काठमाडौं- एसिया कप क्रिकेटमा नेपालले आज पहिलो खेल खेल्दै छ । पहिलो खेलमा एकदिवसीय वरीयतामा विश्वको नम्बर एक राष्ट्र पाकिस्तानको सामना गर्दै छ । खेल नेपाली समयअनुसार आज दिउँसो सवा ३ बजे सुरु हुनेछ ।घरेलु टोली पाकिस्तानसँग पनि नेपालको यो पहिलो भेट हुनेछ । नेपालले लामो समयको प्रतीक्षापछि एसिया कप खेल्न लागेको हो ।
त्यसैले पाकिस्तानसँगको यो खेल नेपाली क्रिकेटप्रेमीका लागि ऐतिहासिक र उत्साहपूर्ण रहने सरोकारवालाहरुको भनाइ छ । एसिया कपको पहिलो खेलमै नम्बर एक राष्ट्रसँग खेल्न पाउनु नेपालका लागि सुनौलो अवसर भएको उनीहरु बताउँछन् । पाकिस्तानसँगको खेल जितका लागि सहज नभए पनि नेपाललाई विश्वमाझ आफ्नो क्षमता उजागर गर्ने ऐतिहासिक अवसर हो ।
नेपालका लागि हार वा जितभन्दा पनि राम्रो क्रिकेट खेलेर विश्वलाई आफ्नो खेल कौशल क्षमताबाट प्रभाव छाड्नुपर्ने विश्लेषकहरुको भनाइ छ । यद्यपि, क्रिकेटमा नतिजा जे पनि हुन सक्छ ।पाकिस्तान र श्रीलंकाले संयुक्तरुपमा आयोजना गरेको यो प्रतियोगितामा नेपालले पाकिस्तानविरुद्धको खेलपछि समूह चरणको दोस्रो खेल भारतसँग खेल्नेछ । भारत विश्व वरीयतामा तेस्रो स्थानमा छ । नेपाल भने १५औं स्थानमा छ ।गत वैशाखमा सम्पन्न एसिसी प्रिमियर कपमा च्याम्पियन बनेपछि नेपाल एसिया कपका लागि छनोट भएको हो ।
उक्त प्रतियोगिताको फाइनल खेलमा नेपालले संयुक्त अरब इमिरेट्स (युएई)लाई सात विकेटले पराजित गरेको थियो ।एसिया कपमा १३ खेलमध्ये चार खेल पाकिस्तानमा हुनेछन् भने बाँकी नौ खेल श्रीलंकामा हुनेछन् । प्रतियोगितामा छ राष्ट्रको सहभागिता रहनेछ । दुई समूहमा विभाजन गरिएको उक्त प्रतियोगिताको समूह ‘ए’ नेपाल, भारत र पाकिस्तान तथा समूह ‘बी’ मा बंगलादेश, श्रीलंका र अफगानिस्तान छन् ।
नेपाली टोलीमा कप्तान रोहितकुमार पौडेल, आशिफ शेख, कुशल भुर्तेल, सन्दीप लामिछाने, ललितनारायण राजवंशी, भीम सार्की, कुशल मल्ल, दीपेन्द्रसिंह ऐरी, करण केसी, गुल्सन झा, आरिफ शेख, सोमपाल कामी, अर्जुन साउद, प्रतिश जिसी, किशोर महतो, सन्दीप जोरा र श्याम ढकाल रहेका छन् ।
