- १५औं महाधिवेशन आउन अझै दुई वर्ष बाँकी नै रहेको बेला केन्द्रीय समितिका सदस्यहरु काठमाडौं जुटेको बेला नेताहरु भने आफ्नो पक्षमा माहोल बनाउन थालेका छन्
- देउवा झनै शक्तिशाली देखिए पनि उनको उत्तराधिकारी भने कोही नभएको संस्थापनभित्रै चर्चा छ
- यसैले पनि शशांक र निधिले आफ्नो पक्षमा माहोल बनाउन चियापान र रात्रिभोज आयोजना गरेको नेताहरु बताउँछन्
काठमाडौं– नेपाली कांग्रेसको पछिल्लो केन्द्रीय समिति बैठक विभिन्न निर्णय गर्दै बुधबार सम्पन्न भयो । केन्द्रीय समितिकै छेको पारेर केही नेताले भने चियापानदेखि रात्रिभोज गर्न भ्याएका छन् । मंगलबार कांग्रेस केन्द्रीय सदस्य डा. शशांक कोइरालाले लैनचौरमा चियापान आयोजना गरेका थिए । चियापान ‘कांग्रेस एक छ’ भनेर देखाउन आयोजना गरिएको शशांकले बताए ।
त्यसको दुई दिनपछि बिहीबार साँझ कांग्रेस नेता विमलेन्द्र निधिले मैत्रीपूर्ण रात्रिभोज आयोजना गरे । नयाँ बानेश्वरको आनन्दभूमि एभेन्ट्समा साँझ छ केन्द्रीय कार्यसमितिका सदस्यहरुलाई निम्तो दिइएको थियो ।कार्यक्रममा नेताहरु साढे ६ बजेबाटै आउन सुरु गरे ।
रात्रिभोजमा सीमित सञ्चारकर्मीलाई पनि निम्तो गरिएको थियो । पार्टी सभापति शेरबहादुर देउवा साँझ ७ बजे आइपुग्नसाथ रात्रिभोज औपचारिक रुपमा सुरु भयो । देउवा आइपुग्नसाथ निधिले औपचारिक कार्यक्रमका लागि सबैलाई मञ्चतिर डाके । एकैछिनमा निधिले केन्द्रीय कार्यसमितिको सम्मानमा मैत्रीपूर्ण रात्रिभोजको आयोजना गरेको जानकारी दिँदै स्वागत गरे । त्यसपछि देउवाले निधिलाई कार्यक्रम आयोजना गरिएकोमा धन्यवाद दिए ।
रत्रिभोजमा पार्टी सभापति शेरबहादुर देउवा, उपसभापतिहरु पूर्णबहादुर खड्का, धनराज गुरुङ, पदाधिकारी तथा केन्द्रीय सदस्य, पार्टीबाट सरकारमा सहभागी मन्त्री, सांसदलगायतको उपस्थिति थियो । त्यस्तै डा. शेखर कोइराला, डा. शशांक कोइराला, प्रकाशमान सिंह, गोपालमान श्रेष्ठ, विजयकुमार गच्छदारलगायत नेताहरुको पनि उपस्थिति रहेको थियो ।
माहोल बनाउँदै नेताहरु
नेपाली कांग्रेसको १४औं महाधिवेशन पूरा भएको २० महिना पुगेको छ । यही बीचमा कांग्रेसमा सभापति परिवर्तनको आवाज उठ्न थालेको छ । १५औं महाधिवेशन आउन अझै दुई वर्ष बाँकी नै रहेको बेला केन्द्रीय समितिका सदस्यहरु काठमाडौं जुटेको बेला नेताहरु भने आफ्नो पक्षमा माहोल बनाउन थालेका छन् ।
चियापान, रात्रिभोजका सन्देश यही रहेको नेताहरु बताउँछन् । कांग्रेसमा देउवाको उत्तराधिकारी खोज्ने क्रम सुरु भइसकेको बेला शशांक र विमलेन्द्रको पछिल्लो कार्यक्रमलाई यही कोणबाट हेरिएको हो । देउवा अहिले संस्थापन पक्षका नेता हुन् । केन्द्रीय समितिका ८२ प्रतिशत सदस्यहरु देउवाको पकडमा छन् । अझ अहिले संस्थापनइतरका नेता डा. शशांक कोइरालासमेत उनीविरुद्ध बोलेका छैनन् ।
