काठमाडौं – पछिल्ला राजनीतिक गतिविधिमा नेपाली कांग्रेसका सभापति शेरबहादुर देउवा देखिन छाडेका छन् । प्रमुख प्रतिपक्षी दल नेकपा एमालेले प्रधानमन्त्रीबाट पुष्पकमल दाहालको राजीनामा माग्दै गर्दा राजनीतिक सरगर्मी बढेको छ । सदन अवरुद्ध छ भने कोशीको सरकार निर्माण प्रक्रिया पनि उस्तै पेचिलो बनेको छ ।
तर, यस्तो बेला संसद्मा देउवाको उपस्थिति देखिन्न । देउवाको साटो कांग्रेसमा दुई महामन्त्रीले पार्टीको भनाइ राख्न थालेका छन् । पछिल्लोपटक प्रधानमन्त्री दाहालले राखेको प्रितम सिंहबारेको भनाइप्रति महामन्त्री शर्माले आपत्ति जनाइसकेका छन् । यद्यपि, देउवाको भनाइ सार्वजनिक भएको छैन ।
- बिहीबार जिल्ला सभापतिहरुको बैठकमा पार्टी कार्यालय सानेपामा सभापतिको कुर्सी खाली
- जिल्ला सभापतिहरुको बैठकमा देउवा नगएकोमा डा. शेखर कोइरालालेसमेत उठाए प्रश्न
- जिल्ला सभापतिहरुको बैठकमा संस्थापन पक्षबाट सहमहामन्त्री भीष्मराज आङ्देम्बे देउवाका दूतका रुपमा उपस्थित
यतिमात्रै होइन, कांग्रेसको महŒवपूर्ण मानिएको जिल्ला सभापतिहरुको बैठकमा पनि देउवा देखिएनन् । बिहीबार जिल्ला सभापतिहरुको बैठकमा पार्टी कार्यालय सानेपामा सभापतिको कुर्सी खाली थियो । बिहीबार र शुक्रबार दुई दिन चलेको बैठकमा देउवा नदेखिएपछि सभापतिहरुले देउवाको खोजी गरेका थिए ।
देउवा नहुँदा छाएन रौनकता
पार्टी महामन्त्रीद्वय गगन थापा र विश्वप्रकाश शर्माले डाकेको बैठकको खासै आकर्षण नभएको एक जिल्ला सभापतिले दाबी गरे । ‘एजेण्डा पनि खासै केही थिएनन्, म पहिलो दिन ढिला पुगे, दोस्रो दिन गइनँ,’ ती सभापतिले भने । एजेण्डा नभएर होला, ७७ मध्ये आधा जिल्लाका सभापतिहरु पनि सानेपामा भेला भएनन् । सभापतिहरुको संख्या न्युन देखिएपछि महामन्त्री थापा निराश मुद्रामा देखिएका थिए ।
पहिलो दिन ३० जिल्लाका सभापति पनि भेला नभएपछि सुरुमै महामन्त्री शर्माले उपस्थित नभएकाहरु जुममार्फत ‘भर्चुअल’ रुपमा जोडिने बताए । बैठकमा अधिकांश जिल्ला प्रतिनिधिहरु सहभागी भएका थिए । यद्यपि, बैठक सुरु भएको दुई घण्टापछि ‘ब्रिफिङ’ गर्दै प्रचार विभागका प्रमुख मीन विश्वकर्माले ६५ जना सभापति भेला भएका दाबी गरे । यद्यपि, शुक्रबार फाइनल ¥यापोर्टमा भने कांग्रेसले देशभरका ४२ जिल्ला सभापतिहरुमात्र बैठकमा उपस्थित भएको जनायो ।
के थियो मुद्दा ?
