- भेलामा महामन्त्री विश्वप्रकाश शर्मा र प्रदीप पौडेललाई पनि निम्तो
- आफ्नै समूहबाट महामन्त्री बनेका गगन थापा उपस्थित हुनेमा शंका
- कोशी प्रदेशको अपदस्थ सरकार र संघीय सरकारमा कांग्रेसको कामबारे प्रश्न गर्ने विषयमा छलफल हुने
काठमाडौं– नेपाली कांग्रेसको केन्द्रीय समिति बैठक यही असोज ४ गतेका लागि बोलाइएको छ । साउन १० गतेको केन्द्रीय समितिले असोज २ गतेका लागि मिति तय गरे पनि अन्तिम समयमा बैठकको मिति सारिएको हो ।
केन्द्रीय समितिअघि संस्थापनइत्तर पक्षले आफ्नो समूहको बैठक डाकेको छ । संस्थापनइत्तर समूहका नेता डा. शेखर कोइरालाले आज (मंगलबार) अपराह्न १ बजे बालुवाटारस्थित आफ्नो सम्पर्क कार्यालयमा भेला राखेका हुन् । भेलामा महामन्त्री विश्वप्रकाश शर्मालाई पनि बोलाइएको कोइरालाका स्वकीय सचिव दिनेश थपलियाले जानकारी दिए । त्यसैगरी भेलामा प्रदीप पौडेललाई पनि निम्तो रहेको उनले बताए ।
‘बैठक केन्द्रीय समितिमा कसरी प्रस्तुत हुने भन्ने विषयमा छलफलका लागि बोलाइएको हो । दिउँसो १ बजे बालुवाटारमा बस्नेछ,’ थपलियाले भने । शेखर पक्षबाट महामन्त्री बनेका गगन थापालाई निम्ता दिइएको हो वा हैन भन्नेबारे उनले खुलाएनन् । संसदीय दलको निर्वाचनयता शेखर र गगन आफ्नो गुटगत भेलामा कतै एकै ठाउँमा देखिएका छैनन् ।
यद्यपि, दुवै नेताले आफूहरु नछुट्टिएको दाबी गर्छन् । महामन्त्री शर्मालाई पनि निम्ता गरिएकोले यो भेलालाई अर्थपूर्ण रुपमा हेरिएको छ । शर्माले संसदीय दलमा गगनलाई सहयोग गरेका थिए । अहिले पार्टीमा उनी उपसभापति पूर्णबहादुर खड्का निकट छन् । देउवाको अघिल्लो कार्यकालमा कांग्रेस प्रवक्ता बनेका शर्माको उपस्थिति भएमा गगनलाई धक्का हुनसक्ने बताइएको छ । २०७८ मंसिरमा भएको १४औं महाधिवेशनमा शर्मा प्रकाशमान सिंहको प्यानलबाट प्रतिस्पर्धा गरेर महामन्त्रीमा निर्वाचित भएका थिए ।
यस्तै सभापति शेरबहादुर देउवाको प्यानलबाट महामन्त्रीमा प्रतिस्पर्धा गरी पराजित भएका पौडेललाई पनि कोइरालाले आफ्नो गुटको भेलामा निम्ता दिएका छन् । संसदीय दलको निर्वाचनमा पौडेलले देउवा गुट छाडेका थिए । कोइरालाले साउन पहिलो साता बसेको केन्द्रीय समिति बैठकअघि भने गुटगत भेला राखेका थिएनन् ।
केन्द्रीय समितिमा के छन् एजेण्डा ?
नेपाली कांग्रेस सत्ता साझेदार पार्टी हो । प्रधानमन्त्री पुष्पकमल दाहाल नेतृत्वको सरकारमा कांग्रेसबाट नौ जना मन्त्री छन् । कुनै मन्त्रीले राम्रो काम देखाउन सकेका छैनन् । केन्द्रीय समितिमा कांग्रेस संस्थापनइतरले यस विषयलाई जोडका साथ उठाउने तयारी गरेको छ । यसैगरी संविधानविपरीत कामका कारण कांग्रेसले कोशी प्रदेशमा दुईपटक सरकार गुमाएको छ ।
डा. शेखरले दुवैपटक कांग्रेस गठबन्धनको कदमको विरोध जनाएका थिए । यसै विषयमा पनि संस्थापनइतरले केन्द्रीय समितिमा आवाज उठाउने तयारी गरेको छ ।
त्यसैगरी कांग्रेसले विधानअनुसार चल्नुपर्ने धेरै विभागहरु गठन गर्न सकेको छैन । भदौ तेस्रो साताबाट गर्ने भनिएको ‘समुदायमा कांग्रेस’ कार्यक्रम स्थगित गरेर राखेको छ । महाधिवेशन सम्पन्न भएको २१ महिना बित्दा पनि देउवाले पार्टीको विभाग गठन गरेका छैनन् । पार्टी विधानअनुसार ७० वटा विभाग गठन गरिनुपर्नेमा देउवाले अहिलेसम्म १६ वटा विभागमा संयोजक तोक्ने काममात्र गरेका छन् ।
विभाग गठन नगरेको, सरकारले जनतामा भरोसा जगाउने गरी काम गर्न नसकेको, पार्टीबाट सरकारमा सहभागी सदस्यको भूमिकालगायत विषयमा साझा धारणा बनाउने प्रयोजनका लागि भेला राखेको कोइराला निकट एक पदाधिकारीले जानकारी दिए ।
