काठमाडौं - वैदेशिक रोजगारीमा पठाइदिने भन्दै विभिन्न व्यक्तिलाई ठगी गरेको आरोपमा दुई जना पक्राउ परेका छन् । साइप्रस र युकेमा आकर्षक तलबसहितको रोजगारी लगाइदिने भन्दै पीडितबाट रकम लिएर फरार रहेको आरोपमा चेतना श्रेष्ठ र मुक्तिराज बोम्जनलाई प्रहरीले पक्राउ गरेको हो ।
उदयपुरको बेलका नगरपालिका–५ स्थायी घर भई हाल ललितपुर मंगलबजार बस्ने ३२ वर्षीया श्रेष्ठले राधेश्याम बानियालाई साइप्रस जान प्रतिव्यक्ति १५ लाख ६५ हजार रुपैयाँ लाग्ने र त्यहाँ पुगेपछि कृषि फार्ममा काम लागाइदिने भन्दै पटक–पटक गरी सात लाख ५० हजार रुपैयाँ लिएर ठगी गरेको प्रहरीले जनाएको छ ।
उनले पीडितलाई क्यानडामा एक लाख ५० हजार रुपैयाँभन्दा बढी मासिक तलब हुने भनी विश्वास दिलाई पैसा लिएर सम्पर्कविहीन भएको अवस्थामा पक्राउ गरिएको प्रहरीले जनाएको छ । श्रेष्ठलाई खोजतालासका क्रममा मंगलबजारबाटै पक्राउ गरिएको प्रहरीले जनाएको छ ।
त्यस्तै पर्साको निर्मलवस्ती–२ स्थायी घर भई हाल काभ्रे बनेपा बस्ने ४४ वर्षीय बोम्जनले प्रकाश कठायतसमेत सात जनालाई आकर्षक रोजगारीका लागि युके पठाइदिने भन्दै रकम लिएर २० लाख रुपैयाँ लिएर ठगी गरेको प्रहरीले जनाएको छ । पीडितलाई विश्वास दिलाइ मासिक तीन लाख रुपैयाँ तलब हुने प्रलोभनमा पारी रकम संकलन गरी सम्पर्कविहीन रहेका बोम्जनलाई धुलिखेलबाट पक्राउ गरिएको प्रहरीले जनाएको छ ।
उनीहरु दुवै जनालाई काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले पक्राउ गरेको हो । पीडितबाट पटक–पटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनीहरुलाई थप अनुसन्धान तथा कारबाहीको लागि विभागमा बुझाइएको प्रहरी उपरीक्षक रविन्द्र रेग्मीले जानकारी दिए ।
