल्यापटपमा इजरेल र प्यालेस्टाइनको फोटो र बमले ध्वस्त भएको त्यहाँको गिर्जाघर काहिँलालाई देखाउँदै भन्छ, ‘ल हेर यता, देखिस् यस्तो छ ।’ झगडा बीउ के रैछ ? थाहा पाइस् होला नि हेर त ५० वर्षदेखिको रिस । यो मेरो यो तेरो भनेकै कारण यस्तो भाको हो नि । कसै न कसैले नउचाली कहाँ यस्तो हुन्छ र ? प्रतिप्रश्न गर्छ ।
काहिँलो आँखा तन्काएर हेर्छ र भन्छ, ‘त्यो त हो ।’ अहिले इजरेल र प्यालेस्टाइनमा भएको यो धमासले चेत्लान् नि हाम्रा बदमासहरु । झण्डै–झण्डै धरान र नेपालगञ्ज यस्तै गरी सल्किन लागेको थियो ? ल हो कि होइन भन्त ?उसका कुरा सहमत गर्दै राँइलो भन्छ, ‘हो नि किन नहुनु’ यति आनन्दले मिलेर बसेको देश नेपालमा क–कसले गिजोल्न खोज्या छन् । इजरेल र प्यालेस्टाइनमा पनि ऊ बेला त्यही गिजोलेकै कारणले त हो नि अहिलेसम्म भिडेका भिड्याइ छन् ।
केटाहरुको कुरा सुनेर काहिँला बाको मनमा कुरा किन अड्थ्यो । बा बोल्न थालिहाले, ‘ऊ बेला म बिबिसी रेडियो सुन्थें, त्यहाँ अंग्रेजीमा भट्याउँथ्यो । इजरेल र प्यालेस्टाइन फाइटिङ भन्दै । गाजा तेरो कि मेरो भन्दै दुवैलाई क–कसले उचाल्थे रे । हाम्रा कांग्रेस एमाले माओवादीलाई कताका मालिकहरुले उचाले जस्तै ।
म त कुरो बुझ्दैन थें । गाजा गाजा भन्थ्यो मैले त गाँजा भन्ने बुझ्थे र भन्ने गर्थे जावो एउटा गाँजाका लागि सयौं मान्छे मर्ने र मार्ने काम किन गरिराख्या होलान् भनेर, पछि कुरा बुझें गाँजा होइन गाजा क्षेत्र भनेको ठाउँका लागि भनेर । यहुदी र अरबीको लफडा । यस्तै अहिले नेपालमा पनि धार्मिक रुपमा जातीय रुपमा लफडा गर्न खोजिरहेका छन् केही स्वार्थी समूहले बुझ्यौं । अव तिमी जस्ता पढेलेखेका युवाहरुले यस्ता लडाउनेहरुका विरुद्ध एकजुट हुनु पर्छ । नत्र नेपालमा पनि यहुदी र अरवीको लफडा जस्तै हुन बेर छैन ।
‘काहिँला बा’ निराश हुँदै काहिँला र राँइलालाई भन्छन्, ‘हमासको धमासमा हाम्रा बदमासहरुले चेत खालान् नि नखालान् भन्ने भएको छ । अहिले इजरेललाई हमासले दिएको धमासजस्तै धरानमा हिन्दू र क्रिस्चियन, नेपालगञ्जमा हिन्दू–मुस्लिम लडाउने खेल भित्रा–भित्रै भएको छ है, ख्याल गरौं बदमास हो । हामीलाई हमासको धमास पनि चाहिएको छैन । अरुको भतुवा बनेका बदमास पनि चाहिएको छैन । द्रव्यमा ¥याल काटेर नेपालमा पनि हमास जन्माउने खेलमा रमाउने तमासे पनि चाहिएको होइन । हमासको धमासजस्तै हाम्रा राजनीतिक व्यापारी बदमासले बुझून् ।
जय होस् नेपालको ।
