काठमाडौं– प्रवक्तामा नियुक्ति भएपछि नेकपा (माओवादी केन्द्र) का उपाध्यक्ष एवं प्रवक्ता अग्निप्रसाद सापकोटाले समृद्धिका चार आधार बनाएर जनता माझ जाने बताएका छन् । उनले प्रवक्तामा नियुक्त भएपछि पहिलोपटक पार्टी कार्यालय पेरिसडाँडामा पत्रकारसँग भेटघाट गर्दै सो कुरा बताएका हुन् ।
समृद्धिका चार आधारमा कृषि क्षेत्रको आधुनिकीकरण, उद्योग धन्दा र औद्योगीकरण, राष्ट्रिय सुरक्षा र विज्ञान र प्रविधिमा विशेष जोड रहेको बताएका छन् ।
‘नेपाल अहिले जटिल भूराजनीतिमा रहेको छ । हामीमा चुनौती र अवसर दुवै छ । यसका लागि हामीले समृद्धिका चार आधार तय गरेका छौँ’, उनले भने, ‘त्यसका लागि पहिलो आधार कृषिमा आधुनिकीकरण आवश्यक छ । दोस्रो उद्योगधन्दा र औद्योगीकरणमा जोड दिनुपर्छ । तेस्रो राष्ट्रिय सुरक्षा रहेको छ । चौथोमा विज्ञान र प्रविधिको सदुपयोग रहेका छन् । यी चार आधारलाई अधिकतम प्रयोग गरी अब माओवादी समृद्धिका लागि अगाडि बढ्छ ।’
