काठमाडौं – नेपाली कांग्रेसका नेता डा. शेखर कोइरालाले कोशी सरकार निर्माणमा पुनः आपत्ति जनाएका छन् । मुख्यमन्त्री उद्धव थापालाई बहुमतका लागि सभाध्यक्षलाई भोट हाल्न लगाइएकामा कोइरालाले गरे विरोध गरेका हुन् ।
मंगलबार विराटनगर पुगेका कोइरालाले विमानस्थलमा संवाददातासँग कोशी प्रदेशसभामा सभाध्यक्षको भूमिका निर्वाह गरेका कांग्रेस सांसद् इसराइल मन्सुरीले विश्वासको मतदानमा भाग लिएकामा आपत्ति जनाए । असार २२ गते थापा पहिलोपटक मुख्यमन्त्री नियुक्त हुँदा पनि कोइरालाले प्रक्रिया नमिलेको भन्दै विरोध जनाएका थिए ।
‘मैले पहिले पनि सरकार बनाउने खेलमा तत्कालीन सभामुख बाबुराम गौतम सहभागी हुँदा ट्विट गरेर विरोध जनाएको थिएँ,’ उनले भने, ‘त्यो ट्विटप्रति म अडिग छु । अहिले पनि गल्ती भएको छ । सभाध्यक्ष भनेको सभामुख नै हो । उहाँले मतदान गरेर गलत नै भएको छ । पहिलेको निर्णय पनि सही थिएन । यसपटक हामीले त्यही दोहोर्यायौं ।’
कोशीका मुख्यमन्त्री थापाले बहुमत पुर्याउनका लागि सोमबार सभा सञ्चालन गरिरहेका मन्सुराई पनि मत हाल्न लगाएका थिए । कोइरालाले यस प्रकरणमा फेरि सर्वोच्च अदालतले निर्णय दिने बताए । उनले सर्वोच्चबाट फेरि पहिलेजस्तै निर्णय आउने र सरकार गठन प्रक्रिया संविधानको धारा १६८ को उपधारा ३ मा प्रवेश गर्ने सम्भावना औंल्याए । कांग्रेसजस्तो लोकतान्त्रिक पार्टी पनि किन यस्तो अलोकतान्त्रिक खेलमा संलग्न भन्ने संवाददाताहरूको प्रश्नमा कोइरालाको जवाफ थियो, ‘यहाँ कांग्रेस मात्र एक्लै छैन । सत्ता गठबन्धन छ । त्यसैले कांग्रेसको निर्णयले मात्र हुने होइन । गठबन्धनले जे निर्णय गर्यो त्यही हुने हो ।’
कोइरालाले नक्कली भुटानी शरणार्थी प्रकरणमा अनुसन्धानमा संलग्न प्रहरी अधिकृतको सरुवाप्रति पनि आपत्ति प्रकट गरे । ‘अनुसन्धानमा संलग्न प्रहरी अधिकृतहरूको सरुवा भएको छ,’ डा. कोइरालाले भने, ‘अनुसन्धानले गर्ने निर्णय अब सरकारले नै गर्न थालेको छ । अनुसन्धानको त एउटा प्रक्रिया हुन्छ । कुनै पनि अनुसन्धान निश्चित समयमा एउटा ठोस निष्कर्षमा पुग्छ । तर यहाँ त अनुसन्धान निष्कर्षमा पुग्नै नपाई सरकार आफैंले अनुसन्धानको डिटरमाइन्ड गरेको छ । यसले लोकतान्त्रिक पद्धति र मूल्यमान्यतालाई कमजोर बनाएको छ ।’
