- शुक्रबार प्रधानमन्त्री पुष्पकमल दाहाल र सभामुख देवराज घिमिरेबीच छलफल
- बुधबारमात्र राष्ट्रपति रामचन्द्र पौडेल र एमाले अध्यक्ष केपी शर्मा ओलीबीच भेटवार्ता
- सर्वदलीय बैठक बोलाएर भए पनि संसद्को अवरोध हटाउने प्रयासमा राष्ट्रपति
काठमाडौं– संसद्मा जारी अवरोध खुलाउन राष्ट्रपति रामचन्द्र पौडेलले सक्रियता बढाएका छन् । सुन प्रकरणमा उच्चस्तरीय छानबिन समितिको माग गर्दै प्रमुख प्रतिपक्षी दल नेकपा एमालेले सदनमा अवरोध जारी राखेपछि राष्ट्रपति पौडेल सक्रिय बनेका हुन् । बुधबारमात्र राष्ट्रपति पौडेल र एमाले अध्यक्ष ओलीबीच भेट भएको थियो ।
राष्ट्रपति भवन शीतलनिवासमा भएको भेटमा समसामयिक राजनीति र संसद््का गतिरोधबारे छलफल भएको राष्ट्रपतिका प्रेस सल्लाहकार किरण पोखरेलले जानकारी दिए । पोखरेलका अनुसार भेटमा राष्ट्रपति पौडेलले लामो समय संसद्् चल्न नसक्दा जनतामा नैराश्यता बढ्ने र संसद्प्रति नै जनतामा नकारात्मक प्रभाव पर्ने भएकाले संसद्् गतिरोध अन्त्य गर्न ध्यानाकर्षण गराएका थिए ।
राष्ट्रपति पौडेलले सत्ता र प्रतिपक्षलगायत संसद््मा रहेका सबै दललाई विश्वासमा वातावरण सिर्जना गरेर अघि बढ्न सुझाव पनि दिएका थिए । सदन खुलाउनका लागि शुक्रबार प्रधानमन्त्री पुष्पकमल दाहाल र सभामुख देवराज घिमिरेबीच छलफल भएको छ । प्रधानमन्त्रीनिवास बालुवाटारमा भएको छलफलमा प्रधानमन्त्री दाहालले सदनको व्यवधान खुलाउन आफूले पहल गर्ने बताए । ‘म सदन खुलाउन भूमिका खेल्छु । तपाईं पनि लाग्नुहोस् । छिट्टै सहमति गर्नैपर्छ । म प्रमुख विपक्षी दलको नेतासँग थप पहल गर्छु,’ सभामुखसँग प्रधानमन्त्री दाहालले भने ।
भेटमा सभामुख घिमिरेले सदन नचल्नु राम्रो नभएको भन्दै तत्काल पहल थाल्न प्रधानमन्त्री दाहालको ध्यानाकर्षण गराएका थिए ।
‘माननीयहरूले बोल्न समय माग्नुभएको छ । प्राकृतिक विपत्तिलगायतका विषयमा माननीयले बोल्न पाइनँ भन्नुहुन्छ । दलीय सहमतिबिना सदन अगाडि बढ्न सक्ने स्थिति छैन,’ सभामुख घिमिरेले भने, ‘आमजनताले पनि सदन अवरोधलाई राम्रो मानेका छैनन् । कम्तीमा सदन खुलाउन सत्तापक्ष र प्रतिपक्षले गम्भीरतापूर्वक छलफल गरिदिनुहोस् ।’
सभामुख घिमिरेले संसदीय समितिको नेतृत्व चयन हुन नसक्दा संसद्मा कानुन निर्माण भएनन् भन्ने गुनासो पनि व्याप्त रहेको उल्लेख गर्दै सदनको अवरोध खुलाउन आग्रह गरेका थिए । राष्ट्रपति पौडेलले सर्वदलीय बैठक बोलाएर भए पनि संसद्को अवरोध हटाउने प्रयासमा लागेको राष्ट्रपतिका राजनीतिक सल्लाहकार सुनिलबहादुर थापाले बताएका छन् ।
साउन १० बाट निरन्तर अवरोध
