- खर्च विवरण नबुझाउनेमा सरकारका मन्त्रीदेखि कांग्रेसका महामन्त्री गगन थापासम्म रहेका छन्
- लोसपा अध्यक्ष महन्थ ठाकुर र राप्रपाका वरिष्ठ उपाध्यक्ष रवीन्द्र मिश्र पनि जरिवानामा
- विवरण नबुझाउनेमा प्रतिनिधिसभातर्फ एक हजार ३७ र प्रदेशसभातर्फ एक हजार ३९८ उम्मेदवार
काठमाडौं– पारदर्शिताको गफ दिने नेताहरुले नै चुनावी खर्च विवरण सार्वजनिक गर्न आनाकानी गरेका छन् । चुनावी खर्चको विवरण नबुझाउने ती नेताहरुलाई निर्वाचन आयोगले जरिवाना तोकेको छ । मंगलबार चुनावी खर्च विवरण नबुझाउनेहरुको नाम सार्वजनिक गर्दै आयोगले जरिवाना तोकेको हो ।
विवरण नबुझाउने प्रतिनिधिसभा र प्रदेशसभाका सांसदहरुलाई ३५ दिनभित्र १५÷१५ हजार रुपैयाँ जरिवाना बुझाउन आयोगले निर्देशन दिएको छ । यसरी विवरण नबुझाउनेमा प्रतिनिधिसभातर्फ एक हजार ३७ र प्रदेशसभातर्फ एक हजार ३९८ उम्मेदवार छन् । उनीहरुले पटक–पटक ताकेता गर्दा पनि खर्च विवरण सार्वजनिक नगरेको आयोगले जनाएको छ ।
खर्च विवरण नबुझाउने को को ?
यसरी खर्च नबुझाउनेमा सरकारका मन्त्रीदेखि कांग्रेसका महामन्त्री गगन थापासम्म रहेका छन् । आयोगका अनुसार परराष्ट्रमन्त्री एनपी साउद, खानेपानीमन्त्री महिन्द्र राय यादव, शिक्षामन्त्री अशोक राई, र श्रममन्त्री शरतसिंह भण्डारी रहेका छन् ।
तोकेको समयभित्र प्रदेश वा जिल्ला निर्वाचन कार्यालयमा निर्वाचन खर्चको विवरण पेस गर्ने प्रतिनिधिसभाका उम्मेदवारलाई निर्वाचन (कसूर तथा सजाय)ऐन, २०७४ को दफा ३१ को उपदफा (२) बमोजिम जरिवाना गरिएको आयोगका प्रवक्ता शालिग्राम शर्मा पौडेलले विज्ञप्ति जारी गरेर जानकारी दिएका छन् ।
निर्वाचन खर्च विवरण सार्वजनिक नगर्नेमा नेपाली कांग्रेसका महामन्त्री, सहमहामन्त्री र प्रमुख सचेतकसम्म रहेका छन् । कांग्रेसका महामन्त्री थापा, सहमहामन्त्रीद्वय उमाकान्त चौधरी र महालक्ष्मी उपाध्याय (डिना) र कांग्रेसका प्रमुख सचेतक रमेश लेखक पनि छन् । नेता विजय गच्छदार, नेपालका एकमात्रै डलर अर्बपति विनोद चौधरी, केन्द्रीय सदस्य शंकर भण्डारीले पनि खर्च विवरण बुझाएका छैनन् ।
नयाँ दल राष्ट्रिय स्वतन्त्र पार्टी (रास्वपा)का चार सांसद पनि निर्वाचन आयोगको कारबाहीमा परेका छन् । जरिवाना पर्नेमा काठमाडौंबाट प्रत्यक्षतर्फ रास्वपाबाट जितेका चार सांसद छन् । काठमाडौं–६ बाट विजयी भएर छोटो समय शिक्षामन्त्री बनेका शिशिर खनाल, रास्वपा संसदीय दलका उपनेतासमेत रहेका विराजभक्त श्रेष्ठ, काठमाडौं–२ बाट निर्वाचित भएकी सोविता गौतम पनि कारबाहीमा परेकी छन् । त्यस्तै काठमाडौं–७ बाट निर्वाचित गणेश पराजुलीले पनि १५ हजार तिर्नुपर्ने सूचीमा परेका छन् ।
उनीहरुसहित लोकतान्त्रिक समाजवादी पार्टीका अध्यक्ष महन्थ ठाकुर, पूर्वसभामुख ओनसरी घर्ती, माओवादी केन्द्रकै उपाध्यक्ष पूर्वमन्त्री पम्फा भुसाल, उपमहासचिव तथा पूर्वमन्त्री गिरीराजमणि पोखरेलले पनि जरीवानामा परेका छन् । राप्रपाका रवीन्द्र मिश्र, एमालेका किरण पौडेल, काठमाडौं–४ बाट चुनाव लडेका एमालेका डा. राजन भट्टराई पनि खर्च विवरण नबुझाउनेको सूचीमा परेका छन् ।
-1745656903.jpeg)