महामन्त्रीद्वयले सञ्चालन गरेको जिल्ला सभापतिहरुको भेलाको मूल मुद्दा थियो, क्रियाशील सदस्यताको डिजिटल अपडेटबारे । अनलाइनबाट कसरी सदस्यता लिने र नवीकरण कसरी गर्ने भन्ने विषयमा डिजिटल प्रशिक्षण दिने कार्यक्रममा दुई महामन्त्रीले घुसाए ‘बदलिएको कांग्रेस, बलियो कांग्रेस’ अभियानलाई । मेचीदेखि महाकालीसम्म पु¥याउने भनिएको यो अभियानलाई जिल्ला सभापतिहरुले भने खासै चासो दिएको देखिएन ।
बैठकपछि कांग्रेसले १४ बुँदे आन्तरिक प्रतिबद्धतासहित बैठक सकिएको विज्ञप्ति जारी ग¥यो । ‘पार्टी सदस्यता र संगठनका विभिन्न विषयमा छलफल गरी १४ बुँदे प्रतिबद्धतासहित नेपाली कांग्रेस जिल्ला सभापतिहरूसँगको दुई दिने बैठक सम्पन्न गरेका छौं,’ बैठकमा के–के विषयमा कुरा भए भन्ने विषयमा महामन्त्री थापाले भनेका छन्, ‘बैठकमा पार्टी, नीति र नेतृत्वका सम्बन्धमा उठेका विभिन्न विषयहरूलाई हामीले आसन्न केन्द्रीय कार्यसमितिको बैठकमा लैजानेछौं ।
बैठकमा उपस्थित सभापतिहरूले जुन विचार, सुझाव र प्रतिबद्धता जाहेर गर्नुभएको छ, यसले ‘बदलिएको कांग्रेस, बलियो कांग्रेस’ बनाउने अभियानलाई थप गति प्रदान गर्नेछ ।’ यसबारे अर्का महामन्त्री शर्माले भने खासै मुख खोलेका छैनन् । दुई महामन्त्रीको अभियानलाई बैठकले खासै महŒव नदिएको देखिन्छ । ‘मेचीकाली अभियानबारे निर्णय भएन,’ मकवानपुर कांग्रेस सभापति बुद्ध लामाले भने ।
शेखरको पनि प्रश्न
जिल्ला सभापतिहरुको बैठकमा देउवा नगएकोमा डा. शेखर कोइरालालेसमेत प्रश्न गरे । संस्थापनइतरको नेतृत्व गरेपछि पछिल्लोपटक देउवानिकट बनेका शेखरले विराटनगरबाटै बैठकमा पार्टी सभापति देउवाको पनि उपस्थिति हुनुपर्ने भन्ने धारणा राखेका हुन् । शुक्रबार बिहान उनले बैठकमा पार्टी सभापति देउवा पनि सहभागी भएको भए सुनमा सुगन्ध हुन्थ्यो भन्ने विचार व्यक्त गरेका थिए ।
त्यसो त उक्त कार्यक्रम सुरुमा ‘भर्चुअल’ रुपमा जुमबाटै आयोजना गर्ने तयारी थियो । अधिकांश जिल्ला सभापतिहरुले पार्टी कार्यालयमै भौतिकरुपमा आयोजना गर्न सुझाव दिएपछि सानेपामै बोलाइएको महामन्त्री शर्माले पहिलो दिनमै भनेका थिए । यही भनाइलाई पुष्टि गर्ने गरी विराटनगर पुगेका शेखरले भने, ‘पहिले यो कार्यक्रम जुमबाट गर्ने योजना बनेको थियो । तर, ७० प्रतिशत सभापतिहरू काठमाडौंमै भएकाले भौतिक उपस्थितिमै कार्यक्रम गर्ने निर्णय भएको हो ।’
बैठकमा को थिए देउवाका दूत ?
जिल्ला सभापतिहरुको बैठकमा संस्थापन पक्षबाट सहमहामन्त्री भीष्मराज आङ्देम्बे र प्रचार विभाग प्रमुख मीन विश्वकर्मा बैठकमा उपस्थित थिए । बैठकबारे देउवालाई जानकारी थियो कि थिएन ? ‘सभापतिलाई थाहै नदिई बैठक राख्ने भन्ने हुन्न । उहाँलाई पूर्ण जानकारी छ,’ यसबारे प्रस्ट्याउँदै बैठकमा सहभागी सहमहामन्त्री आङ्देम्बेले भने ।
विशेषगरी यस्ता खालका बैठक महामन्त्रीको लेभलबाटै हुने भएकोले सभापति उपस्थित नभएको उनको तर्क थियो । प्रचार विभाग प्रमुख विश्वकर्माले पनि बैठकबारे देउवालाई पूर्णजानकारी रहेको बताए ।
जिल्ला सभापतिहरुलाई स्वागत गर्दै महामन्त्री शर्माले पनि सभापति देउवा उपस्थित नहुने बताएका थिए । बैठकमा संस्थापन पक्षका जिल्ला सभापतिहरुको पनि सहभागी थिए ।
पछिल्ला राजनीतिक गतिविधिमा नदेखिएका देउवा शनिबार भने किताब विमोचनमा देखिए भृकुटीमण्डपस्थित नेपाल पर्यटन बोर्डमा । ‘भैरवसिंह रावल स्मृतिग्रन्थ’ सार्वजनिक गर्दा देउवाले राजनीतिक दौडधुपको बारेमा खासै केही बोलेनन् ।
देउवाले अछाम कांग्रेसका पुराना नेता रावलकोबारेमा चर्चा गरे । ‘रावलजीको अछामलाई वेग्लै जिल्लाका रूपमा स्थापित गराउन ठूलो योगदान छ, सुदूरपश्चिम क्षेत्र विकासमा पछि परेकाले सबै मिलेर काम गरी अघि बढाउनुपर्छ भनी प्रेरित गरिरहनुभयो,’ छोटो मन्तव्यमा देउवाले भने ।
-1745656903.jpeg)
