- इन्द्रजात्रा अवलोकन गर्न राष्ट्राध्यक्ष जुद्ध सालिकबाट पैदल गएको यो पहिलोपटक हो
- जात्रा अवलोकन गर्न प्रधानन्यायाधीश विश्वम्भरप्रसाद श्रेष्ठ, सभामुख देवराज घिमिरे, राष्ट्रियसभाका अध्यक्ष गणेशप्रसाद तिमल्सिनालगायत मन्त्रीगण, सांसदहरु, प्रदेशसभा सदस्यहरु, स्थानीय तहका जनप्रतिनिधि पनि गद्दी बैठक पुगे
- भिभिआइपीहरुको पैदल यात्रा सम्पदा संरक्षणको महत्वपूर्ण फड्को भएको काठमाडौं महानगरमा मेयर बालेनले बताएका छन्
काठमाडौं– बिहीबार काठमाडौंको वसन्तपुरमा इन्द्रजात्राका लागि भिड थियो । इन्द्रजात्रामा राष्ट्रप्रमुखको भ्रमण पनि विशेष हुनेगर्छ । अवलोकनका लागि पुग्ने अति विशिष्ट(भिभिआइपी)का लागि राजगद्दी अघिसम्मै सवारी लैजाने चलान थियो ।यसपटक भने राष्ट्रपति रामचन्द्र पौडेल जुद्ध सालिकदेखि पैदलै गद्दी बैठक पुगे । राष्ट्रपति पौडेलले जुद्ध सालिकमा गाडीबाट ओर्लेर पैदल सांस्कृतिक एवं ऐतिहासिक पर्व इन्द्रजात्रा अवलोकन गरेका हुन् ।
इन्द्रजात्रा अवलोकन गर्न राष्ट्राध्यक्ष जुद्ध सालिकबाट पैदल गएको यो पहिलोपटक हो । राष्ट्रपति पौडेल विश्वसम्पदा सुचीमा रहेको सम्पदाहरूको संरक्षण, वातावरणको संरक्षण तथा प्रदुषण कम गर्न सहयोग पुगोस भनेर जुद्ध सालिकदेखि नै पैदल यात्रा गरेको उनको प्रेस सल्लाहकार किरण पोखरेलले जानकारी दिए ।
जसका कारण जात्रा अवलोकन गर्न वसन्तपुर पुगेकाहरुले सहज अनुभव गरेको बताए । अघिल्ला वर्ष राष्ट्रपतिको सवारीका नाममा सर्वसाधारणलाई हिंड्नसमेत रोक लगाइन्थ्यो । गत चैत ४ गते राष्ट्रपति पौडेल वसन्तपुरमा तामझामबिनै कुमारी घर पुगेर जीवित देवी कुमारीको दर्शन गरेका थिए ।
जात्रा अवलोकन गर्न प्रधानन्यायाधीश विश्वम्भरप्रसाद श्रेष्ठ, सभामुख देवराज घिमिरे, राष्ट्रियसभाका अध्यक्ष गणेशप्रसाद तिमल्सिनालगायत मन्त्रीहरु अशोक राई, सुदन किराती, सांसदहरु, प्रदेशसभा सदस्यहरु, स्थानीय तहका जनप्रतिनिधि पनि गद्दी बैठक पुगे । राष्ट्रपति नै पैदल हिँडेपछि विशिष्ट पाहुनाहरु पनि जुद्द सालिकबाट हिँड्दै गद्दी बैठक पुगेका थिए ।
जात्राका अवसरमा राष्ट्रपति पौडेलले श्रीगणेश, श्रीभैरव र श्रीकुमारीको रथमा दक्षिणा चढाई यात्रा गराउने अनुमति दिए । यसपछि श्रीगणेश, श्रीभैरव र श्रीकुमारीको रथयात्रा गरिएको थियो । भाद्र शुक्ल द्वादशीका दिन मंगलबार बिहान हनुमानढोका दरबार क्षेत्रमा इन्द्रध्वजोत्थान गरी सुुरु भएको इन्द्रजात्राको आज मुख्य दिन हो । आज तल्लोटोलमा रथयात्रा चलाइने गुठी संस्थान काठमाडौँ शाखाले जनाएको छ । शुक्रबार माथिल्लो टोलमा रथयात्रा गरिने छ ।
असोज १५ गते महिलाले मात्र रथ तानी नानीचा यात्रा चलाइने छ । यसै दिन बेलुकी राष्ट्रपति पौडेल हनुमानढोका दरबार जानुभई कुमारीबाट टीका एवं प्रसाद ग्रहण गर्नुहुनेछ । टीका प्रसाद ग्रहण गरेपछि राष्ट्राध्यक्षले कुमारीसँग खड्ग साट्ने परम्परा समेत छ ।
बालेनको आभार
भिभिआइपीहरुको पैदल यात्रालाई लिएर काठमाडौं महानगरका मेयर बालेन्द्र साह बालेनले आभार प्रकट गरेका छन् । यसलाई भिभिआइपीहरुले संस्थागत गर्नेमा आफू विश्वस्त रहेकोसमेत बालेनले बताएका छन् । ‘सम्माननीय राष्ट्रपति, अन्य विशिष्ट अतिथीहरूले काठमाडौं महानगरको अनुरोध स्वीकार गरिदिएर विश्व सम्पदा क्षेत्रमा हामीले बनाएको नो भेहकल जोन (सवारी साधन निषेधित क्षेत्र) मा सवारी साधन प्रवेश गराइदिनु भएन,’ बालेनले भनेका छन्, ‘उहाँहरुले जुद्ध सालिकदेखि पैदल नै गई जात्रा अवलोकन गरिदिनु भो । हामीलाई विश्वास छ, यसबाट सम्माननीय राष्ट्रपति, अन्य विशिष्ट अतिथीहरूले जात्रा अवलोकन गर्न पैदल जाने अभ्यासलाई संस्थागत बनाउने छ ।’
भिभिआइपीहरुको पैदल यात्रा सम्पदा संरक्षणको महत्वपूर्ण फड्को भएकोसमेत उनले प्रष्ट्याएका छन् । ‘सामान्य जस्तो लागे पनि काठमाडौँका सम्पदा संरक्षणमा यो अर्को फड्को हो । हाम्रो अनुरोधको परिवर्तनलाई स्विकार गरिदिनु भएकोमा आभारी छौं,’ बालेनले भनेका छन् ।
