काठमाडौं– नेपाली कांग्रेसका सभापति शेरबहादुर देउवाविरुद्ध दुई महामन्त्री एकै ठाउँमा उभिएका छन् । जारी केन्द्रीय समितिमा पार्टीका अधिकांश पदाधिकारी र केन्द्रीय सदस्यहरुले देउवाको प्रशंसा र दुई महामन्त्रीको आलोचना गरेपछि गगन थापा र विश्वप्रकाश शर्मा एकै ठाउँमा उभिएका हुन् ।
महामन्त्री गगन थापाले पार्टीले कांग्रेसमा ‘एक्जिट पोलिसी’ अति आवश्यक भइसकेको उल्लेख गर्दै देउवालाई पार्टीबाट बिदा लिनसमेत आग्रह गरे । ‘०८२ सालमा जसरी पनि महाधिवेशन गर्नुपर्छ । पार्टीमा नेतृत्वमा परिवर्तन किन उठाएको भन्ने कुरा उठ्यो ।
नेतृत्व परिवर्तन असहज भएकाले पार्टीहरु संकटमा छन् । एक्जिट पोलेसी छैन,’ महामन्त्री थापाले भने, ‘त्यसकारण हाम्रो पार्टी जमेको पोखरीजस्तो बनेको छ । पुरानो पार्टीमा ३५ वर्षदेखि एउटै नेतृत्व हुँदा संकटमा परेका छन् । यसमा मेरो पहल रहन्छ ।’आफू संसदीय दलको नेता परिवर्तन गर्ने मुद्दामा लागिरहने थापाले प्रस्ट पारे । ‘मैलै संसदीय दलको नेता परिवर्तनका लागि प्रयास गरें । तर सकिनँ । यो प्रयास गर्ने कि नगर्ने ? संसदीय दलको नेता परिवर्तन गर्ने कुरा विधानले दिन्छ । मलाई थाहा छ गाह्रो छ ।
सांसदको मत पाउने गाह्रो छ,’ थापाले भने, ‘गाह्रो काम छाड्न हुँदैन । एक–दुई महिनामा सभापतिले ल यार म किन हुने, कोही हुने हो, आऊ भन्नुभयो भने झन् राम्रो हुन्छ । म नै हुनुपर्छ भन्ने होइन । साथीहरु किन आत्तिनुभएको ? मैले पार्टी फेर्ने कुरा गरेको हो र ? दलको नेतामात्रै फेर्न खोजेको हो । म बदल्न लागिरहन्छु, सके बदल्छु, नसके चुप लागेर बस्छु ।’
साथीहरु किन आत्तिनुभएको ? मैले पार्टी फेर्ने कुरा गरेको हो र ? दलको नेतामात्रै फेर्न खोजेको हो । म बदल्न लागिरहन्छु, सके बदल्छु, नसके चुप लागेर बस्छु ।
गगन थापा
महामन्त्री
महामन्त्री थापाले नेपालीलाई भुटानी शरणार्थी बनाएर अमेरिका पठाउने प्रकरणमा पक्राउ परेका कांग्रेस केन्द्रीय सदस्य बालकृष्ण खाणलाई निलम्बन गर्नसमेत माग गरे । ‘भ्रष्टाचारको कुनै जात लिंग हुँदैन । नेपाली कांग्रेसले सरकारले अघि बढाएका कुरामा साथ दिनुपर्छ । कांग्रेस भएका कारण कुनै पनि व्यक्तिले छुट पाउन हुँदैन र कसैले अतिरिक्त भार बोक्नुहुँदैन ।
यदि कोही नेता अभियुक्त हुन्छ भने उसले पार्टी जिम्मेवारीबाट अलग भएको घोषणा गर्नुपर्छ,’ गगनले भने, ‘होइन भने फौजदारी अभियोग लागेकालाई फैसला नहुञ्जेल निलम्बन गर्नुपर्छ । निलम्बन भनेको कारबाही होइन ।’ पार्टीमा अधिकांश नेताहरुले खाणलाई जोगाउने पक्षमा मत राखेका थिए ।
अर्का महामन्त्री शर्मा पार्टीमा ‘एक्जिट पोलिसी’ हुनुपर्ने उल्लेख गर्दै गगनको पक्षमा उभिए । आफूलाई आएको आलोचना सहर्ष स्वीकार गर्दै पार्टीमा सुधारको खाँचो रहेको उनको तर्क रह्यो । ‘महामन्त्रीका कमजोरीका विषयमा उठेका विषय आत्मसात् गर्छु,’ शर्माले भने ।
