- संसदीय दलको निर्वाचनयता शेखर र गगन एकै मञ्चमा देखिन छाडे
- नबोलाई आफू देउवाकहाँ नगएको शेखरको दाबी
- केन्द्रीय समितिमा कसैको ‘डिफेण्ड’ गर्नु नपर्ने तर्क
काठमाडौं– नेपाली कांग्रेसका नेता डा. शेखर कोइराला संस्थापनइतरका नेता हुन् । यद्यपि, उनी अहिले सभापति शेरबहादुर देउवातिर ढल्केका छन् । महामन्त्रीमा गगन थापा र डा. मिनेन्द्र रिजाललाई उम्मेदवार बनाएर देउवाविरुद्ध मैदानमा उत्रिएका शेखर वर्षदिन अघिसम्म देउवाको कटु आलोचक थिए । कोइराला संसदीय दलको निर्वाचनयता भने लगभग मौन छन् ।
गत मंसिरमा सम्पन्न निर्वाचनमा संस्थापनइतरका नेता कोइराला र महामन्त्री थापा दुवै जना निर्वाचित भए । डा. मिनेन्द्र महाधिवेशनमा पनि हारे, सांसदको टिकट पनि पाएनन् । महामन्त्रीमा हारेका प्रदीप पौडेलदेखि डा. प्रकाशरण महतसम्मलाई उहिल्यै केन्द्रीय सदस्य पदमा मनोनीत गरिसके पनि मिनेन्द्रलाई भने निकै ढिला गरी देउवाले मनोनीत गरे । त्यसैले मिनेन्द्र पनि अहिले देउवाकै दाहिने बनेका छन् । संस्थापन पक्षबाट देउवा संसदीय दलको नेतामा उम्मेदवार छानिँदा शेखर संस्थापनइतरबाट उम्मेदवार बन्ने दाउमा थिए । तर, गगनले आफ्नो अडान छाडेनन् । जसका कारण कोइराला चुपचाप ब्याक भए ।
त्यसयता शेखर र गगन एकै मञ्चमा देखिन छाडे । गगन देउवाविरुद्ध चर्किंदा शेखर भने मौन बस्न थाले । मन्त्री भागबण्डामा देउवाले शेखरलाई भाग दिँदा गगन भने रित्तो हुन थाले । यसैकारण गगन बेलाबेला क्रुद्ध सुनिए । हालै सम्पन्न केन्द्रीय समितिमा धेरैजसो नेता गगनमाथि खनिए । तर, देउवाविरुद्ध कोही बोलेनन् । अघिल्ला केन्द्रीय समितिहरुमा चर्को सुनिने शेखर पनि चुप नै रहे । यो सँगै शेखर देउवाको उत्तराधिकारी बन्ने दाउमा लागेको आरोप लाग्न थालेको छ ।
यसैबारे बिहीबार काठमाडौंमा आयोजित एक कार्यक्रममा शेखर पत्रकारहरुमाथि ‘सफ्ट’ रुपमा आक्रोशित सुनिए । ‘धेरै समय नेपाली कांग्रेसभित्रको द्वन्द्व र ग्रुपभित्रको द्वन्द्व तपाईंहरु आफैं बनाइरहनुभएको छ, सोचिरहनुभएको छ, आफैं लेखिरहनुभएको छ । लाग्छ कि अधिवेशन आइसक्यो । महाधिवेशन आउने अढाइ वर्ष बाँकी छ । हरेक कुरा मार्क गरिराख्नुस्,’ आफूमाथि टिप्पणी बढेकोतर्फ संकेत गर्दै शेखरले भने ।
देउवासँग भेट्न पनि नपाउने ?