पछिल्लो केन्द्रीय समितिबाट देउवा झनै शक्तिशाली देखिएका छन् । यस्तो बलियो देउवाका उत्तराधिकारी भने कोही नभएको संस्थापनभित्रै चर्चा छ । यसैले पनि शशांक र निधिले आफ्नो पक्षमा माहोल बनाउन चियापान र रात्रिभोज आयोजना गरेको कार्यक्रममा सहभागी नेताहरु बताउँछन् ।
निधि १४औं महाधिवेशनमा सभापतिका उम्मेदवार थिए । उनकै कारण देउवाले पहिलो चरणमा निर्वाचन जित्न सकेनन् । मतदान दोस्रो चरणमा धकेलियो । देउवाले निधिको साथ मागे । निधिले देउवालाई सघाए । प्रकाशमानसहितको सहयोगमा देउवा ६० प्रतिशत मतसहित दोस्रो कार्यकालका लागि सभापतिमा चुनिए ।
यस्तैगरी महाविधेशनमा बिपी पुत्र शशांककोसमेत साथ थियो देउवालाई । १३औं महाधिवेशनमा पौडेल गुटबाट महामन्त्री बनेका शशांकले देउवाकै कारण अपजसको भारी बोके । पार्टी सबैभन्दा कमजोर भएको बेला पटकपटक सभापतिबाट देउवाको राजीनामा माग्दा शशांक मौन बसेका थिए । उनै शशांक १४औं महाधिवेशनमा सभापतिका दाबेदार थिए । तर, देउवाले थुम्थुमाएपछि उनले केन्द्रीय सदस्यमै चित्त बुझाए ।
शशांक १५औं महाधिवेशनमा जसरी पनि सभापतिको उम्मेदवार बन्ने दाउमा छन् ।यही मेसोमा डा. शेखरसमेत देउवाको नजिक बन्ने कोसिसमा छन् । १५औं महाधिवेशनमा जसरी पनि सभापति बन्ने दाउमा रहेका शेखर आफ्नै गुटका महामन्त्री गगन थापासँग टाढिइसकेका छन् । थापा १५औं महाधिवेशनमा जसरी पनि सभापतिको उम्मेदवार बन्ने दाउमा लागेका छन् ।
केन्द्रीय समितिमा जंगिएका देउवा कार्यक्रममा भने ठट्टा
बुधबार केन्द्रीय समितिको निर्णय सुनाउने क्रममा कड्किएका थिए देउवा । पार्टीमा थप संशोधनका विषय उठाउँदै थिए केन्द्रीय सदस्यहरुले । त्यहीबेला परराष्ट्रमन्त्रीसमेत रहेका एनपी साउदको नाम लिँदै कड्किए देउवा । ‘मलाई भन न के हो त्यो । ल्याऊ यहाँ । मलाई ल्याऊ । शेरबहादुर भन्ने मान्छे थाहा छ कि छैन । शेरबहादुर भन्ने मान्छे चिन्या छ ? ल्याऊ न भन्या प्रस्ताव,’ अर्थमन्त्री प्रकाशशरण महतसँग फाइल माग्दै कड्किएका थिए देउवा ।
उनै देउवाले रात्रिभोजमा ठट्याउली गर्न भ्याए । बिहीबार डिनर सुरु भइसकेको थिएन । देउवालाई मञ्चमा बोल्न अनुरोध गरे निधिले । यही मौका छोपेर व्यंग्य कस्न भ्याए देउवाले, ‘खाना खाएपछि धन्यवाद दिउँला भनेको, खान कस्तो छ थाहै छैन ।’ यति भन्दै देउवाले निधिलाई धन्यवाद दिए ।
मंगलबारमात्र डा. शशांकले लैनचौरमा आयोजना गरेको चियापानमा देउवाले चियामात्र खुवाएर अरु केही नखुवाएको भन्दै व्यंग्य गरेका थिए । ‘चियामात्र खुवाउनुभयो, अरु केही खुवाउनुभएन, त्यसका लागि शशांकजीलाई धन्यवाद,’ देउवाले व्यंग्य कसेका थिए ।
