- कार्यविधिविपरीत उच्च अधिकारीलाई विलासी गाडीको सुविधा
- गभर्नर महाप्रसाद अधिकारीकै संरक्षणमा मौलाउँदै बेथिति
काठमाडौं– बैंक तथा वित्तीय संस्थाहरुलाई सुशासनमा बाँध्ने जिम्मेवारी पाएको केन्द्रीय बैंकभित्रै बेथिति मौलाउँदै गएको पाइएको छ । राष्ट्र बैंकका गभर्नर महाप्रसाद अधिकारीकै संरक्षणमा यस्तो प्रवृत्ति मौलाउँदै गएको पछिल्लो घटनाक्रमले पुष्टि गरेका छन् ।
राष्ट्र बैंकका कर्मचारी संगठनहरुले खुलेरै उक्त प्रवृत्तिको विरोध गर्दै आएका छन् । मुलुकभर सञ्चालनमा रहेका बैंक तथा वित्तीय संस्थाहरुलाई सुशासन र आर्थिक अनुशासनको पाठ सिकाउँदै हिँड्ने राष्ट्र बैंकका उच्च तहका कर्मचारीले आर्थिक अनुशासनविपरीत सरकारी ढुकुटीको दुरुपयोग गरिरहेको ती संगठनहरुको आरोप छ ।
उक्त आरोपलाई पुष्टि गर्ने आधार महालेखापरीक्षक कार्यालयको ६०औं प्रतिवेदन पनि हो । उक्त प्रतिवेदनमा राष्ट्र बैंकको सवारीसाधन सुविधा व्यवस्थापनसम्बन्धी कार्यविधि, २०७८ विपरीत गभर्नर, डेपुटी गभर्नर र कार्यकारी निर्देशकहरुले महँगोको गाडी चढ्ने गरेको औंल्याइएको छ ।
त्यसलाई रोक्न महालेखाले दिएको निर्देशन पालना गर्नुका सट्टा राष्ट्र बैंकका उच्च अधिकारीहरुले अझै सवारीसाधनको दुरुपयोग गर्दै आएको पाइएको छ । राष्ट्र बैंक स्रोतका अनुसार चालु आवमा पनि छ वटा विलासी गाडी खरिद गर्न बजेट विनियोजन गरिएको छ ।
राष्ट्र बैंकअन्तर्गतकै सम्पत्ति तथा सेवा व्यवस्थापन विभागले गत आवमा नै निर्देशकहरूका लागि गाडी किनिसकेको छ । राष्ट्र बैंकका उच्च अधिकारीहरुले बैंकको कर्मचारी सेवा विनियमावलीविपरीत सुविधा लिइरहेको देखिन्छ । जसबाट संस्थालाई करोडौंको नोक्सानी हुन पुगेको देखिन्छ । यी कार्यहरु रोक्नुको सट्टा गभर्नर अधिकारीले उल्टै संरक्षण दिइरहेको स्रोतको भनाइ छ ।
केही दिन अगाडिमात्र राष्ट्र बैंकमा कार्यरत कर्मचारीहरुको आधिकारिक संस्था नेपाल वित्तीय संस्था कर्मचारी संघले विज्ञप्ति जारी गरी राष्ट्र बैंकका उच्च कर्मचारीहरुले गरेको आर्थिक अनुशासनविपरीतका कार्यको भत्र्सना गरेको थियो ।
संघले राष्ट्र बैंक सञ्चालक समितिबाट निर्णय गराएर सम्पत्ति तथा सेवा व्यवस्थापन विभागबाट विलासी सवारीसाधनको दुरुपयोग गरेको भन्दै विरोध जनाएको थियो । सुपरीवेक्षण विभागमा कार्यरत निर्देशक रोशनकुमार सिग्देललगायतका निर्देशकहरुले नियमविपरीत सवारी दुरुपयोग गरेको संघको आरोप छ ।
कार्यालयलाई आवश्यक नभएको भएता पनि अवकाशप्राप्त गरी जाने निश्चित कर्मचारीहरुलाई लक्षित गरी करोडौंको सवारीसाधन खरिद गर्ने तयारीमा गभर्नर महाप्रसाद अधिकारी जुटिरहेका छन् । कार्यकारी निर्देशकहरु करोडौं पर्ने सवारीसाधन खरिद गर्ने र एक–डेढ वर्षमा अवकाश हुँदा अत्यन्तै न्यून रकम कबोल गरी खरिद गर्न सक्ने कार्यविधि बनाएर लुट मच्चाउने गतिविधि राष्ट्र बैंकभित्र देखिएको छ ।
निर्देशक सिग्देल गभर्नर अधिकारीनिकट भएकै कारण उनले कर्मचारी नियमावलीलाई लत्याउँदै शक्तिको दुरुपयोग गरेकोसमेत संस्थाले विज्ञप्तिमार्फत जनाएको छ ।राष्ट्र बैंकभित्र उच्च कर्मचारीहरुले सरकारी सवारीसाधनलगायत आर्थिक पाटोसँग जोडिएका विषयमा सूचनाको हक प्रयोग गरी प्रभाव संवाददाताले मागेको सूचनासमेत राष्ट्र बैंकले उपलब्ध नगराई आलटाल गरिरहेको छ ।
आर्थिक अनुशासनविपरीत कार्य गरिरहेका कार्यकारी निर्देशकको टोलीले आफूहरुले गरेको कुकृत्य सार्वजनिक हुने भएपछि सूचना अधिकारी नै परिवर्तन गराएका छन् । तीन दिनभित्र सूचना उपलब्ध गराउनुपर्ने नियम भएको भन्दै गभर्नरसमक्ष अनुरोध गरेपछि नारायणप्रसाद पोखरेललाई हटाएर डा. डिल्लीराम पोख्रेललाई सूचना अधिकारीको जिम्मेवारीमा ल्याएको छ ।
