काठमाडौं (प्रस)– गैरआवासीय नेपाली संघको तेस्रो एनआरएन विश्व ज्ञान सम्मेलन आगामी असोज ३० र कात्तिक १ गते (अक्टोबर १७ र १८)मा हुने भएको छ । सम्मेलनमा २५ भन्दा बढी देशका १०० भन्दा बढी प्रतिष्ठित विश्वविद्यालय, अनुसन्धान केन्द्रहरुबाट ३०० भन्दा बढी प्रस्तोताहरुको सहभागिता रहने बताइएको छ ।
सम्मेलनमा २०० वटा कार्यपत्र प्रस्तुत गरी छलफल हुने शुक्रबार ‘भर्चुअल’ माध्यमबाट आयोजित पत्रकार सम्मेलनमा जानकारी दिइएको हो ।
सम्मेलनका संयोजक सहप्राध्यापक राजु अधिकारीले सम्मेलनका लागि आवश्यक सबै तयारी पूरा हुने क्रममा रहेको बताए । ‘सामाजिक अर्थतन्त्र विकासका लागि वैज्ञानिक अन्वेषण र लगानी’ भन्ने मूल नारा रहेको यो सम्मेलनमा अर्थ, विज्ञान, पूर्वाधार, कृषि र ऊर्जामा आधारित चारवटा प्लेनरी सेसनसहित ११ विभिन्न विधामा गैरआवासीय नेपाली विज्ञहरु, नेपालमा रहेका विज्ञहरु र नेपालसँग जोडिएका विदेशी विज्ञहरुले कार्यपत्र प्रस्तुत गर्ने उनको भनाइ छ ।
‘विशेषतः दिगो सहरी विकास योजना, दिगो कृषि र खाद्य सुरक्षा, वातावरण, प्रकोप र जोखिमव्यवस्थापन, नवीकरणीय ऊर्जा, जैविक प्रविधि र व्यवसायिक अवसर, विज्ञान तथा प्रविधीमा लगानी र नीतिहरू, डिजिटल र एआई प्रविधि, जनसंख्या र जनस्वास्थ्य, अर्थतन्त्र र विदेशी लगानी, दिगो पूर्वाधार र निर्माण सामग्री, वैदेशिक रोजगारी र व्यवसायिक प्राविधिक शिक्षालगायतका विषयमा बृहत् छलफल गरिने छ,’ संयोजक अधिकारीले भने, ‘सम्मेलनले पारम्परिक अर्थतन्त्रलाई ज्ञान र प्रविधिमा आधारित अर्थतन्त्रमा परिवर्तन गर्ने र संयुक्त राष्ट्रसंघको स्थायी विकासका लक्ष्यहरूलाई समेत सम्बोधन गर्ने अपेक्षा राखेका छौं ।’
सम्मेलनका लागि ३१ जुलाई २०२३ (साउन १५) देखि कार्यपत्र आह्वान गरिएको पनि उनले जानकारी दिए ।
