- कांग्रेस महामन्त्री गगन थापाले बालकृष्ण खाणलाई पार्टीबाट निलम्बन गर्नुपर्ने माग चर्काएका थिए
- आरजु राणा देउवाको नाम पोलेको अडियो फेक भनेर दाबी गरे पनि पछि प्रहरीले सन्देश शर्माकै स्वरसँग मेल खाएको भन्दै विज्ञप्ति जारी गरेपछि देउवालाई थप तनाव आइलागेको थियो
- आफ्नै पार्टीका संस्थापनइतरका सांसद सुनिल शर्मा पक्राउ परेपछि देउवालाई राहत मिलेको नेताहरुको दाबी
काठमाडौं– नक्कली भुटानी शरणार्थी प्रकरणमा आफ्नै क्याबिनेटका गृहमन्त्री बालकृष्ण खाण पक्राउ परेपछि चर्को आलोचना खेपे कांग्रेस सभापति शेरबहादुर देउवाले । खाण देउवा गुटका बलिया नेता हुन् । वैशाख २७ गते नेपालीलाई भुटानी शरणार्थी बनाएर अमेरिका लैजाने भनी ठगी गरेको प्रकरणमा खाण पक्राउ परे । असार १ बाट खाण पूर्पक्षका लागि थुनामा छन् ।
खाणलाई नेपाली कांग्रेसले केन्द्रीय समितिले केन्द्रीय सदस्यबाट निलम्बन गरेको छैन । जबकि यही प्रकरणमा पूर्पक्षका लागि थुनामा परेका एमाले सचिव टोपबहादुर रायमाझीलाई पार्टीले पदबाट निलम्बन गरिसकेको छ ।खाणलाई पार्टीबाट हटाउन नेपाली कांग्रेसका संस्थापनइतर पक्षबाट ठूलो दबाब पुग्यो । तर साउन २ बाट सुरु भएको कांग्रेस केन्द्रीय समितिमा अधिकांशले खाणको बचाऊ गरे ।
अदालतबाट प्रमाणित नभइसकेको मुद्दामा पार्टीले निर्णय गर्न नहुने तर्क उनीहरुको रह्यो । तर कांग्रेस महामन्त्री गगन थापाले भने खाणलाई पार्टीबाट निलम्बन गर्नुपर्ने फरक तर्क राखे । ‘नक्कली भुटानी शरणार्थी प्रकरणमा संलग्न भएको अभियोगमा पुर्पक्षका लागि थुनामा रहेका तथा अनुसन्धानको दायरामा आएका कुनै पनि तहका नेता, कार्यकर्ता वा सदस्यलाई पार्टीबाट निलम्बन गरौं । जसरी संसद्बाट निलम्बन हुन्छ, त्यसरी पार्टीबाट पनि हुन्छ । यो नै विधिको शासन र विधिशास्त्रको मान्यता हो,’ थापाले साउन ८ गते आफ्नो धारणा सुनाए केन्द्रीय समितिमा ।
खाण पक्राउका कारणमात्र हैन नक्कली शरणार्थी प्रकरणमा आफ्नै पत्नी आरजु देउवाको नामसमेत अभियुक्तहरुले मुछिदिएपछि तनावमा परेका थिए देउवा । सन्देश शर्माले आरजुको नाम पोलेका थिए । उक्त अडियो ‘फेक’ भन्दै आरजुले प्रहरीको साइबर सेलमा उजुरी दिएकी थिइन् । यद्यपि उक्त अडियो शर्माकै स्वरसँग मेल खाएको भन्दै असार २४ गते प्रहरीले विज्ञप्ति जारी गरेपछि देउवालाई थप तनाव आइलागेको थियो । यस अवधिमा मौन बसेको देउवालाई आफ्नै पार्टीका सांसद सुनिल शर्मा पक्राउ परेपछि राहत मिलेको छ ।
शर्माले साउन ३ गते विमानस्थलबाट पास भएर सिनामंगलबाट जफत ६० केजी सुन प्रकरणमा अर्थमन्त्री डा. प्रकाशशरण महत र गृहमन्त्री नारायणकाजी श्रेष्ठको राजीनामा माग गरेका थिए । यतिमात्र हैन दुई मन्त्रीको राजीनामा नआए आफू संसद्मै आमरण अनसन बस्ने घोषणा गरेका थिए । उनै सांसद शर्मालाई प्रमुख प्रतिपक्षी दल नेकपा एमालेले पनि साथ दियो । साउन २५ गते शर्मा नक्कली प्रमाणपत्र प्रकरणमा प्रहरीको फन्दामा परे । त्यसपछि कांग्रेस संस्थापनइतर चुप बस्न बाध्य भयो ।
बरु शुक्रबारको बैठकमा नेकपा एमालेले शर्मा पक्राउबारे आपत्ति जनाए । एमाले अध्यक्ष केपी शर्मा ओलीले शर्माको पटक–पटक बचाऊ गरे । यतिमात्र हैनन् शर्माले ओलीको जयजयकारसमेत गरे । शर्माको हर्कत्ले कांग्रेस संस्थापनइतरका नेताहरु डा. शेखर कोइराला र महामन्त्री गगन थापा चुप बस्न बाध्य भए । देउवाका आलोचक गगनलेसमेत शर्मा प्रकरणमा मुख खोल्न सकेनन् ।
‘बोलुँ बालकृष्ण खाणको निलम्बन मागेकोले किन बोले भन्लान् भन्ने डर, नबोलु आफ्नै गुटका नेताले गुट फेर्लान् भन्ने डर,’ कांग्रेसका एक केन्द्रीय सदस्यले भने, ‘त्यसपछि न त शेखर बोले न त गगन ।’ अदालतले म्याद नथपेपछि प्रहरीले शर्मालाई शनिबार छाडिदियो । त्यसपछि डा शेखरले केही मुख खोले शर्माको पक्षमा । ‘सुन काण्डका विषयमा नेपाली कांग्रेसकै एक सांसदले गृहमन्त्री र अर्थमन्त्रीको राजीनामा माग्नुभयो । उहाँका गल्ती–कमजोरीहरू होलान्, त्यसको छानबिन र कारबाही हुनुपर्छ,’ कोइरालाले भने, ‘तर, प्रतिशोधको भावनाले अघि बढ्ने हो भने देशलाई कहाँ पुर्याउन खोजिएको हो ? यो अहिले गम्भीर विषय हो ।’
यसअघि नै शुक्रबारको संसदीय दलको बैठकमा संस्थापन पक्षका नेताहरुले शर्मा पक्राउ गैरकानुनी भनेका थिए । मेडिकल कलेजका सञ्चालकसमेत रहेका शर्माको कक्षा १२ का प्रमाणपत्र नक्कली रहेको प्रहरीको दाबी छ । सात वर्षअघि नै प्रहरीले उनलाई ‘अपरेसन क्वाक’मा पक्राउ गर्ने तयारी गरेको थियो । तर त्यतिबेला शर्मा जापान भागेका थिए । उनै शर्मा पक्राउ प्रकरणले देउवालाई संस्थापनइतरलाई तह लगाउने गरी हाइसञ्चो भएको कांग्रेसकै नेताहरु दाबी गर्छन् ।