राजनीतिमा एक्जिट पोलिसी आवश्य रहेको उल्लेख गर्दै शर्माले उमेरभन्दा एजेण्डाको विषयमा ध्यान दिनुपर्ने धारणा राखे । ‘राजनीतिको रुपान्तरणका लागि एक्जिट पोलिसी आवश्यक देखियो । त्यो भएको भए सभापतिजी धेरै वर्ष रिटायर्ड हुनुहुन्थ्यो,’ शर्माले भने, ‘कांग्रेसमा एज होइन एजेण्डाको कुरा प्रधान हो । तर, एक्जिट पोलेसी आवश्यक छ । त्यो भयो भने छाड्नुस् सभापतिजी भनिरहन पर्दैन ।’
कांग्रेसमा ‘एज’ होइन ‘एजेण्डा’को कुरा प्रधान हो । तर, ‘एक्जिट पोलेसी’ आवश्यक छ । त्यो भयो भने छाड्नुस् सभापतिजी भनिरहन परेन ।
विश्वप्रकाश शर्मा
महामन्त्री
शर्माले खाण जोगाउन कांग्रेस लागेको जनताले देखेकोले अनुसन्धानलाई सघाउ पुर्याउनुपर्ने धारणा राखे । ‘भ्रष्टाचारविरुद्धको फाइल खुलेका छन् । व्यक्ति को परे को पर्दै छन् भन्ने कुरा फरक हो । फाइल खुल्ने तागतका पछि कांग्रेस छ । अख्तियार कसले गठन गर्यो । भ्रष्टाचारका फाइल खुल्नुको तागत कांग्रेस हो भन्ने कुराको जस किन नलिने ?,’ शर्माले भने, ‘हामीले बनाएको कानुनअनुसार हाम्रै नेता पर्नुभयो भने हामीले कानुन कमजोर बनाएनौं भन्ने हो । कसले निलम्बन गर्यो/रेन भन्ने कुरा ठूलो होइन । हामी जोगाउन लाग्यो वा छानबिनमा सहयोग पुर्यायौं भन्ने महत्वपूर्ण हो ।’
साउन २ बाट कांग्रेस केन्द्रीय कार्यालयमा जारी बैठक भोलि बुधबार ४ बजे बस्ने गरी स्थगित भएको छ । बैठकमा अब सभापति देउवाको जवाफमात्र बाँकी छ । त्यसैगरी केन्द्रीय समितिले सांगठनिक कार्यतालिका पारित गर्ने र नीति अधिवेशनको मितिबारे निर्णय गर्नेछ ।
शेखरलाई खड्का र विश्वप्रकाशको जवाफ
बैठकमा संस्थापनइतरका नेता डा. शेखर कोइरालालाई कार्यवाहक प्रधानमन्त्रीसमेत रहेका उपसभापति पूर्णबहादुर खड्काले समाजवादी मोर्चाबारे जानकारी दिएका छन् । खड्काले मोर्चा कांग्रेसलाई जानकारी दिएर बनेको दाबी गरे ।
‘अहिले समाजवादी मोर्चाको बारेमा कुरा उठेको छ । जुन दिन गठबन्धन भत्किएको पुनःस्थापित गर्ने बैठक बालुवाटारमा भयो ।
चार नेताको बीचमा जे खालका सहमति भए । त्यही सन्दर्भमा तीन दलको मोर्चा बनाउँछौं भनेर तीन दलबीचमा समाजवादी मोर्चा बनाउने कुरा भएको हो । पछि विप्लवजी थपिनुभएको हो,’ खड्काले भने । बुधबारको केन्द्रीय समितिमा शेखरले माओवादी केन्द्रसहित जनता समाजवादी पार्टी, एकीकृत समाजवादी पार्टी मिलेर बनेको मोर्चाबारे प्रश्न गरेका थिए ।
यसैगरी महामन्त्री शर्माले आफूले अन्य दलबारे नबोल्न भन्दै डा.कोइरालालाई चिट नदिएको प्रस्ट पारेका छन् । सोमबारको केन्द्रीय समितिमा महामन्त्री शर्माले यस्तो बताएका हुन् । ‘डा. शेखर कोइरालाले अन्य दलको बैठकमा नबोल्न भन्दै चिट दिएको भन्नुभयो । त्यो हैन । सबैलाई दिइएको चिट यही (१० बुँदे प्रस्ताव) हो । बोल्नलाई निषेध गरिएको छैन,’ शर्माले भने ।
आइतबारमात्र शेखरले महामन्त्रीहरुले आफूलाई अन्य पार्टीबारे नबोल्न भन्दै चिट दिएको दाबी गरेका थिए । ‘बैठकको भोलिपल्ट महामन्त्रीले चिट दिनुभयो । अन्य पार्टीको बारेमा पटक्कै नबोल्नु भनेर । कस्तो केन्द्रीय समितिको बैठक हुने हो त्यो मैले बुझ्न सकेको छैन,’ कोइरालाले असन्तुष्टि पोखेका थिए ।