देउवासँग निकट हुन लागेको र भनाइभन्दा गराइमा फरक देखिन थालेको आरोप शेखरमाथि लाग्न थालेको धेरै भइसक्यो । यसबारे शेखरले आपत्ति नै जनाए ।‘पहिलेपहिले देउवासँग भेट गर्दैनथे, आजकल गर्छन् भन्ने कुरा पनि आएको छ । पहिले उहाँले बोलाउँदै बोलाउनुहुन्थेन त के भेट गर्ने ?,’ उनले प्रश्न गरे, ‘बोलाएपछि त भेट्न जानुप¥यो, उहाँ सभापति हो ।’
सभापतिले नबोलाई आफ्नो भेट्न जाने बानी नभएकोसमेत शेखरले तर्क गरे । ‘शेखर त मिल्यो सभापतिसँग भनेर लेखिराखेका छन्, केमा मिल्यो मैले बुझ्न सकेको छैन । सभापतिले बोलाउनुभएको बेला भेट्न गएको हुँ,’ उनले भने ।सभापतिले बोलाएपछि जो पनि भेट्न जाने उनको भनाइ रह्यो । ‘सभापति तपाईंहरुको हो कि हैन ? बोलाएपछि जानुप¥यो । जानुभएन भने तपाईंहरु नेपाली कांग्रेसको शुभेच्छुक संस्था हैन भनेर हामीले बुझ्नुप¥यो,’ प्रेस युनियनका नेताहरुसँग शेखरले प्रश्न गरे, ‘मेरो बानी पनि छैन कसैले नबोलाई म आउँदै छु भनेर जाने गरेको छैन, जाने काम पनि छैन ।’
पार्टी सभापतिसँग इस्यु र एजेण्डामा मिलेको उल्लेख गर्दै उनले आफ्नो परिवारले गाली नगर भन्ने संस्कार सिकाएको प्रसंग जोडे । ‘मिल्ने भनेको के मा मिल्ने ? इस्युमा मिल्ने हो । एजेण्डामा मिल्ने हो,’ शेखरले भने, ‘मलाई मेरो परिवारले यही संस्कार दिएको छ । गाली नगर, बरू गाली खाऊ, पचाऊ, चित्त नबुझेका कुरा छन् भने नबोल बरु भन्नुभएको छ ।’ कांग्रेसमा नोना कोइराला परिचित नेता हुन् । उनै कोइरालाको लिगेसी देखाउँदै शेखरले मिडियाप्रति रोष पोखेका हुन् ।
साउन २ बाट साउन १० गतेसम्म चलेको केन्द्रीय समितिमा महामन्त्री गगनमाथि धेरैले असन्तुष्टि पोखेका थिए । उनको पक्षको कोही नउभिएको गुनासो शेखरसम्म पनि पुग्यो । कतिले गगनको प्रतिरक्षा नगरेको भन्दै शेखरलाई प्रश्नसमेत गरे । आफू कसैलाई प्रतिरक्ष गर्न केन्द्रीय समितिमा नगएको उनको तर्क रह्यो । ‘तपाईंले महामन्त्रीले मलाई भन्नुभयो महामन्त्रीको ‘डिफेण्ड’ गर्नुभएन भनेर । केही केन्द्रीय समितिका साथीहरुले केही सांसदहरुले,’ शेखरले भने, ‘केन्द्रीय समितिमा म कसैलाई डिफेण्ड गर्न आएको हैन । रामचन्द्र पौडेल र सुशील कोइरालाको कुरा पो मानिनँ मैले । सुशील कोइरालाले भ्रातृ संगठन विघटन गरेका थिए । मैले सहन्न भनेँ।’
‘मैले उठाएको बुँदा पत्रकारले पढेनन्’
कांग्रेस नेता डा. शेखर कोइरालाले केन्द्रीय समिति विवेक प्रस्तुत गर्ने थलो भएको तर्क पेस गरे । ‘सेन्ट्रल कमिटीमा कुरा चल्यो । ग्रुपमा भएर पनि यसरी बोल्ने । सेन्ट्रल कमिटीमा त बुद्धि विवेक प्रयोग गर्नुप¥यो,’ बिहीबार आयोजित एक कार्यक्रममा उनले भने, ‘ग्रुपले जे भन्छ त्यही भने एक जनाले बोले भइगयो नि । अरुले किन बोल्नुप¥यो । केन्द्रीय समितिमा हामी विवेक पु¥याएर जाने हो ।’
बरु शेखरले आफ्नो विषयमा मिडियाले राम्रो कभर नगरेको दाबी गरे । ‘मेरो विनम्र अनुरोध । मैले १५ बुँदा केन्द्रीय कमिटीमा राखेको छु । कमेन्टहरु पढ्दा राम्ररी लेखेजस्तो लागेन । मैले दिएको बुँदा एकपटक पढेर कमेन्ट राम्ररी गरिदिनुस् । क्रिटिकल कमेन्ट गर्नुस्,’ उनले भने । लाइभमा केहीले भोलिको नेता हुन्छु कि भन्ठानेर आरोपप्रत्यारोप गरेको तर आफूलाई भने असजिलो भएको शेखरको भनाइ थियो ।
‘यसपटकको केन्द्रीय समितिको बैठक आरोपप्रत्यारोपमै सकियो । लाइभमा भोलिको नेता हुन्छु भन्ने लाग्यो होला । म जस्तो मान्छेलाई असजिलो भयो,’ उनले भने ।
