- आज प्रदेशसभामा विश्वासको मत लिने कार्यसूची
- एमाले र राप्रपाका नौ जना ज्येष्ठ प्रदेशसभा सदस्य अनुपस्थित हुने
- उपसभामुख सिर्जना दनुवारलाई अनुपस्थित गराउने एमालेको तयारी
काठमाडौं - कोशी प्रदेशका मुख्यमन्त्री उद्धव थापाको पद संकटमा परेको छ । आज विश्वासको मत लिने तयारीमा रहेका उनलाई प्रतिपक्षी दल नेकपा एमाले र राष्ट्रिय प्रजातन्त्र पार्टीका ज्येष्ठ प्रदेशसभा सदस्यहरु अनुपस्थित हुने भएपछि संकट आइपरेको हो ।
एमाले र राप्रपाका नौ प्रदेशसभा सदस्यले आइतबार नै आजको संसद् बैठकमा उपस्थित हुन नसक्ने जानकारी प्रदेशसभा सचिवालयलाई दिएका हुन् । कोशी प्रदेशसभा सचिवालयका प्रवक्ता गौतमराज अमात्यका अनुसार एमालेका सांसदहरु रोहितबहादुर कार्की, मालतीकुमारी लिम्बू, रामप्रसाद महतो, तारादेवी ढकाल, खड्गबहादुर बस्नेत र ज्ञानेन्द्र सुवेदीले छुट्टाछुट्टै निवेदन दिई बैठकमा उपस्थित हुन नसक्ने बताएका हुन् ।
अमेरिकामा रहेका एमालेकै सांसद किशोरचन्द्र दुलालले पनि सोही जानकारी दिएका छन् ।यसैगरी राप्रपाका अम्बरबहादुर विष्ट र गोपालबहादुर विश्वकर्माले सोमबारको प्रदेशसभा बैठकमा उपस्थित हुन नसक्ने भन्दै निवेदन दिएको प्रवक्ता अमात्यले बताए । उनीहरुले घरायसी जरुरी काम देखाउँदै उपस्थित हुन नसक्ने जानकारी दिएको बताइएको छ ।
प्रतिपक्ष दलको यो कदम मुख्यमन्त्रीलाई विश्वासको मत पाउनबाट असफल बनाउनु हो । कोशी प्रदेशमा तत्कालीन सभामुख बाबुराम गौतमले राजीनामा दिएपछि उक्त पद रिक्त छ । उपसभामुखमा एमालेकी सिर्जना दनुवार छिन् । एमालेले उनलाई अनुपस्थित गराउने चर्चा चलिरहँदा एमाले र राप्रपाका ज्येष्ठ सदस्यहरु स्थगित हुने निवेदन प्रदेशसभामा दर्ता भएको हो ।
सभामुख र उपसभामुख दुवै नहुँदा प्रदेशसभाका ज्येष्ठ सदस्यले बैठक सञ्चालन गर्नुपर्ने हुन्छ । सत्तापक्षको ज्येष्ठ सदस्यले बैठक सञ्चालन गर्दा मुख्यमन्त्री थापालाई विश्वासको मत पुग्दैन । त्यसैले प्रतिपक्षबाटै अध्यक्ष गराउने सत्तापक्षको दाउ छ । अर्कोतर्फ सत्तापक्षकै ज्येष्ठ सदस्यलाई बैठक सञ्चालन गराएर विश्वासको मत नपाउने वातावरण बनाउनेतर्फ प्रतिपक्षी दलहरु केन्द्रित भएका छन् ।
साउन १६ गते मुख्यमन्त्री नियुक्त भएका थापाले आज विश्वासको मत लिने कार्यसूची तोकिएको छ । विश्वासको मत पाउन नसके उनी पदच्युत हुनेछन् र ठूलो दलको हैसियतमा एमालेले सरकारको नेतृत्व गर्ने अवसर पाउनेछ ।कूल ९३ सदस्यीय प्रदेशसभामा थापालाई विश्वासको मत पाउन ४७ मत आवश्यक पर्छ । सत्ता पक्षसँग ४७ जनामात्र प्रदेशसभा सदस्य छन् । यदि एक जनाले बैठक सञ्चालन गर्नुपर्ने अवस्था आए विश्वासको मत पुग्दैन । किनभने बैठक सञ्चालन गर्ने सदस्यले मत दिन पाउँदैनन् ।
यसअघि सभामुख पदमा बहाल रहेकै अवस्थामा प्रदेशसभा सभामुख बाबुराम गौतमको हस्ताक्षरमा कांग्रेसका थापा मुख्यमन्त्री बनेका थिए । तर, सर्वोच्च अदालतले सभामुख पद निष्पक्ष हुनुपर्ने भन्दै मुख्यमन्त्री नियुक्ति बदर गर्ने आदेश दिएको थियो । त्यसपछि सभामुख गौतमले राजीनामा दिएपछि थापा मुख्यमन्त्री नियुक्त भएका थिए । संविधानअनुसार मुख्यमन्त्री नियुक्त भएको ३० दिनभित्र प्रदेशसभाबाट विश्वासको मत लिनुपर्ने हुन्छ ।
एमाले संसदीय दलका नेता राम राना मगरले आफ्नो दलले मुख्यमन्त्री थापालाई विश्वासको मत नदिने प्रस्ट पारे । आफूहरु सरकार जतिसक्दो छिटो ढलोस् भन्नेमा रहेको उनले बताए ।नेपाली कांग्रेस संसदीय दलका सचेतक भूपेन्द्र राईले भने विश्वासको मत पाउनेमा ढुक्क रहेको बताए । ‘मुख्यमन्त्रीले विश्वासको मत लिने सूचना दर्ता गरेपछि भोलिको समय पाउनुभयो । तर, एमाले र राप्रपाका गरी ८ जनाले संसद् बैठकमा सहभागी हुन नसक्ने भनेर सूचना दर्ता गराएका छन् । उपसभामुखले बैठकको अध्यक्षता नगर्ने सम्भावना देखिन्छ । हेरौं, भोलि बिहानसम्मको राजनीतिक जोड घटाउ के हुन्छ,’ उनले भने, ‘हामी त विश्वासको मत पाउनेमा ढुक्क छौं । हामीसँग ४७ जना सांसद छन् । यो संख्या प्रदेश संसद्को बहुमत हो ।’
