काठमाडौं– नेपाली कांग्रेसको केन्द्रीय समिति बैठक जारी छ । मंगलबारबाट ललितपुरको सानेपास्थित पार्टी केन्द्रीय कार्यालयमा जारी बैठकमा केन्द्रीय सदस्यहरुले धारणा राख्ने क्रम चलिरहेको छ । बुधबार ४६ जना केन्द्रीय सदस्यले महामन्त्री गगन थापाले प्रस्तुत गरेको पार्टीको कार्ययोजनामाथि धारणा राखेका थिए । बिहीबार ३५ जनाले उक्त कार्ययोजना र पार्टीका कार्यक्रममाथि धारणा राखे ।
खाणलाई निलम्बन गर्न माग
बिहीबारको केन्द्रीय समितिमा नक्कली भुटानी शरणार्थी प्रकरणमा थुनामा रहेका बालकृष्ण खाणलाई केन्द्रीय सदस्यबाट निलम्बन गर्नुपर्ने माग उठेको छ । कांग्रेस केन्द्रीय सदस्य अजयबाबु शिवाकोटीले खाणलाई पार्टीको केन्द्रीय सदस्यबाट निलम्बन गर्नुपर्ने माग राखेका हुन् ।
‘यतिखेर कांग्रेस प्रचण्ड नेतृत्वको सरकारको मुख्य हिस्सेदार हो । यही सरकारको पालामा हाम्रा वरिष्ठ केन्द्रीय सदस्य बालकृष्ण खाणलाई अलग–अलग आरोपमा पुर्पक्षका लागि थुनामा पठाइएको छ,’ उनले भने, ‘सभापतिज्यू, यो प्रकरणमा हाम्रो द्विविधा अचम्मकै छ । खाणप्रति अन्याय भयो भन्ने हो भने कांग्रेस सरकारबाट हट्नुप¥यो, होइन भने पार्टीबाट निलम्बन गर्नुप¥यो ।’
नेपालीलाई भुटानी शरणार्थी बनाएर अमेरिका पठाउने कार्यमा संलग्न रहेको आरोपमा खाण वैशाख २७ गते पक्राउ परेका थिए । काठमाडौं जिल्ला अदालतको आदेशमा खाण असार १ देखि पुर्पक्षका लागि थुनामा छन् । सोही प्रकरणमा पक्राउ परेका टोपबहादुर रायमाझीलाई एमालेले सचिव पदबाट निलम्बन गरिसकेको छ ।
केन्द्रीय सदस्य शिवाकोटीले सभापति देउवासमक्ष यस विषयमा केन्द्रीय समिति प्रस्ट हुनुपर्ने बताएका छन् । ‘यसमा कि थुनामा हुने दोषी हुनुप¥यो कि सरकारमा रहेका हाम्रै मन्त्री पूर्वाग्रही भएको हुनुप¥यो । सभापतिज्यू, पार्टीले प्रस्ट भन्नुप¥यो,’ उनले भने, ‘यो बैठकबाट पनि भ्रमपूर्ण सन्देश प्रसार हुनुभएन । सरकार र साथीमध्ये के रोज्ने हो, सभापतिज्यू यो बैठकले टुंगो लगाउनुपर्छ ।’
हतार नगर्न गगनलाई सुझाव
यसपटकको केन्द्रीय समितिमा धेरैले महामन्त्री थापा लक्षित धारणा राखिरहेका छन् । बिहीबार पनि केही केन्द्रीय सदस्यले गगनमाथि सुझाव र आरोप बर्साए ।केन्द्रीय सदस्यसमेत रहेका गण्डकीका मुख्यमन्त्री सुरेन्द्रराज पाण्डेले महामन्त्री थापाले अतिरञ्जित कुरा गरेको आरोप लगाए ।
पछिल्ला दिनहरुमा थापाले संसदीय दलको नेता परिवर्तन गर्नुपर्ने धारणा राख्दै आएका छन् । उक्त बोलीप्रति लक्षित गर्दै पाण्डेले देउवा डुबे गगन पनि डुब्ने चेतावनी दिए । ‘पार्टीको नेगेटिभ भ्रम फैलिने गरी अतिरञ्जित नगरौं । शेरबहादुर देउवा डुबेपछि गगन थापा पनि डुब्नुहुन्छ, सुरेन्द्र पाण्डे पनि डुब्छ । सबै एउटै डुंगामा छौं । यो डुंगालाई पार लाउन कठिन छ,’ पाण्डेले भने ।
अर्का केन्द्रीय सदस्य चन्द्रबहादुर केसीले भने थापालाई हतार नगर्न सुझाव दिए । ‘एउटा व्यक्ति विशेषले संसदीय दलको नेता चाहियो, पार्टी सभापति चाहियो भन्दैमा समय र परिस्थितिको ख्यालै नगरी बेमौसमी बाजा बजाएर जन्ती पाइन्न कि ! त्यतातिर ध्यान जाओस्,’ केसीले भने, ‘भन्ने एउटा, गर्ने एउटा, लेख्ने एउटा । गगनजी, हतार गर्न पर्दैन, यु वेट । एभ्री डे इज सन्डे ।’
महामन्त्रीद्वमाथि केन्द्रीय सदस्यहरु खनिएपछि प्रकाश रसाइली ‘स्नेही’ले भने सहानुभूति देखाए । महामन्त्रीहरुलाई विचरा बनाइएको उनको टिप्पणी थियो । एक वर्षअघि गायिका विष्णु माझीको स्वरमा रहेको चर्चित गीत ‘चरी जेलै’माको उदाहरण दिँदै रसाइलीले महामन्त्रीहरुको केही अधिकार नभएको तर्क गरेका हुन् । ‘महामन्त्रीहरु विचरा बबुरा चरी जेलैमा, सबै अधिकार सभापतिलाई हुने रहेछ,’ उनले भने, ‘अनि केही कुरा हुँदैन, त्यही भएर सबै कुरा बाहिर आउँछ । सभापतिले पनि महामन्त्रीलाई सघाउनुपर्छ ।’
उनले ११ महिनासम्म बैठक राख्न नसक्ने पार्टीले जनताका मुद्दा सम्बोधन गर्न नसक्ने बताए । आफूहरु टुलुटुलु हेरेर बस्न बाध्य भएको उनको भनाइ थियो । ‘११ महिनासम्म बैठक राख्न नसक्ने पार्टीले कसरी जनअपेक्षा सम्बोधन गर्छ ?,’ उनको प्रश्न थियो, ‘हामी केन्द्रीय सदस्य कहिले बैठक बस्ला भनेर टुलुटुलु हेरेर कुर्न बाध्य भएका छौं ।’