साउन १० गते बसेको प्रतिनिधिसभाको बैठकमा १९ जना सांसदले आकस्मिक समयमा बोलेपछि एमालेले सुन तस्करी प्रकरणमा समितिको माग गर्दै संसद् अवरुद्ध गरेको थियो । सभामुख घिमिरेले शून्य समयको कारबाही अघि बढाउनेबित्तिकै एमालेका सांसदहरु उभिएर बैठक अवरुद्ध गर्न थालेपछि उनले प्रमुख सचेतक पदम गिरीलाई बोल्न समय दिएका थिए ।
प्रमुख सचेतक गिरीले छानबिन समिति गठनका लागि सभामुखको रुलिङको माग गरे । त्यसपछि एमाले सांसदहरुले बेल घेराउसहित नाराबाजी गर्दै बैठक अवरुद्ध गरे । साउन १५ गतेका लागि बोलाइएको प्रतिनिधि सभा बैठक चलाउने विषयमा सत्तापक्ष र विपक्षी दलको कुरा नमिलेपछि सूचना टाँस गरेर साउन १६ गतेका लागि बैठक बोलाइयो ।
साउन १६ गतेका लागि बोलाइएको बैठकअघि बसेको कार्यव्यवस्था परामर्श समितिको बैठकमा सत्तापक्ष र प्रतिपक्षको कुरा नमिलेपछि सूचना टाँस गरेर साउन २२ गतेसम्म बैठक स्थगित गरियो ।
साउन २२ गते दिउँसो १ बजेका लागि बोलाइएको बैठक चलाउन प्रधानमन्त्री निवास बालुवाटारमा सत्तापक्ष र प्रतिपक्ष दलको बैठक बोलाइएको थियो । तर संसद् खुलाउने विषयमा सहमति नभएपछि सूचना टाँसेर दिउँसो ४ बजेसम्मका लागि स्थगित गरिएको थियो ।
प्रधानमन्त्री दाहाल, कांग्रेस सभापति शेरबहादुर देउवा र प्रमुख प्रतिपक्षी दल एमाले अध्यक्ष ओलीबीच बालुवाटारमा भएको छलफलमा सहमति जुटेन । दिउँसो ३ बजेका लागि बानेश्वरमा बोलाइएको अर्को बैठकमा पनि सहमति नभएपछि अपराह्न ४ बजे बोलाइएको बैठक सूचना टाँसेर स्थगित गरिएको थियो ।
साउन २३ गते प्रतिनिधि सभाको बैठकमा गृहमन्त्री नारायणकाजी श्रेष्ठले सांसदहरुले सोधेका प्रश्नको जवाफ दिएका थिए । विभिन्न दलबाट १२ जना सांसदहरुले भनाइ राखेपछि बोलेका गृहमन्त्री श्रेष्ठको जवाफ चित्त नबुझेको भन्दै एमालेले संसद् अवरुद्ध गरेको थियो ।
चैत २४ गते दिउँसो १ बजेका लागि बोलाइएको बैठक पनि एमालेले होहल्ला र नाराबाजी गर्दै अवरोध गरेपछि साउन २६ गतेका लागि बोलाइएको थियो । साउन २६ गतेको प्रतिनिधिसभा बैठकमा सभामुख देवराज घिमिरेले एमाले सांसद ज्वालाकुमारी साहलाई बोल्न दिएपछि सत्तापक्ष सांसदहरुले पनि बोल्न समय माग्दै होहल्ला गरे । त्यसपछि एमाले सांसदहरुले सभामुखको बेल घेराउसहित नाराबाजी गर्दै संसद् अवरुद्ध गरेका थिए ।
साउन २९ गते बसेको प्रतिनिधिसभाको बैठकमा सभामुख घिमिरेले सत्तारुढ दलको तर सरकारको विरोधमा बोल्न चाहेका कांग्रेस सांसद सुनील शर्मालाई समय दिएका थिए । त्यसपछि एमाले सांसद मानवीर राईलाई समय दिएका थिए । राईले बोलेपछि राष्ट्रिय स्वतन्त्र पार्टीका नेता रवि लामिछानेले बोल्ने समय मागे । तर, सभामुखले शून्य समयको कारबाही अघि बढाए । लगत्तै एमाले सांसदहरुले नाराबाजी गर्दै संसद् अवरुद्ध गरेका थिए । अवरुद्ध बैठक आइतबार दिउँसो १ बजे बस्दै छ ।
